ԱՐՑԱԽԻ ՆԱԽԱԳԱՀԱԿԱՆ ԸՆՏՐՈՒԹԻՒՆՆԵՐՈՒՆ` Հ.Յ.Դ. ԿԵԴՐ. ԿՈՄԻՏԷԻ ԹԵԿՆԱԾՈՒՆ է ԲԱԿՕ ՍԱՀԱԿԵԱՆԸ

0 0
Read Time:1 Minute, 48 Second

 Վերջերս, Արցախի Հ.Յ.Դ. Կեդրոնական Կոմիտէն, հաղորդագրութիւն մը հրապարակելով, տեղեկացուց թէ, տեղւոյն նախագահական ընտրութիւններուն, կ՛առաջադրէ Բակօ Սահակեանի անունը: Ստորեւ, հաղորդագրութիւնը ամբողջութեամբ.-

Սիրելի հայրենակիցներ,
ԼՂՀ նախագահական ընտրութիւնների շեմին պահն է հասել` անցած հինգ տարիներին ԼՂՀ-ի ունեցած յաջողութիւններն ու անյաջողութիւնները վերաիմաստաւորելու և դրանց շուրջ մտորելու:

Անշուշտ կան ձեռքբերումներ, առաջընթաց, բարոյահոգեբանական մթնոլորտի նոր որակ: Հինգ տարիների ընթացքում համատեղ ջանքերով կարողացել ենք իրականացնել ԼՂՀ Սահմանադրութիւնից բխող օրէնսդրական բարեփոխումներ, տեղի է ունեցել իշխանութեան թևերի տարանջատում, խորացել են զսպման և հակակշռման մեխանիզմները, որի հետևանքով առաջընթաց է գրանցուել կոռուպցիայի և կաշառակերութեան դէմ պայքարում, իրականացուել է նպատակաուղղուած քաղաքականութիւն սոցիալական ոլորտում և տնտեսական զարգացման ուղղութեամբ, Արցախի արտաքին քաղաքականութեան ասպարէզում դրսեւորուել է հայանպաստ կարծր կեցուածք:

Սակայն նկատելի են նաև լուրջ բացթողումներ ու չիրականացած խոստումներ: Մեր առջև ծառացած հիմնախնդիրների յաղթահարումը մեզնից պահանջում է վերափոխել երկրում ստեղծուած քաղաքական համակարգը: Անհրաժեշտ է որդեգրել նոր սկզբունքներ և ցուցաբերել նոր մօտեցումներ: Համոզուած ենք, որ միասնական ջանքերով հնարաւոր կը լինի պահպանել այն վստահութիւնն ու ոգևորութիւնը, որին ականատես եղանք նախորդ նախագահական ընտրութիւնների նախաշէմին:

ՀՅԴ Արցախի Կեդրոնական կոմիտէն բազմակողմանիօրէն քննարկելով ԼՂՀ յառաջիկայ նախագահական ընտրութիւնների հարցը և անցկացնելով զանազան խորհրդակցութիւններ` որոշում է կայացրել նախագահական ընտրութիւններին սատարել ԼՂՀ գործող նախագահ Բ. Սահակեանին:
Համոզուած լինելով, որ չի սպառուել միասնական ջանքերով աշխատելու հնարաւորութիւնը և վստահ լինելով, որ Բ. Սահակեանը կը դրսեւորի հարկ եղած վճռակամութիւն և քաղաքական կամք` յաղթահարելու երկրի զարգացմանն արգելակող բոլոր խոչընդոտները:

Ցաւով պէտք է յայտնել, որ չնայած անցեալ տասը տարիների համատեղ գործակցութեան, նախագահի թեկնածու Վ. Բալասանեանի հետ մեր համագործակցութիւնը դադարեցւում է` չկայացած համաձայնութիւնների պատճառով:

ՀՅԴ Արցախի Կեդրոնական կոմիտէն ակնկալում է, որ Բ. Սահակեանը հաւատարիմ կը մնայ հետեւեալ սկզբունքներին, որով և պայմանաւորուած կ լինի մեր հետագայ համագործակցութիւնը.

1. Արցախի հիմնախնդրի լուծման գործընթացում ոչ մի դէպքում չցուցաբերել զիջողական կեցուածք ԼՂՀ Սահմանադրութեամբ ամրագրուած մեր ժողովրդի իրաւունքների իրականացման հարցում:

2. Համազգային և ռազմավարական նշանակութիւն ունեցող հարցերի առընչութեամբ ԼՂՀ պաշտօնական դիրքորոշումը քննարկել ԼՂՀ գործող բոլոր քաղաքական ուժերի մասնակցութեամբ:

3. Քաղաքական և տնտեսական ոլորտներում խուսափել խտրական մօտեցումներից` ապահովելով օրէնքի գերակայութիւնը:

Հարկ է նշել, որ ՀՅԴ Արցախի ԿԿ-ն իր աջակցութիւնն է յայտնում գործող Նախագահին, նկատի ունենալով միջազգային և տարածաշրջանային իրադարձութիւնները, որի արդիւնքում օր առաջ անհրաժեշտութիւն է դառնում համայն հայութեան ուժերի լարումն ու միասնական կամքի դրսեւորումը, ինչպէս նաև ԼՂՀ Նախագահի խորհրդանշական դերն ու ազդեցութիւնը համահայկական հարցերի ուղղութեամբ` դրսեւորելով հայ ժողովրդի պահանջատիրական կեցուածքը:

ՀՅԴ Արցախի Կեդրոնական Կոմիտէ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՀՐԱՆԴ ՄԱՐ­ԳԱՐ­ԵԱՆ ՊԱՐ­ԳԵ­ՒԱՏՐ­ՈՒԵ­ՑԱՒ ՀԱ­ՅԱՍ­ՏԱ­ՆԻ ՀԱՆ­ՐԱ­ՊԵ­ՏՈՒ­ԹԵԱՆ “ՄՈՎ­ՍԷՍ ԽՈ­ՐԵ­ՆԱ­ՑԻ“Ի ՄՇԱ­ԿՈՒ­ԹԱ­ՅԻՆ ԲԱՐՁ­ՐԱ­ԳՈՅՆ ՄԵ­ՏԱ­ԼՈՎ
Next post ՀԵՏԱՔՐՔՐՔԱԿԱՆ ՎԱՒԵՐԱԳՐԱԿԱՆ ՄԸ` “ԱՐԱՐԱՏԻՑ ԵՒՐՈՊԱ“

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles