“ՇԱՏԵՐ ՈՉ ՄԻ ՔԱՅԼԻՑ ՉԵՆ ԽՈՐՇԻ Հ.Յ.ԴԱՇՆԱԿՑՈՒԹԻՒՆԸ ՎԱՐԿԱԲԵԿԵԼՈՒ ՀԱՄԱՐ…“ ԿԸ ՅԱՅՏՆԷ ՎԱՀԱՆ ՅՈՎՀԱՆՆԻՍԵԱՆ

0 0
Read Time:3 Minute, 10 Second

Վերջին քանի մը օրերուն, Երեւանի համասեռականներու գիշերավայրի մը մէջ կատարուած խափանարարական արարքը, պատճառ հանդիսացաւ որ կարգ մը հայկական լրատուամիջոցներ լայնօրէն անդրադառնան այս հարցին: Ենթադրեալ տեղեկութիւններու վրայ հիմնուելով, փորձ կատարուեցաւ հարցը քաղաքականացնել եւ Հ.Յ. Դաշնակցութեան վերագրել անհանդուրժողականութիւն սփռելու մեղադրանք, նկատի առած, որ մեղադրեալ խափանարարները հայաստանեան մամուլին մէջ Հ.Յ.Դ. անդամներ հռչակուած էին: Այս առթիւ, յապաւումով լոյս կ՛ընծայենք հարցազրոյց մը կատարուած “Երկիր“ի կողմէ, Հ.Յ.Դ. Բիւրոյի անդամ Վահան Յովհաննիսեանի հետ.-

Հ.- Հայաստանեան մամուլը հեղեղուած է վերջերս DIY ակումբի հրկիզման եւ գծով կասկածեալների` կալանքը գրաւով փոխարինելու մասին նիւթերով: Ակումբի տէրը յայտարարել է, որ իր ակումբի դէմ պայքարը հովանաւորւում է Հ.Յ.Դաշնակցութեան կողմից, քանի որ դաշնակցական պատգամաւորներ` Արծուիկ Մինասեանն ու Հրայր Կարապետեանն են վճարել գրաւը:

Պ.- Ես խորհուրդ կու տամ ակումբի տէրերին եւ նրա ներքին ու արտաքին հովանաւորողների ձեռնպահ մնալ քրէական հանցագործութիւնը քաղաքականացնելուց: Գործը գտնւում է նախաքննութեան փուլում եւ, յոյս ունենք, որ անաչառ քննութիւնը կը պարզի ովքե՞ր են այդ չարագործութեան հրահրողները, կազմակերպիչներ ու իրականացնողները: Մինչ նախաքննութեան աւարտը պէտք չէ պղտոր ջրում ձուկ որսալ եւ զրպարտութիւնների միջոցով քաղաքական կապիտալ վաստակել:

Հ.- Այնուամենայնիւ, նշւում է, որ ձերբակալուած երկու երիտասարդներն ազգակցական կապ ունեն Հ.Յ.Դ. նախկին բարձրաստիճան գործիչի հետ, իսկ երաշխաւորողներն ու գրաւը վճարողները Հ.Յ.Դ. անդամներ են:

Պ.- Խնդիրը չի կարելի ընդհանուր համատեքստից դուրս նայել: Ինչպէս իր յայտարարութեան մէջ նշել է Արծուիկ Մինասեանը. “Հայաստանում կալանաւորումը` որպէս խափանման միջոց, պէտք է կիրառուի խիստ հազուագիւտ դէպքերում, այլ ոչ թէ դառնայ յաճախ կիրառուող միջոց“: Աւելին, Հ.Յ.Դ. նախընտրական ծրագրի “Ազգային-ժողովրդավարական ժամանակակից պետութեան կառուցում“ բաժնում մենք շեշտել ենք “կալանաւորումը` որպէս խափանման միջոց կիրառելու դեպքերի նուազեցման“ կարեւորութիւնը: Հ.Յ.Դաշնակցութիւնը երբեք ընտրութիւններից յետոյ չի մոռանում ընտրութիւններից առաջ իր տուած խոստումները: Այս համոզմունքից մեկնելով, Արծուիկ Մինասեանն ու Հրայր Կարապետեան անձնական նախաձեռնութեամբ, հանդէս եկան կալանքը գրաւով փոխարինելու միջնորդութեամբ: Միջնորդութեան համար հիմք է ծառայել կասկածեալների նուազ հասարակական վտանգաւորութիւնը եւ որ նրանց ազատութեան մէջ գտնուելը չի կարող խոչընդոտել նախաքննութեան ընթացքին: Բուն յանցագործութեան էութիւնը կամ թիրախը որեւէ գործօն չեն հանդիսացել պատգամաւորների որոշման համար: Կարող ենք բազմաթիւ օրինակներ բերել, երբ Արծուիկ Մինասեանն ու Հրայր Կարապետեանն ինչպէս նաեւ այլ դաշնակցական պատգամաւորներ նման նախաձեռնութիւն են ցուցաբերել: Հետեւաբար, ապսուրտին սահմանակից մեղադրանքները, որ Հ.Յ.Դաշնակցութիւնն է կազմակերպել, ուղղորդել այդ երիտասարդներին հիմնազուրկ են: Դրանք կամ ուղղորդւում են այն քաղաքական ուժերի կողմից, ովքեր չեն կարողանում հանդուրժել Հ.Յ.Դաշնակցութեան գործունէութիւնը թէ՛ Հայաստանում, թէ՛ Սփիւռքում ուղղուած Հայաստանում ժողովրդավարութեան հաստատմանը, մարդու իրաւունքները յարգելուն, սոցիալական համերաշխութեան հաստատմանը եւ հայութեան շահերի պաշտպանութեանը: Վստահ եմ, շատերին դա դուր չի •ալիս եւ նրանք ոչ մի քայլից չեն խորշի Հ.Յ.Դաշնակցութիւնը վարկաբեկելու համար: Իսկ Ծոմակն այս մեծ խաղում մի փոքրիկ դերակատար է, ով արդէն հաւանաբար ստացաւ իր վարձատրութիւնը յայտնուելով հեռուստացոյցերի էկրաններին եւ թերթրի էջերին:

Հ.- Իսկ ինչպէ՞ս էք վերաբերւում հրկիզման փաստին: 

Պ.- Տեղի է ունեցել յանցագործութիւն: Յանցագործութեան բոլոր մասնակիցները պէտք է բացայայտուեն ու պատժուեն օրէնքի ողջ խստութեամբ: Մարդկանց սեփականութեան նկատմամբ ոտնձգութիւն է տեղի ունեցել, պատճառուել է նիւթական վնաս: Ամէնը պէտք է փոխհատուցուի: Եթէ այդ հաստատութեանը կամ նրա տէրերին վտանգ է սպառնում, ապա պետութիւնը պարտաւոր է քայլեր ձեռնարկի թէ՛ հաստատութեան, թէ՛ դրանց տէրերի եւ յաճախորդների անվտանգութիւնն ապահովելու համար:

Հ.- Ոմանք, առիթից օգտուելով, Հ.Յ.Դաշնակցութեանը սկսեցին մեղադրել հոմոֆոպիայի եւ սեռական փոքրամասնութիւնների դէմ պայքար ծաւալելու մէջ:

Պ.- Գիտէք, 122 տարուայ ընթացքում Հ.Յ.Դաշնակցութեանը պարբերաբար շինծու մեղադրանքներ են ներկայացուել: Նոյնիսկ դրա մասին երգ կայ: Ինչպէս արդէն նշեցի, Հ.Յ.Դաշնակցութիւնը պայքարում է Հայաստանում ժողովրդավարութեան եւ սոցիալական համերաշխութեան համար: Դաշնակցութիւնը միշտ պայքարել է ազատ կամքի բռնութեան դէմ, քանի որ ազատ կամքի դէմ բռնութիւնը եւ խտրական վերաբերմունքը որեւէ մէկի նկատմամբ խաթարում են հասարակութեան ներդաշնակութիւն ու դուռ բացում արտաքին թշամիների առջեւ: Ուստի, մենք երբեք որեւէ ֆոպիա որեւէ մէկի նկատմամբ չենք քարոզել, քանի որ դա դէմ է հենց Հ.Յ.Դաշնակցութեանը  բնոյթին: Չենք ժխտում, որ հասարակութեան մէջ առկայ են տարբեր մօտեցումներ սեռական փոքրամասնութիւնների նկատմամբ: Փոքրամասնութիւններն ընդհանրապէս` (ազգային, կրօնական, եւայլն) յաճախ են անհանդուրժողականութեան թիրախ դառնում, բայց Հ.Յ.Դաշնակցութեանը  համոզումն է` օրինապաշտ մարդկանց քաղաքացիական իրաւունքների սահմանափակումը կամ նրանց նկատմամբ բռնութիւն կիրառելն  անթոյլատրելի են:

 


 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԹԱՏ­ՐՈՆ .- ԿԱ­ՐԵ­ԼԻ ՉԷ ԼՈՒՌ ՄՆԱԼ…ՀՐԱՆԴ ՄԱՐ­ԳԱՐ­ԵԱ­ՆԻ “SILENCE“ԳՈՐ­ԾԻՆ ԲԵ­ՄԱԴ­ՐՈՒ­ԹԵԱՆ ԱՌ­ԹԻՒ
Next post ՐՈՏ ԱՅԼԸՆՏ ՆԱՀԱՆԳԻ ԿՈՉԸ` ՃԱՆՉՆԱԼՈՒ ԱՐՑԱԽԻ ԱՆԿԱԽՈՒԹԻՒՆԸ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles