ՖՐԱՆՍԱՅԻ ԾԵՐԱԿՈՅՏԸ ՈՐԴԵԳՐԵՑ ՀԱՅՈՑ ՑԵՂԱՍՊԱՆՈՒԹԵԱՆ ԺԽՏՈՒՄԸ ՔՐԷԱԿԱՆԱՑՆՈՂ ՕՐԻՆԱԳԻԾԸ

0 0
Read Time:6 Minute, 18 Second

Փարիզ (“Լը Մոնտ“, “Ռատիքալ“).- Յունուար 23-ին, աւելի քան հինգ ժամ տեւած մանրամասն  քննարկումներէ եւ բուռն վիճաբանութիւններէ ետք, Ֆրանսայի Ծերակոյտը որդեգրեց Հայոց Ցեղասպանութեան ժխտումը քրէականացնող օրինագիծը:

Ծերակուտականները յայտնեցին, թէ այս որոշումը ուղղուած չէ Թուրքիոյ եւ թուրք ժողովուրդին դէմ, ընդհակառակը, անոնք յոյս յայտնեցին որ ժամանակը կուգայ երբ թուրք ժողովուրդը կը հասկնայ տուեալ դիրքորոշումը: Քննարկման մասնակցող ծերակուտականները փաստեցին Ցեղասպանութեան անհերքելի իրողութիւնը եւ  շեշտեցին թէ ժխտողականութիւնը մեծապէս խոցելի կը դարձնէ զոհերու յիշատակը:

Խորհրդարանականներու կողմէ կատարուած խմբագրական որոշ սրբագրութիւններէ ետք տեղի ունեցաւ քուէարկութիւնը, որ իր աւարտին հասաւ 127 թեր – 86 դէմ քուէներու արդիւնքով:
Սրահին մէջ ծափահարութիւններով եւ ուրախութեան բացագանչութիւններով ընդունուեցաւ արդիւնքը, մինչ Թուրքիոյ ներկայացուցիչները լուռ մեկնեցան սրահէն:

Ծերակոյտի իրաւական հարցերով յանձնախումբի զեկուցող Ժան-Փիեռ Սիւէօր յայտնեց, որ Հայոց Ցեղասպանութեան փաստը որեւէ ձեւով հարցականի տակ չէ եւ այսօրուան քննարկումը անոր շուրջ չէ, այլ օրէնքին‘ ի՞նչ բան կրնայ ընել կամ չընել: Ան ըսաւ, որ ժխտողականութիւնը ահաւոր է, եւ “մենք զայն կը դատապարտենք“: Սիւէօր զգուշացուց, որ եթէ սահմանադրական դատարանը այս օրինագիծը հակասահմանադրական նկատելով մերժէ, այդ մէկը ժխտողականութեան համար յաղթանակ մը պիտի ըլլայ եւ այդ վտանգը իսկական է ու կրնայ վիրաւորել ֆրանսահայութեան զգացումները:
Իզապել Փասքէ ըսաւ, որ Ֆրանսայի նախագահը հայկական համայնքը կ՛օգտագործէ իր ընտրական շահերուն համար եւ ընդգծեց, որ այս օրինագիծը ընտրական նպատակներ կը հետապնդէ: Անոր խօսքը ծերակուտականներուն մօտ զայրոյթ յառաջացուց: Ծերակուտականը քննադատեց Փարիզի մէջ թուրքերուն ցոյցը եւ նշեց, որ հայերը իրաւունք ունին օրէնքով պաշտպանուիլ պահանջելու:

Հանրապետական կուսակցութեան ներկայացուցիչ Նաթալի Պուլէ յայտնեց, որ “Մեր հայ հայրենակիցները կարեկցանքի կարիք ունին եւ Ֆրանսան պատասխանատուութիւն ունի իր հայրենակիցներուն նկատմամբ“: Ան ողջունեց օրինագիծի քննարկումը եւ կոչ ուղղեց զայն որդեգրելու: Իշխող կուսակցութենէն Ռոժէ Քարուչի յայտնեց, որ Ֆրանսա երկու ցեղասպանութիւն ճանչցած է, սակայն անոնց ժխտումին նկատմամբ նոյն ձեւով չենք վարուիր: Ան նշեց, որ զոհերը զոհեր են եւ ջարդերը ջարդեր, ինչո՞ւ հայ զոհերը հրեայ զոհերուն նոյն իրաւունքը չունենան:
Բնապահպան կուսակցութենէն Էսթեր Պենպասա յայտնեց, որ Թուրքիա պէտք է իր պատմութեան սեւ էջերուն հետ դէմ յանդիման գայ: Ան ըսաւ, որ ժխտողականութիւնը Թուրքիոյ մէջ իսկական ճարտարարուեստ մըն է: “Այս օրինագիծը Թուրքիոյ կողմէ Հայոց Ցեղասպանութեան ճանաչումին պիտի չծառայէ, ոչ ալ‘ հայ-թուրք երկխօսութեան“, ըսաւ ան‘ աւելցնելով, որ Թուրքիայէն դուրս Հայոց Ցեղասպանութեան ճանաչումը անիմաստ է: Ան նշեց, որ ինք եւ իր կուսակցութիւնը օրինագիծին դէմ են:

Միեւնոյն Բնապահպան կուսակցութենէն Ժան-Վենսան Փասէ յայտնեց, որ քաղաքական գործիչի մը համար աւելի դժուար բան չկայ, քան ամբողջ ազգի մը չարչարանքը դատելը: “Դժուար է այս օրինագիծին “ոչ“ քուէարկել“, ըսաւ ան: “Մեր դերը ոչ թէ պատմական իրադարձութիւններու օրէնքներ ընդունիլն է, այլ ստեղծել ճշգրիտ օրէնքներ, որոնք կրնան նուազեցնել խտրականութիւնը… Այս քննարկումները պէտք է շարունակական ըլլան: Առանց Թուրքիոյ կողմէ ընդունման ցեղասպանութեան հարցը չի կրնար լուծուիլ“: Ան նշեց, որ “հայեր եւ թուրքեր դուրսը ցոյց կը կատարեն: Այսպիսի օրէնքի որդեգրումը պէտք է հայ եւ թուրք ժողովուրդները միացնէ“:
Ընկերվարական կուսակցութենէն Պեռնար Փիրաս յայտնեց, որ այս քննարկումները նախընտրական բնոյթ չունին, սակայն օրինագիծը կրնայ հայ եւ թուրք ժողովուրդներուն միջեւ պառակտում ստեղծել եւ լուրջ հետեւանքներ ունենալ: Ան նշեց, որ պէտք է թոյլ տալ, որ այս հարցով պատմաբանները աշխատին: Այլ Ընկերվարական կուսակցութեան անդամ մը` Լիւք Քարվունաս յայտնեց, որ ցեղասպանութիւնը ամբողջ մարդկութեան բնաջնջումն է, իսկ այս օրինագիծը պարզապէս օրէնք դնել չէ, այլ‘ ամէն ինչ իր տեղը դնելը: “Հոս կը քննարկուի քաղաքակրթական, պատմական երեւոյթը“, ընդգծեց ան:

Ձախ արմատական կուսակցութեան անդամ Ժաք Մեզար յայտնեց, որ օրինագիծը ընտրական քայլ մըն է եւ մեծ սխալ մը պիտի ըլլայ ֆրանսական սահմանադրութեան դէմ, եւ արտաքին քաղաքականութեան մէջ անոր ծանր հետեւանքները անտեսուած են: “Մենք կ՛ուզենք, որ մեր գործընկերները մերժեն այս օրինագիծը, սակայն ընտրական հաշիւները պիտի յաղթանակեն“: Խորհրդարանին հետ կապերու հարցով նախարար Փաթրիք Օլիէ յայտնեց, որ “ժխտողականութիւնը մեր հաւաքական յիշողութեան դէմ գերագոյն անարգանքն է“: Ան նշեց, որ եթէ օրէնքին դէմ պէտք էր բողոքել, այդ մէկը պէտք էր կատարել 20 տարի առաջ հրէական Ողջակիզումի ժխտումը քրէականացնող օրէնքի որդեգրման ընթացքին: Ան տրամաբանական չնկատեց, որ խորհրդարանին կողմէ ճանչցուած երկու ցեղասպանութիւններուն նկատմամբ տարբեր մօտեցումներ ցուցաբերուին` առաջինին ժխտումը քրէականացնելով, իսկ երկրորդինը` ոչ: Նախարար Օլիէ օրինագիծի որդեգրումը արդարութեան կիրարկում նկատեց եւ նշեց, որ Ֆրանսա այսպիսի օրէնք մը որդեգրող առաջին երկիրը պիտի չըլլայ: Նախարարը օրինագիծի քննարկումը անհարկի նկատեց, որովհետեւ անոր հիմքը տասը եւ քսան տարի առաջ կատարուած է: Ան նշեց, որ օրինագիծի որդեգրումով ծերակուտականները ցեղասպանութեան ճանաչում չէ որ կ՛ընեն, այլ‘ Ֆրանսայի օրէնքը կ՛ամբողջացնեն: Ան ընդգծեց, որ կառավարութիւնը կը զօրակցի այս օրինագիծին, եւ ծերակուտականները հրաւիրեց միաձայնութեամբ որդեգրելու օրինագիծը: Նախարար Օլիէ երկրորդ անգամ խօսք առնելով ծերակուտականներուն յիշեցուց, որ 2001-ին հրէական Ողջակիզումի օրէնքը գրեթէ միաձայնութեամբ որդեգրած էին, “իսկ հիմա ինչո՞ւ զայն սահմանադրական դատարանին փոխանցելու մասին կը խօսիք, եթէ օրէնքը հակասահմանադրական էր, այդ քայլը 2001-ին պէտք էր կատարէիք“:

Քուէարկութեան արդիւնքէն անմիջապէս ետք, ծերակոյտի շէնքին առջեւ հաւաքուած հայերը սկսան “Զարթիր Լաօ“ երգով տօնել օրինագիծի որդեգրումը: Օրէնքը գործադրելի դառնալու համար կարիքը կայ նախագահ Նիքոլա Սարքոզիի ստորագրութեան:

 

ԹՐՔԱԿԱՆ ԿՈՂՄԻ ՅՈՒՍԱԽԱԲՈՒԹԻՒՆԸ

Նախքան օրինագիծի քննարկումը, Անգարա վերջին անգամ ըլլալով զգուշացուցած էր Ֆրանսան: Թուրքիոյ Արտաքին Գործոց նախարար Ահմէտ Տաւութօղլու յայտարարեց, որ “թրքական կառավարութիւնը Ֆրանսայի դէմ վրէժխնդրական միջոցառումներ պիտի որդեգրէ, եթէ Ֆրանսայի ծերակոյտը որդեգրէ Հայոց Ցեղասպանութեան ժխտումը քրէականացնող օրինագիծը: Նախապէս ճշդեցինք շարք մը միջոցառումներ, որոնք մտադիր ենք գործադրելու, եթէ օրինագիծը վերջնականապէս որդեգրուի: Ոչ ոք պէտք է այդ ուղղութեամբ կասկած ունենայ:
Այդ օրինագիծը միջնադարեան հաւատաքննութեան որոշումներու նախատիպ կը նկատուի“: Տաւութօղլու ջնջեց Յունուար 24ին նախատեսուած Պրիւքսէլ իր այցելութիւնը` սպասելով Ֆրանսայի Ծերակոյտի որոշումին:

Նշենք թէ Եւրոպայի տարբեր շրջաններէն փոխադրակառքերով եւ ինքնաշարժներով Փարիզ ժամանած էին աւելի քան 15 հազար թուրքեր, որոնք անկազմակերպ, ծայրայեղական եւ խուլիկանական ոճով խուժած էին մօտակայ հրապարակ: Ցուցարարները կը կրէին Թուրքիոյ, Ատրպէյճանի եւ Ալճերիոյ (դիտմամբ, կրօնական բնոյթ տալու համար) դրօշներ, ինչպէս նաեւ Ֆրանսայի նախագահ Նիքոլա Սարքոզիի դէմ արտայայտութիւններով պաստառներ եւ ծաղրանկարներ:

Թուրքիոյ վարչապետ Թայիպ Էրտողան զայրացած, յայտնեց թէ երբեք այլեւս պիտի չայցելէ Ֆրանսա, Ցեղասպանութեան քրէականացումը ընդունող օրինագիծի լոյսին տակ: “Ծերակուտականը որոշում կայացուց, մենք ալ մեր որոշումները ունինք“ ըսաւ ան, առանց յաւելեալ մանրամասնութիւններ փոխանցելու: Թուրքիոյ փոխվարչապետ Պիւլենթ Արընչ ողջունած է թուրք ցուցարարները` միաժամանակ հեգնական հարց տալով, թէ Ֆրանսա ի՞նչ պիտի ընէ, եթէ օրինագիծի վաւերացումէն ետք Թուրքիոյ վարչապետը Փարիզի մէջ ուրանայ Հայոց Ցեղասպանութիւնը:

Թրքական “Ռատիքալ“ օրաթերթի կայքէջը նշեց, որ “թուրքերը գացին իրենց տուները, հայերը սկսան տօնել“: Եւրոպայի տարբեր շրջաններէն Փարիզ հասած թուրքերը արդէն քուէարկութենէն առաջ սկսած էին հեռանալ Ծերակոյտի շէնքին առջեւէն: “Ենի Շաֆաք“ եւ թրքական այլ թերթեր կը գրեն, թէ Ֆրանսայի խորհրդարանին կողմէ Ցեղասպանութեանց ուրացումը քրէականացնող օրինագիծի վաւերացման առնչութեամբ Ատրպէյճանի իշխանութիւններուն ցուցաբերած անտարբերութիւնը, դժգոհութիւններու ճամբայ բացած է Թուրքիոյ պետական ու հասարակական շրջանակներուն մէջ:

Թերթերը կը գրեն, թէ Հայաստան-Թուրքիա փրոթոքոլներուն առնչութեամբ Ատրպէյճանի բողոքներուն տեղի տալով` Թուրքիա “աղբաման նետած էր“ այդ փրոթոքոլները, հակառակ Ամերիկայի եւ Եւրոմիութեան ճնշումներուն, սակայն նոյն կեցուածքը չցուցաբերուեցաւ “եղբայր Ատրպէյճան“էն:

Ատրպէյճանի ժողովուրդը զանազան մակարդակներու վրայ բողոքի ձայն բարձրացուց, սակայն իշխանութիւնները “մահացու լռութիւն“ պահեցին ու ժողովուրդին բողոքը անպատասխան մնաց:

Քաղաքական գործիչ Մուսթաֆա Տեսթիճի, այս զարգացումներուն մասին խօսելով ըսաւ, որ Թուրքիա Արցախեան բանակցութիւններուն մէջ միշտ զօրակցեցաւ Ատրպէյճանի ու փակ պահեց Հայաստանի հետ սահմանադուռը, եւ փրոթոքոլները Ատրպէյճանի ղեկավարութեան պահանջով` անիրագործելի դարձան, բայց հակառակ այս բոլորին, Ատրպէյճանի իշխանութիւնները յստակ կերպով իրենց դժգոհութիւնը չեն յայտներ Ֆրանսայի օրէնսդիրներուն:
“Սելճուք“ համալսարանի դասախօսներէն Պիլալ Աքկիւնի կարծիքով, Ատրպէյճանի նախագահ Իլհամ Ալիեւ հակազդեցութիւն ցոյց չտուաւ, որովհետեւ կը վախնայ իշխանութիւնը կորսնցնելէ: Արաբական երկիրներու “զարթօնք“ը կը սպառնայ նաեւ Ատրպէյճանին, ու այդ իսկ պատճառով Ալիեւ համարձակ կեցուածք չ՛որդեգրեր:
“Ենի Շաֆաք“ին համաձայն, Հայաստան-Ֆրանսա յարաբերութիւնները Թուրքիա-Ատրպէյճան յարաբերութիւններուն չափ խորունկ եւ հասարակաց անցեալ մը ունին, եւ նախագահ Նիքոլա Սարքոզի վերջերս “Ֆրանսայի քոյր պետութիւն“ որակած էր Հայաստանը: Մօտիկ անցեալին Թուրքիոյ դէմ Ֆրանսայի կողմէ առնուած քայլերը դժգոհութիւններու ու բողոքի ձայներ պէտք է բարձրացնէին Ատրպէյճանի մէջ, կ՛աւելցնէ թերթը:

ՀԱՅԱՍՏԱՆ ՈՂՋՈՒՆԵՑ…

Հայաստանի Արտաքին Գործոց նախարար Եդուարդ Նալպանտեան ողջունեց Ֆրանսայի Ծերակոյտին մէջ Ցեղասպանութիւններու ժխտումը քրէականացնող օրինագիծի ընդունման փաստը: Ան իր կատարած յայտարարութեան մէջ նշեց. “Այսօր Ծերակոյտի ընդունած որոշումը 2001 թուականին Ֆրանսայի կողմից Հայոց Ցեղասպանութեան ճանաչման մասին օրէնքի տրամաբանական շարունակութիւնն է: Այս օրը ոսկէ տառերով կը գրուի ոչ միայն ֆրանսացի եւ հայ ժողովուրդների բարեկամութեան պատմութեան մէջ, այլեւ աշխարհում մարդու իրաւունքների պաշտպանութեան տարեգրքում եւ կը լրացնի մարդկութեան դէմ յանցագործութիւնների կանխարգելման առկայ մեքանիզմները:
Ֆրանսան վերահաստատեց իր առանցքային դերակատարութիւնը որպէս համամարդկային արժէքների անշահախնդիր պաշտպան: Ես կը ցանկանայի մեր երախտագիտութիւնը յայտնել Ֆրանսայի Հանրապետութեան նախագահին, ծերակոյտին, Ազգային ժողովին, կառավարութեանն ու Ֆրանսայի բարեկամ ժողովրդին“:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՆՇՄԱՐ.- ԹՈՒՐՔԻՈՅ ԵՒ ՀՈՎԱՆԱՒՈՐՆԵՐՈՒՆ ՄՏԱԾԵԼՈՒ ՆԻՒԹ
Next post ԽՄԲԱԳՐԱԿԱՆ.- ՔՐԷԱԿԱՆԱՑՈՒՄ, ՈՐԴԵԳՐՈՒՄ ԵՒ ՎԱՒԵՐԱՑՈՒՄ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles