ՊԱՐԵՏ ՄԱՐՈՆԵԱՆԻ «ՑԵՂԱՍՊԱՆՈՒԹԵԱՆ ՈՐԲԵՐԸ»՝ ԹԵԿՆԱԾՈՒ «EMMY» ՄՐՑԱՆԱԿԻՆ

0 0
Read Time:2 Minute, 48 Second

Յատուկ հաղորդագրութեամբ մը, կը տեղեկանանք թէ, Հոկտեմբեր 18, 2010ին, Ֆլորիտայի Պատկերասփռային Գիտութեանց Ազգային Ակադեմիան (National Academy of Television Arts and Sciences) նկատի առած է եօթ վայրկեան տեւողութիւն ունեցող »Ցեղասպանութեան որբերը« (Orphans of the Genocide) տեսաներիզը, որպէս թեկնածու »Emmy« մրցանակին, պատմական վաւերագրական ժապաւէնի դասակարգէն ներս:

Պարետ Մարոնեանէն երկու այլ վաւերագրական ժապաւէններ՝ »Ցեղասպանութեան պատը« եւ »1915ի կիներ«, այս տարի ալ արժանացած էին համահայկական մամուլի ուշադրութեան եւ իրենց կարգին միացած՝ Եղեռնի նիւթին առնչուող արդէն իսկ նկարահանուած հարիւրաւոր ժապաւէններու շարքին:

»Ցեղասպանութեան պատը« նաեւ մրցանակակիր ժապաւէն է: Այս գործը »Թելլի« շարժանկարային փառատօնի 29րդ մրցանակաբաշխութեան »Պատմական վաւերագրութիւն« անուանակարգին արժանացած է գլխաւոր մրցանակի: Վաւերագրական այս ժապաւէնը բանաստեղծական ներկայացում մըն է, որ հայ եւ օտար ակնդիրներուն կը ծանօթացնէ հայոց պատմութեան կարեւորագոյն դրուագները՝ Նոյեան տապանի ժամանակներէն մինչեւ 2007 թուականի 19 Յունուարը Պոլսոյ մէջ »Ակօս« թերթի խմբագիր Հրանդ Տինքի սպաննութեան օրը: Ժապաւէնին մէջ յատուկ շեշտուած է այս թուականը, հեղինակները նկատի ունեցած են, որ այդ օրը հայոց պատմութեան մէջ աւարտած է ժամանակաշրջան մը եւ սկիզբ դրուած է նոր ժամանակաշրջանի մը: Տաս վայրկեան տեւողութեամբ վերոնշեալ ժապաւէնին մէջ խտացուած են հայրենասիրական բոլոր զգացումները՝ հպարտութենէն մինչեւ վրէժի ծարաւ, հայրենանուիրումէն մինչեւ անձնազոհութիւն: Զոհը այս պարագային Հրանդ Տինքն է, որ իր համարձակ գործունէութեամբ պայքարեցաւ մինչեւ վերջ եւ երբեք չընկրկեցաւ սպառնալիքի եւ ահաբեկումի ճնշումներուն տակ: »Ցեղասպանութեան պատը« ձեւով մը ամբողջ աշխարհի մէջ սփռուած հայորդիներու հերթական ճիգն է՝ Ցեղասպանութեան միջազգային ճանաչման դաշտին մէջ. հեղինակները՝ Պարետ Մարոնեան եւ Պետօ Տէր Պետրոսեան: Այս ժապաւէնով, անոնք  օտար միջավայրին կը ներկայացնեն հայոց պատմութիւնն ու այդ գծով տարուող պայքարը:

»Ցեղասպանութեան որբերը« 18 վայրկեան տեւողութեամբ վաւերագրական ժապաւէն մըն է, որ պատրաստուած է »Արմենոյտ թիմ«ի կողմէ: Նիւթը կը ներկայացնէ Ա. Համաշխարհային պատերազմի ընթացքին տեղի ունեցած ցեղասպանութենէն իբրեւ հետեւանք՝ 130 հազար հայ որբ մանուկներու չխօսուած պատմութեան մասին, որոնք փրկուած էին Միացեալ Նահանգներու »Near East Relief« հաստատութեան կողմէ:

Տեսաներիզը պատրաստող օգնականներէն Պետօ Տէր Պետրոսեան յայտնեց, որ այս թեկնածութիւնը ինքնավստահութիւն կը ներշնչէ ապագայ ծրագիրներուն համար: Ան նկատել տուաւ, որ »Արմենոյտ թիմ«ը աշխատանք կը տանի այս վաւերագրական ժապաւէնը 18 վայրկեանէն վերածելու մէկ ժամուան: Ժապաւէնը պատրաստողներէն Փոլ Անտոնեան յայտնեց, որ իրենք հարցազրոյցներ կատարած են որբերուն եւ անոնց ընտանիքներուն հետ:

Ժապաւէնի բեմադրիչ եւ »Արմենոյտ թիմ«ի հիմնադիր Պարետ Մարոնեան յայտնեց, որ ժապաւէնը երկարելու գծով խումբը յաւելեալ հետազօտական աշխատանք տարած է Գանատայի եւ Միջին Արեւելքի մէջ, ուր որբերը հաստատուած էին. անոնցմէ է Այնթուրայի (Լիբանան) որբանոցը, ուր հազար հայ որբեր բնակութիւն հաստատած էին:

»1915ի կիներ« այլ կարճ ժապաւէնն է, որ հեղինակը նուիրած է բոլոր մայրերուն եւ մեծ մայրերուն եւ յատկապէս ձօնած՝ իր մեծ մօր՝ Արփի Մարոնեանի յիշատակին: Հեղինակները այս ժապաւէնին յառաջաբանի համար ընտրած են պատմաբանփրոֆեսէօր Ռիչըրտ Յովհաննէսեանի մեկնաբանութիւնը՝ հայոց պատմութեան վաղնջական ժամանակներու մասին: Օտարներու համար պատմաբանը մանրամասնօրէն կը բացատրէ հայոց ծննդեան առասպելը՝ »Վահագնի ծնունդ«ի օրինակով, կը նշէ, որ Հայկ Նահապետն է հայոց նախահայրը, որուն սերունդները աշխարհի մէջ սկիզբ դրած են հայոց փառաւոր պատմութեան, եւ որ կիսատուեցաւ 1915ին, Հայոց Մեծ Եղեռնով: Ժապաւէնին մէջ կը շեշտուի կարեւորութիւնը հայ մամիկին, մօր, իբրեւ օճախ, ընտանիք եւ ազգ պահպանելու: Միլիոնաւոր զոհերու մէջ նաեւ հայ մայրեր էին, կիներ, որոնք տակաւին զաւակներ պիտի ծնէին եւ մեծցնէին, սակայն մահացած արեան ճամբուն վրայ: Տպաւորիչ է ժապաւէնին աւարտը. Արմէն Մովսիսեանի »Մի° լար, մայրի°կ, սպասիր ինձ, ես կը գամ« երգով կը յաւերժացուի զոհ դարձած բոլոր հայ մայրերուն յիշատակը: Ուշագրաւ է »Ցեղասպանութեան պատ«ի աւարտը. կը հնչեն Հրանդ Տինքի կնոջ՝ Ռաքէլ Տինքի խօսքերը, որ իր ամուսինը կը տեսնէ մեծ պայքարի ճամբան բռնած խաղաղութեան մարտիկ մը եւ, իբրեւ նշան, ճերմակ աղաւնիներ կ’արձակէ առ երկինք: Ժապաւէնը կը գոցուի Լիլիթ Պիպոյեանի »Սիրուն Մանուշակ« քնարական երգով. մանուշակը ժապաւէնին մէջ իբրեւ զոհի խորհրդանիշ ընտրուած է:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԱԶԳԱՅԻՆ ԴԱՍՏԻԱՐԱԿՈՒԹԵԱՆ ԱՆՀՐԱԺԵՇՏՈՒԹԻՒՆԸ ՊԱՏԱՆԻ ՏԱՐԻՔԻՆ
Next post »ՈՒԻՔԻԼԻՔՍ«ԵԱՆ ԲԱՑԱՅԱՅՏՈՒՄՆԵՐՈՒՆ ՍՏԵՂԾԱԾ ԾՈՒԽԷ ՇՂԱՐՇՆԵՐՈՒՆ ԵՏԻՆ ԻՆՉԵ~Ր ԿԸ ԾԱԾԿՈՒԻՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles