ՏԵՂԵԿԱՏՈՒ Հ.Յ.Դ. ԱՐԽԻՒՆԵՐՈՒ ՀԻՄՆԱՐԿԻ.-Նմոյշ մը Համաստեղի Ձեռագրէն

archives bg_header

Թիւ 7, Դեկտեմբեր 2009 

Մեր այս ամսուան լրատուն կ’առնչուի ամերիկահայ գրող եւ հանրային գործիչ Համաստեղի, բուն անունով Համբարձում Կէլէնեան։
     Համաստեղ սփիւռքահայ գրականութեան տիրական դէմքերէն է: Իբրեւ գիւղագիր, ան անկրկնելի ժառանգութիւն մը ձգեց իր ետին՝ իր «Գիւղը», «Անձրեւ», «Սպիտակ ձիաւորը», «Սրբազան կատակերգութիւն կամ Տոմար Մաքիական» եւ այլ գործերով:
     Համաստեղի գործերուն մէջ կը պատկերանայ Հայ Գիւղը, իր գոյներու, համ ու բուրմունքի ամբողջական երանգապնակով: Ըլլալով Արեւմտահայաստանի Խարբերդ նահանգիի զաւակ (ծնած է Փէրչէնճ գիւղը), Համաստեղ իր հերոսներուն ընդմէջէն մոռացումի կորուստէն փրկեց այն միջավայրը, ուր ապրեցան Տափան Մարգարն ու Թլկանց Օվանը, Ջաղջիպան Նաւոն ու Միջոն, աղունիկ խաղցնող Խաչոն ու նոյնիսկ գիւղի պահակ գամփռ Չալոն:
     Մեր արխիւներուն մէջ կը գտնուի իր «Սրբազան կատակերգութիւն կամ Տոմար Մաքիական» գործին ձեռագիրը: Ձեռագրին վրայ յստակօրէն կը կարդացուի տպագրութեան պատասխանատու խմբագիրին (հաւանաբար Ռուբէն Դարբինեան) ձեռագիրը՝ «Շարել 12 փոյնթով եւ երկու սիւնակի վրայ»:
     Այս ձեռագիրը տակաւին չէ դասակարգուած եւ կարգաթիւ չունի: «Հայրենիք ամսագիր»ի աշխատակից այլ գրող-մտաւորականներու ձեռագիրներու հետ, պահուած է յատուկ տուփի մը մէջ եւ կը գտնուի մեր արխիւներու պահեստին մէջ:
     Այցելեցէք մեր կայքէջը www.arfarchives.org հասցէով: Հոն պիտի տեսնէք թէ՛ նոր լուսանկարներ եւ թէ Հ.Յ.Դ. Արխիւներու Հիմնարկին մասին վաւերագրական ժապաւէն մը՝ 32 վայրկեան տեւողութեամբ:
     Ահաւասիկ նմոյշ մը Համաստեղի ձեռագրէն.-archives 1

Be the first to comment

Leave a Reply

Your email address will not be published.


*