ՎԵՐՋ ԴՆԵԼ ԱՆՄԵՂՆԵՐՈՒ ԿՈՏՈՐԱԾԻՆ ՈՒ ՏԱՌԱՊԱՆՔԻՆ

0 0
Read Time:1 Minute, 49 Second

FFՍ. ՄԱՀՍԷՐԷՃԵԱՆ

Յուլիս 23, 2013

          Օր չանցնիր, որ Միջին Արեւելքի մէջ քանի մը հարիւր զոհ, բազմահազար վիրաւորներ չիյնան` անմիտ, նպատակը կորսնցուցած ու սնանկութեան մատնուած ռազմական գործողութիւններու հետեւանքով:

Իրաք, Եգիպտոս, յատկապէս Սուրիա, երբեմն նաեւ Պահրէյն եւ այլուր` օր աւուր զանգուաբար զոհեր ու վիրաւորներ կ՛իյնան “քաղաքացիական պատերազմ“ անուան տակ կատարուող արիւնահեղութեանց հետեւանքով: Ո՛չ զոհերը, ոչ ալ վերապրողները կը հասկնան, թէ իսկապէս ինչո՛ւ կը սպաննուին, օրապահիկէ կը զրկուին, ապրուստի ահաւոր դժուարութիւններու կը մատնուին, կը պահուին ահ ու դողի եւ անյուսութեան վիճակի մէջ, վաղուան մասին անորոշութիւնն ու մտահոգութիւնները ժամ առ ժամ աւելի՛ կը ծանրանան…:

Յայտարարուած ահաւոր հաշուեկշիռներուն կողքին, կ՛արձանագրուին նաեւ լուսարձակէ հեռու պահուող, բայց աղաղակող ոճիրներ, որոնց հանդէպ խուլ ու կոյր կը ձեւանան այս դէպքերու հոլովոյթին վրայ ազդելու կարող կողմերը, հզօր պետութիւններն ու անոնց դաշնակիցները:

Պահ մը կեդրոնանանք Սուրիոյ վրայ եւ հարց տանք. յայտարարուած կամ չյայտարարուած ի՞նչ նպատակի կը ծառայէ շուրջ հարիւր հազարի կոտորածը, քաղաքներու կործանումը, շուրջ միլիոնաւորներու տնազրկութիւնն ու բռնագաղթը…:

Բացի աւազակներէ` ո՞վ կ՛օգտուի իշխանափոխութեան անունին տակ մղուող պատերազմէն:

Ո՞վ է պատասխանատուն պատահական ճամբորդատարներու վրայ կատարուող զինեալ ու կոյր յարձակումներուն, եւ ի՞նչ նպատակ արդարացնելու համար կ՛ըլլան նման ոճիրներ:

Ի՞նչ տրամաբանութեամբ կը շարունակուին ժողովրդային բնակարաններու կոյր ռմբակոծումները, հրթիռակոծումները (լիբանանցիք ասոնց պատասխանը գիտեն, անոնք ալ սուղ կեանքերով վճարած են աւելի քան 15 տարի…)

Ո՞վ պիտի բացայայտէ Թուրքիոյ պէս “բարեմիտ“ներուն ոճիրները, որոնք կը մնան անլսելի, քողարկուած: Ո՞վ իր մատները պիտի կոխէ աշխարհի աչքին, ըսելու համար, որ Սուրիոյ իշխանութեան ընդդիմադիրներուն նպաստելու համար, Թուրքիա թունաւոր ըմպելիներ եւ ուտեստեղէն “կ՛արտածէ“ դէպի սուրիական քաղաքներ, ուր պաշարման ու մահասփիւռ ճնշումներու տակ, պարզ քաղաքացիք մատնուած են “ջուրը ինկողը օձին կը փաթթուի“ի վիճակին:

Ի վերջոյ, մարդասիրական, ժողովրդավարութեան եւ տակաւին` ինչպիսի՞ ազնիւ նպատակներու անուան տակ կ՛առաջադրուի զէնք առաքել զինեալ խմբակներու, որոնք աղաղակող ու անշպար ապացոյցներ տուած են, թէ կ՛ընեն ու պատրաստ են շարունակելու անմարդկային ոճիրներ, ոտնակոխելու կրօնական, մարդկային եւ քաղաքակրթական ամէն սկզբունք, օրէնք ու արժէք, երկիրը մատնելու խաւարի, դարերով յետադարձի…

Թող ո՛չ ոք փորձէ արդարացնել շարունակուող ոճիրները, այս կամ այն կողմին մատուցուած կամ մատուցելի աջակցութիւնը, այնքան ատեն, որ նման քայլեր պիտի նպաստեն նախճիրներու շարունակման, քանդումի ու աւերումի տարածման:

Եղածը գլած անցած է տրամաբանական ամէն սահման: Վերջակէտ դնելն ու բարեշրջման նպաստե՛լն է իսկական մարտահրաւէրը, վաղուընէ առաջ` այսօր:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles