0
0
Սեպտեմբեր 14-ին, պաշտօնական այցելութեամբ Ֆրանսա գտնուող Հայաստանի Հանրապետութեան վարչապետ Նիկոլ Փաշինեան հանդիպում ունեցած է Ֆրանսահայ կազմակերպութիւններու համակարգող խորհուրդի համանախագահներ Մուրատ Փափազեանի եւ Արա Թորանեանի հետ:
Հանդիպումին մասնակցած են նաեւ Հայաստանի Հանրապետութեան արտաքին գործոց նախարար Զոհրապ Մնացականեան եւ Ֆրանսայի մէջ Հայաստանի դեսպան Յասմիկ Տոլմաջեան: Ֆրանսահայ կազմակերպութիւններու համակարգող խորհուրդի համանախագահները վարչապետին հետ քննարկած են Հայաստանի, Արցախի եւ սփիւռքի մէջ տիրող ընդհանուր իրավիճակն ու ներկայ հոլովոյթները:
Այնուհետեւ վարչապետ Փաշինեանին ներկայացուած է ֆրանսահայ կազմակերպութիւններու համակարգող խորհուրդի գործունէութիւնը: Հանդիպումի ընթացքին ՀՅԴ Բիւրոյի անդամ Մուրատ Փափազեանը եւ Խորհուրդի համանախագահ Արա Թորանեանը շեշտած են, որ կազմակերպութիւնը միշտ գործակցած է Հայաստանի եւ Արցախի իշխանութիւններուն հետ, աջակցած տարաբնոյթ հարցերու մէջ` ոչ պաշտօնական դիւանագիտութեան շրջագիծին մէջ ներկայացնելով Հայաստանի եւ Արցախի շահերը Ֆրանսայի տարբեր քաղաքական եւ իշխանական շրջանակներուն:
Կազմակերպութիւնը մեծ ջանքեր կը գործադրէ նաեւ Ֆրանսայի հայ համայնքի միասնականութիւնը պահպանելու եւ գաղութային կեանքի զարգացումը ապահովելու համար:
Վարչապետ Փաշինեան յայտնած է իր գոհունակութիւնը, որ Ֆրանսայի մէջ առկայ է այդպիսի համախմբուածութիւն, եւ կարեւոր նկատած սփիւռքեան կառոյցներու եւ Հայաստանի իշխանութեան միջեւ գործակցութիւնը` ի շահ համազգային խնդիրներու լուծման:
