ՖՐԱՆՍԱ.- ԲԱՆԱՎԷՃ՝ ԱՏՐՊԷՅՃԱՆԻ ԴԵՍՊԱՆ ԱՄԻՐՊԱՅՈՎ – Հ.Յ.Դ. ԲԻՒՐՈՅԻ ԱՆԴԱՄ ՄՈՒՐԱՏ ՓԱՓԱԶԵԱՆ

0 0
Read Time:3 Minute, 7 Second

1

ՓԱՐԻԶ («Նոր Յառաջ»).- Ապրիլ 7-ին, «Ֆրանս 24»ի պատկերասփիւռի կայանի կազմակերպած ուղիղ եթերով տեղի ունենալիք բանավէճը՝ Ատրպէյճանի դեսպան Էլչին Ամիրպայովի եւ Ֆրանսահայ գաղութի ներկայացուցիչ՝ Հ.Յ.Դ. Բիւրոյի անդամ Մուրատ Փափազեանի միջեւ, ջնջուած էր։ Վերջին պահուն Ազերի դեսպանը մերժած է հանդէս գալ:
Հինգ օր ետք՝ Ապրիլ 12-ին, ի վերջոյ տեղի ունեցաւ այս բանավէճը, հեռատեսիլի նոյն կայանի յայտագրի ծիրին («Վիճարկում») մէջ:
Նախ խօսք առնելով Ատրպէյճանի դեսպանը, պնդեց, թէ Հայաստանի իր պաշտօնակիցը մերժած է վիճարկել իր հետ, բայց ինք առիթը չմսխելու համար ընդունած է այս հրաւէրը, «քանի, պէտք է վերահաստատել իրականութիւնը, ի տես՝ Ֆրանսայի հայկական լոպիին ապատեղեկատուական ծաւալուն քարոզչութեան»: Պատասխանելով լրագրողուհիին հարցումին, ըսաւ թէ 1994էն ի վեր հրադադարի այս ծանր խախտումը տեղի ունեցաւ որովհետեւ «Ատրպէյճանի պատկանող հողերուն վրայ (Արցախ եւ շուրջի շրջանները) կը գտնուին, օտար՝ Հայաստանի ուժերու գրաւման տակ»: Աւելցուց, թէ հայկական կողմն է, որ սկսած է վերջին յարձակումները, նպատակ ունենալով ընդարձակել «իր գրաւած հողերը» եւ «շարունակել ցեղային մաքրագործումը»: Այս առթիւ յիշեց Հայերու «գործած Խոճալուի ցեղասպանութիւնը»:
Իր կարգին Մուրատ Փափազեան ըսաւ, որ փափաքած է մասնակցիլ այս վիճարկումին, հերքելու համար Ազէրպայճանի ստայօդ քարոզչութիւնը: Ըսաւ, թէ նոր չէ, որ հրադադարի խախտում տեղի կ՚ունենայ, այլ՝ 1994ին անոր հաստատումէն ի վեր Ատրպէյճան ամէն տարի հազարաւոր անգամներ կը խախտէ այդ հրադադարը: Ամբաստանեց այդ երկիրը, որ կը մերժէ շփման գիծին վրայ հրադադարի խախտումները արձանագրող ելեկտրոնային սարքերու զետեղումը: Յիշեց, որ Արցախ պատմականօրէն հայկական հող եղած է եւ 1923ին Սթալինի կողմէ յանձնուած է Ազէրպայճանին: Փափազեան յիշեց նաեւ Արցախի ինքնորոշման օրերուն Ազերիներու գործած ջարդերը:
Երբ լրագրողուհին պնդեց, թէ Լեռնային Ղարաբաղը վարչականօրէն, միջազգային հանրութեան ակնոցով՝ ատրպէյճանական հող է, Փափազեան բացատրեց, թէ 1994ին ստեղծուած Մինսքի խումբի առաքելութիւնը այդ հարցին լուծում գտնելն է: Ըսաւ, թէ այդ թուականէն ի վեր, Ազէրպայճան կը մերժէ առաջարկուած խաղաղութեան բոլոր ծրագիրները:
Ապա, լրագրողուհին Ամիրպայեւին հարցուց թէ ի՞նչ կը մտածէ այն պնդումներուն մասին, ըստ որոնց Ատրպէյճան կը փորձէ հրահրել հակամարտութիւնը, երկրին ընկերա-տնտեսական հարցերը քօղարկելու համար, «քանի ծանօթ է, որ նախագահ Ալիեւ մեծ ժողովրդավար մը չէ»: Դեսպանը բնականաբար հերքեց այդ վարկածը, աւելցնելով թէ կատարեալ ժողովրդավարութիւն գոյութիւն չունի եւ թէ այդ մասին դասեր ստանալու նպատակ ալ չունին: Պնդեց, թէ գոյավիճակը լուծում մը չէ եւ թէ Մինսքի խումբի համանախագահ երեք երկիրներն ալ համաձայն են ատոր եւ թէ Արեւմուտքը իրենց կողքին է: Առիթէն օգտուելով, լրագրողուհին հարց տուաւ, թէ արդեօք ատոր ետին շահեր թաքնուած չե՞ն, ինչպէս նաւթը, կազը, եւլն.: Բայց ըստ Ամիրպայեւի այդ զօրակցութեան միակ պատճառը՝ միջազգային օրէնքներու յարգանքն է:
Ապա, որպէս լուծում, Մուրատ Փափազեան ըսաւ, թէ միջազգային հանրութեան հովանիին տակ՝ Արցախի մէջ պէտք է կազմակերպել ինքորոշման հանրաքուէ մը:
Ապա, երբ վերջինս սկսաւ քննադատել Ալիեւի վարչակարգը, յիշելով ապաժողովրդավար վարչութիւնը, Ալիեւի ընտանիքին «Փանամա Փէյփըրզ»ի գայթակղութեան առընչութիւնը, իր մենատիրական համակարգին համայն աշխարհի քննադատութեան արժանանալու երեւոյթը, Ամիրպայեւ ալ հակադարձելով ըսաւ, թէ այդ պնդումները առաւելաբար ի զօրու են Հայաստանի վարչակարգին համար, որ «անձնասպանական քաղաքականութիւն կը վարէ, վկայ՝ երկրին հայաթափումը»:
Պատասխանելով Մուրատ Փափազեանի ինքնորոշման հանրաքուէով լուծումի առաջարկին, ազէրի դեսպանը ըսաւ թէ ատիկա անընդունելի է, քանի որ «այդ հողերը մաքրագործուած են Ազէրիներէ եւ հիմա հոն նման հանրաքուէ կազմակերպելը չի համապատասխաներ միջազգային օրէնքներուն»: Եւ սպառնական ոճով աւելցուց, թէ «այսօր այլեւս 1992 թուականին չենք գտնուիր, այլ՝ 2016ին, եւ Ատրպէյճան աւելի երկար ժամանակ պիտի չհանդուրժէ իր հողերը գրաւուած տեսնելու»: Ըստ Ամիրպայեւի, հայկական ուժերը պէտք է հեռանան Ղարաբաղէն, ապա պէտք է ապահովել «մէկ միլիոն ազերիի վերադարձը իրենց հողերը»:
Վերջաւորութեան, ազերի դեսպանը անգամ մը եւս ընդգծեց, թէ իր երկիրը երբեք պիտի չյօժարի Արցախի իշխանութեանց հետ բանակցութեան սեղան նստելու, Մուրատ Փափազեան ալ վճռական կերպով յայտարարեց, թէ Արցախ այլեւս երբեք պիտի չընդունի վերադառնալ ազէրպայճանական լուծին ներքեւ, քանի, որ «10 օր առաջ տեսանք, թէ ատրպէյճանական բանակը ինչ ձեւով ուզեց մաքրագործել Ղարաբաղը»:
Մուրատ Փափազեան ըսաւ նաեւ թէ իր մօտ ունի վերջին դէպքերուն առընչութեամբ ազէրպայճանի պատասխանատւութիւնը ապացուցող փաստեր եւ թէ զանոնք պիտի յանձնէ լրագրողուհիին:
Որպէս եզրակացութեան խօսք, լրագրողուհին ալ ըսաւ, թէ Ատրպէյճան իր կողքին ունի Թուրքիան, իսկ Հայաստանը՝ Ռուսաստանը եւ այս երկու երկիրներու յարաբերութիւններն ալ տագնապի շրջան մը բոլորելով՝ ա՛լ աւելի կը բարդանայ խնդրին լուծումը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles