ՖԻԼԱՏԵԼՖԻԱ.- Հինգշաբթի, 12 Մայիսի յետմիջօրէին, տեղի ունեցաւ Արեւելեան Թեմի Ազգային Երեսփոխանական Ժողովի բացումը,  կազմակերպութեամբ Սուրբ Գրիգոր Լուսաւորիչ եկեղեցւոյ։ Այս տարուան ժողովի բնաբանն է՝ «Հիմքերը ուժեղացնել ապագայի համար»։ Հոգեւորականաց համագումարը տեղի ունեցաւ Չորեքշաբթի, 11 Մայիսին: Ժողովը իր դիւանը ընտրեց, յանձին Արամ Սարաֆեանի եւ Ճանէթ Հարոյեանի (ատենապետներ), Գերպ. Տ. Պօղոս Ծ. Վրդ. Թինքճեանի (հայերէնի ատենադպիր) եւ Նայիրի Պետրոսեանի (անգլերէնի ատենադպիր)։ Սուրբ Գրիգոր Լուսաւորիչ եկեղեցւոյ հոգեւոր հովիւ՝ Արժպ. Տ. Ներսէս Ա. Քհն. Մանուկեան, եւ հոգաբարձութեան ատենապետ՝ պրն. Մայքլ Ինճէեան, բարի գալուստ մաղթեցին բոլոր ներկաներուն։ Ն.Ս.Օ.Տ.Տ. Արամ Ա. նախապէս տեսագրուած պատգամ մը ուղղեց ժողովականներուն, որուն ընթացքին շեշտեց թէ Եկեղեցին պարզ կազմակերպութիւն չէ, այլ առաքելութիւն, զոր կ՚իրագործէ ժողովուրդին հասնելով։ Այսպէս է, որ Ազգային Առաջնորդարանի ծրագիրներուն կիզակէտը համայնքն է, որուն ուղղուած է մարտահրաւէրը՝ «Ինչպէ՞ս կարելի է աւելի նշանակալից, աւելի ուժական եւ աւելի ազդեցիկ դարձնել այս փոխյարաբերութիւնը»։ Հոգեւորականներու դերն է Եկեղեցին իր պատերէն դուրս հանելով՝ ժողովուրդին բերել է, եւ համայնքին ուղղուած հովուական առաքելութիւնն ու ընկերային ծառայութիւնը Եկեղեցին կը դարձնեն ապրող իրականութիւն մը ժողովուրդի կեանքին մէջ։