ՔԱՐԻՒՂԻ ԿՈՂՔԻՆ…ԼՌՈՒԹԻՒՆՆ ԱԼ ՈՍԿԻ Է

0 0
Read Time:2 Minute, 12 Second

ARTSAKH

ՀԱՅՐԵՆԻՔ
Խմբագրական
Ապրիլ 19, 2016

Ինչպէ՞ս բացատրել Պաքուի լռութիւնը…այդ երկար լռութիւնը, Արցախեան չորսօրեայ պատերազմէն աւելի քան երկու շաբաթ ետք:
Նախայարձակն էր Պաքուն, որ ամիսներէ ի վեր արդէն իսկ, խախտած էր զինադուլը:
Ի դէպ, ցայսօր կրակոցներն ու մերթ ընդ մերթ ռմբակոծումները կը շարունակուին…իրավիճակ մը, ուր կարելի է հաստատել թէ ռազմաճակատին վրայ լռութիւնը միշտ ալ կը խախտի:
Վերը նշուած լռութիւնը, յատկապէս քաղաքական բնագաւառին համար է որ լուսարցակի տակ կ՛առնուի:
Պահ մը եթէ բաղդատենք, Պաքուի այս լռութիւնը չորսօրեայ պատերազմին եւ անոր յաջորդող անմիջական օրերուն, Հայաստանի Հանրապետութեան պաշտպանութեան նախարարի բանբեր Արծրուն Յովհաննիսեանի հետեւողական զեկուցումներուն եւ յայտարարութիւններուն, իսկապէս լեռ ու ձոր (Արցախեան բնութեան իսկական պատկերէն ներշնչուած…) գոյութիւն ունի: Պարզ ու մեկին, բացակայ են Ատրպէյճանի պաշտպանութեան նախարարութիւնն ու բանբերը, երեւոյթ մը որ կը զայրացնէ տեղացին, եւ յատկապէս այն ազերին, որուն անմիջական թէ հեռաւոր պարագան ռազմաճակատի վրայ կը գտնուի: Բնականաբար կ՛ընդվզի նոյնինքն ազերի բանակայինը, նկատելով թէ իրականութիւնն ու ճշմարտութիւնը կը ծածկուին: Մինչդեռ հայրենի կողմը, յանձին բանբեր Արծրուն Յովհաննիսեանի հետեւողական ձեւով, ժամ առ ժամ կատարեց փոխանցումներն ու տեղեկութիւնները: Հաւանաբար, բանբերին համար դժուար եղաւ գուժելն ու ազգին համար զոհուած եւ ռազմաճակատին վրայ, իբրեւ հերոս զոհուած՝ նոր «Քաջն Վարդան»ներու անունները: Սակայն, այս թափանցիկութիւնն է որ, լռութեան մատնեց թէ՛ օտար եւ թէ՛ տեղացի դէտեր:
Ամէնայն ճշգրտութեամբ եւ մանրամասնութեամբ Արծրուն Յովհաննիսեան կատարեց եւ դեռ ալ կը կատարէ իր պաշտօնը:
Արծրուն Յովհաննիսեանի համար, ահաւոր պարտականութիւն է պարզել ազերի բանակին կատարած անմարդկային չարչարանքներն ու անդամահատումները, նահատակուած քանի մը հայ զինուորներուն, որոնք մինչեւ վերջին փամփուշտ պայքարած էին՞:
Նոյնքան դժուար է պաշտպանութեան նախարարի բանբերին ստանձնած գործը, որքան ռազմաճակատի յառաջացած դիրքերու վրայ հրամանատարին պաշտօնը:
Այս գծով, Ատրպէյճանի ընդդիմադիր ճակատի ղեկավար՝ Ալի Քերիմլիի դժգոհած է, որ իր երկրի պաշտօնական շրջանակներն ու ղեկավարութիւնը ժողովուրդէն կը պահեն հայկական կողմի հակահարուածներուն պատճառով սպաննուած ատրպէյճանցի զինուորներու թուական պատկերն ու իսկական քանակը: Ստիպողաբար, կիսատ պրատ տեղեկութիւններ տեղադրուած ու ձեռք բերուած են ընկերային ցանցերու վրայ եւ փաստօրէն ցայսօր յստակ չէ թէ հայրենի հարիւրի (ներառեալ անմեղ բնակիչներ) հասնող զոհերուն դիմաց, Ատրպէյճանի զոհերը հարի՞ւրը կը գերազանցեն թէ հազարը…կամ նոյնիսկ երկու հազարը:
Հաւանաբար այս դարձ-դարձիկ եւ ոչ-թափանցիկ քաղաքականութեան արդիւնքն է Ֆրանսայի մօտ, Ատրպէյճանի դեսպան Էլչին Ամիրպայովի բանավէճին շուրջ ստեղծուած թնճուկը: Արդարեւ, չորսօրեայ պատերազմի վաղորդայնին, տեղական
պատկերասփիւռի կայանի մը կազմակերպած ուղիղ եթերով տեղի ունենալիք բանավէճին՝ Ատրպէյճանի դեսպանը մերժած էր բեմահարթակ բարձրանալ, վիճաբանելու համար Ֆրանսահայ գաղութի ներկայացուցիչ՝ Հ.Յ.Դ. Բիւրոյի անդամ Մուրատ Փափազեանի հետ:
Միայն հինգ օր ետք՝ Ապրիլ 12-ին, ի վերջոյ…հաւանաբար ստոյգ խայտառակ կացութենէ դուրս գալու համար, դեսպան Ամիրպայով ներկայացաւ այս դէմ առ դէմ բանավէճին, ու բաւական մը անվստահութիւն ներշնչելով, սպասուածին նման անգամ մը եւս Խոճալուի շինծու ջարդը արծարծեց:
Հաւանաբար, այս պարագային եւ ընդհանրապէս ներկայ իրադարձութիւններու լոյսին տակ, աւելի լաւ պիտի ըլլար որ Պաքուն լռե՛ր…ի վերջոյ քարիւղի կողքին լռութիւնն ալ ոսկի է:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Մ.Ա.Կ.Ը ԵՒ ԿԱՄԱՒՈՐ ԿՈՅՐ  ԱՐԴԱՐՈՒԹԵԱՆ ՋԱՏԱԳՈՎ ՄԵԾԵՐԸ   ԱՇԽԱՐՀԸ ԿԸ ՏԱՆԻՆ ԱՀԵՂ ՄԵԾ ՊԱՏԵՐԱԶՄԻ
Next post Փիթըր Պալաքեան՝ «Փուլիցըր» Մրցանակակիր

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles