0
0
Կիրակի, Փետրուար 19-ի երեկոյեան տեղի ունեցաւ Հ․Յ․Դ․ 132 ամեակի տօնակատարութիւնը, Կլենտէյլի «Ալէքս» սրահին մէջ: Ներկայ էին 1300 հայորդիներ, որոնց կարգին ազգային, եկեղեցական – հասարակական կազմակերպութիւններու ներկայացուցիչներ եւ համայնքի անդամներ:
Ձեռնարկը սկսաւ Հ․Մ․Ը․Մ․-ի սկաոտական կազմի տողանցքով։ Միացեալ Նահանգներու, Հայաստանի եւ Արցախի քայլերգներէն ետք, «Մշակ Բանուոր»-ի ունկնդրութեամբ Հ․Յ․Դ․-ի դրօշը տեղադրուեցաւ բեմին վրայ:
Օրուայ հանդիսավարն էր Կարօ Մատենլեանը, որ բացման խօսքէն ետք, բեմ հրաւիրեց Հայ Երիտասարդաց Դաշնակցութեան ներկայացուցիչ՝ Նարեկ Կիւմճեանը, որ պատշաճ կերպով ներկայացուց երիտասարդ սերունդին պարտականութիւնը։
Ապա բեմ հրաւիրուեցաւ օրուան բանախօսներէն՝ Ա․Մ․Ն․ Հայ Դատի Գրասենեակի գործադիր տնօրէն՝ Արամ Համբարեանը, որ իր կարգին անդրադարձաւ ներկայ իրավիճակին եւ Հայ Դատի կատարած եւ կատարելիք աշխատանքներուն։
Հ․Յ․Դ․ Արեւմտեան Ա․Մ․Ն․-ի Կեդրոնական Կոմիտէի ներկայացուցիչ՝ Տարօն Տէր Խաչատուրեան փոխանցեց շրջանի մարմնին խօսքը, նշելով ներկայ ահազանգային վիճակը Հայաստանի եւ յատկապէս Արցախի մէջ։
Ապա, «զում»-ի դրութեամբ խօսք առաւ Հ․Յ․Դ․ Հայաստանի Գերագոյն Մարմնի Ներկայացուցիչ Իշխան Սաղաթէլեան։
Թեմի Առաջնորդ Սրբազան Թորգոմ Տօնոյեան, իր սրտի խօսքը փոխանցեց հանրութեան:
Գլխաւոր բանախօսն էր Հ․Յ․Դ․ Բիւրոյի ներկայացուցիչ՝ Յակոբ Տէր Խաչատուրեան, որ յայտնեց, թէ հակառակ Հայաստանի ներկայ ղեկավարութեան արձանագրած բացթողումներուն, Հ․Յ․Դ․-ի պարտականութիւնն է շարունակել պայքարը, փրկելու համար Արցախն ու Հայաստանը։
Յատուկ յիշատակութեամբ մը, նշուեցան անցնող տարուայ ընթացքին, Հ․Յ․Դ․ Արեւմտեան Ամերիկայի ընտանիքէն առյաւէտ բաժնուած ընկերներուն անունները:
Ապա, տեղի ունեցաւ պատանեկան միութեան շարքերը միացող պատանիներու երդման արարողութիւն, կնքահայրութեամբ Հայ Դատի Գրասենեակի գործադիր տնօրէն՝ Արամ Համբարեանի։
Գեղարուեստական յայտագրով, Դրօ Գրիգորեան, ընկերակցութեամբ Արա Տաբաղեանի, երկու յեղափոխական երգեր մատուցեց ներկաներուն: Տոհմիկ երգերով եւ պարերով հանդէս եկաւ «Լեռնազանգ» համոյթը։ Աւարտին, յեղափոխական երգերու անզուգական մեկնաբան՝ Գառնիկ Սարգսեանի յեղափոխական երգեր կատարեց, որոնց ընկերակցեցոն նաեւ պատանիները: Յայտագիրը փակուեցու «Արիւնոտ Դրօշ»ով:
Հ․Յ․Դ․ Արեւմտեան Ամերիկայի նորագիրներուն Երդման արարողութիւնը տեղի ունեցաւ Փետրուար 18-ին, Դաշնակցութեան ծրագրած եւ գործադրած «Նեմեսիս» գործողութեան գործիչ՝ Երուանդ Ֆունտուքեանի շիրիմին շուրջ, Ուիթիըրի Rose Hills գերեզմանատան մէջ:
Ֆունտուքեան գործակցած էր Միսաք Թորլաքեանի հետ, որ արդարահատոյց հարուածը տուած էր Հայոց ցեղասպանութեան ընթացքին Պաքուի հազարաւոր հայերու ջարդերուն կազմակերպիչ Պէյպուտ Խան Ճիվանշիրին:
Յայտագիրը սկսաւ մէկ վայրկեան լռութեամբ, յարգելու յիշատակը դաշնակցական բոլոր նահատակներուն:
Ներկաներուն կողմէ Հ.Յ. Դաշնակցութեան քայլերգ «Մշակ, բանուոր»-ի երգեցողութենէն ետք Նորագիրներու դաստիարակչական յանձնախումբին կողմէ Հրայր Շերիքեան կատարեց բացման խօսքը, ուր շեշտեց. «Թող ընկ. Երուանդ Ֆունտուքեանի ու իր նման հազարաւոր դաշնակցական գործիչներուն եւ ֆետայիներուն նուիրումն ու զոհողութիւնը մեր գերագոյն նպատակի իրագործումին ճանապարհին ըլլան միտքերու խթան, ամրոցներ, մեկնակէտեր եւ ինքնավստահութեան աղբիւր ու ներշնչում մեր նոր սերունդներուն եւ մասնաւորաբար մեր այս խումբին»:
Երուանդ Ֆունտուքեանի կենսագրականը ներկայացուց իր եղբօր թոռ՝ Ալիս Անմահունի Ֆունտուքեանը:
Օրուան հանդիսավարն էր Համլեթ Չրախչեանը, որ իր խօսքը ուղղելով թեկնածուներուն ըսաւ. «Դուք եթէ Դաշնակցութեան Ծրագիրով, Կանոնագիրով եւ անգիր օրէնքներով էք առաջնորդուելու, դժուար ճանապարհ էք ընտրել եւ պէտք է լաւ մտածէք: Մարդ նման սուրբ նպատակների համար մէկ անգամ երդում կուտայ եւ իր ամբողջ կեանքի ընթացքում հաւատարիմ կը մնայ դրան: Երդումը, խոստանալը մարդու նկարագիրը ցոյց կուտան. լուրջ եւ պատասխանատու մարդը, ինչ որ լինեն դժուարութիւնները, հաւատարիմ է մնում իր սկզբունքներին, իր գաղափարներին ու իր տուած երդումին: Ուզում եմ մի բան պահանջել ձեզանից. ձեր երդումին հետ, ձեր մտքերում թող հաստատուի այն, որ ձեր կուսակցական կեանքում ձեր եսը, ձեր անձը աւելի կարեւոր չէք նկատելու: Դաշնակցութիւնը չի ներելու նոյնիսկ այն դաշնակցականներին, որոնք հերոսներ էին, ժողովրդի կողմից պաշտուած մտաւորականներ, դաշնակցական Կանոնագրով, որը մէկ հատ է եւ որուն հետեւում են աշխարհի դաշնակցական մեր բոլոր կառոյցները: Ձեզ յաջողութիւն եմ մաղթում երկար դաշնակցական կեանքում»:
Հանդիսավարը յայտարարեց որ երդուողներու այս տարուան խումբը կը կոչուի «Երուանդ Ֆունտուքեան» սերունդ ու ներկայացուց թեկնածուներուն ցանկը:
Ապա ներկաները հետեւեցան Հայաստանէն Համբիկ Սասունեանին ձայնագրուած պատգամին։ «Պատիւ պէտք է ըլլայ բոլորիս, իւրաքանչիւր դաշնակցականի համար ծառայել, որ սուրբ է: Կը ծառայենք եւ կը հետեւինք գաղափարի եւ ո՛չ թէ անձի. մեզի համար ո՛չ մէկ բան սուրբ է բացի ազգէն, հայրենիքէն եւ արդարութենէն», ըսաւ ան:
Հ․Յ․Դ․ արեւմտեան Ամերիկայի Կեդրոնական կոմիտէի խօսքը յղեց Լաուրա Յակոբեան, շեշտելով, թէ. «Դաշնակցականների մէջ ես գտայ ազգասիրութիւն, նուիրում, պատասխանատւութիւն, անկեղծ ընկերական սէր, անձնազոհութիւն, հաւաքականութիւն, անվախութիւն: Դաժան ու դժուար էր մեր ճանապարհը, բայց փառաւոր, որովհետեւ մենք պայքարում էինք կեանքի համար՝ ապրելու եւ ապրեցնելու համար: Հիմա էլ ոչինչ չի փոխուել: Զգուշացնում եմ. ներկայ պայմաններում դժուար է դաշնակցական մնալը, քանի որ պայքարը ո՛չ միայն արտաքին թշնամու դէմ է, այլեւ ապազգային իշխանութիւնների:․․․Հ․Յ․Դ․-ն միշտ անելիք ունի. մենք անելիք ունենք Սփիւռքում, Հայաստանում, Արցախում, Ջաւախքում, արեւմտեան Հայաստանում, այնտեղ ուր հայ կայ»:
Հ․Յ․Դ․ Բիւրոյի ներկայացուցիչ ընկ. Յակոբ Տէր Խաչատուրեան իր խօսքին մէջ ըսաւ․ «Պէտք է գաղափարապէս ըլլաք ամուր, կամքով հզօր եւ ձեր նուիրումի փաստը ունենաք, բայց նոյնքան եւ աւելի դժուար է դաշնակցական մնալ, որովհետեւ ձեր հաւատքը եւ պնդութիւնը շարունակաբար պիտի ենթարկուի փորձութեան. եւ պէտք է մնաք ամուր ու հաստատակամ, որովհետեւ մեր պայքարը արդար է եւ ձեր մղումը ամբողջովին մաքուր ու անբիծ:․․Ուր որ ալ գտնուի, ինչ երդիքի տակ ալ գործէ, Հ.Յ. Դաշնակցութիւնը կը կերտէ այնպիսի նկարագիր ու այնպիսի հայու կերպար, որ նոյնն է աշխարհով մէկ, որ նուիրուած է իր ժողովուրդի դատին, որ իր ամբողջ էութեամբ եւ հիմնականին մէջ կամաւոր սկզբունքներով կը պայքարի իր ժողովուրդի արդար իրաւունքներուն համար ու շարունակաբար պայքարելու է մինչեւ որ բոլորս միասին իրականացնենք մեր մեծ երազը, կերտելով ազատ, անկախ եւ միացեալ Հայաստանը»:
Երդման արարողակարգը աւարտեցաւ «Վէրքերով լի» յեղափոխական երգով եւ օրուան կնքահայրին ու նոր երդուածներուն կողմէ, Երուանդ Ֆունտուքեանի շիրիմին վրայ ծաղիկներ զետեղելով:
