0
0
Կիրակի, Մայիս 6-ի յետմիջօրէին, Սուրբ Վարդանանց եկեղեցւոյ սրահին մէջ, Փրովիտենսի «Քրիստափոր» կոմիտէութիւնը նշեց Հայաստանի անկախութեան 100-ամեակը: Օրուան դասախօսներն էին Ա.Մ.Ն. Արեւելեան շրջանի Հ.Յ.Դ. Կեդրոնական Կոմիտէի ներկայացուցիչ Ճորճ Աղճայեան եւ տեղւոյն Հ.Օ.Մ.-ի «Անի» մասնաճիւղի ներկայացուցիչ Թալին Կեցոյեան:
Աղճայեան անդրադարձաւ Հ.Յ.Դ. արխիւներու մասին եւ ներկաներուն ցոյց տուաւ վերջերս ի յայտ եկած լուսանկարներ եւ նամակներ, որոնց կարգին Արամ Մանուկեանէն եւ Միացեալ Նահանգներու մօտ Հայաստանի դեսպան Արմէն Գարոյէն:
Թալին Կեցոյեան անդրադարձաւ Հ.Օ.Մ.-ի կատարած գործունէութեան մասին, ցուցադրելով սահիկներ եւ կարճ վաւերագրականներ Երեւանի թիւ մէկ հիւանդանոցի մասին: Ան տեղեկացուց, թէ յատուկ արդի կազմածներով կ՛օժտուի այս հիւանդանոցը: «Մեր մարտունակ զինուորներուն կողքին պէտք է որ կենանք եւ ամէն գնով օժանդակենք», եզրակացուց Կեցոյեան: Նշենք, թէ Մայիս 28-ին յատուկ համերգով մը պիտի նշուի Մայիս 28-ի հարիւրամեակը, մասնակցութեամբ Րոտ Այլընտի եւ Ուսթըրի երգչախումբին, ղեկավարութեամբ Կոնստանդին Պետրոսեանի:
