ՓՈՒԹԻՆԻՆ ՄԱՐԱԹՈՆԸ

0 0
Read Time:1 Minute, 51 Second

rohani putin aliyev 2

ՀԱՅՐԵՆԻՔ
Խմբագրական
Օգոստոս 10, 2016

Իւրայատուկ է Ռուսաստանի ղեկավար՝ Փութինին կատարած մարաթոնը:
Թէ՛ աշխարհագրականօրէն եւ թէ՛ իր բնագաւառով հեռու, այս օրերուն բոլորին կիզակէտը հանդիսացող Ռիօ Տը ժանէյրոյի Ողիմպիական Խաղերէն:
Փութինին մարաթոնը քաղաքական բեմահարթակին վրայ կը կատարուի:
Վազք, անդադար վազք՝ տարաշրջանէն ներս, զանազան ղեկավարներու հետ տեսակցութիւններ կատարելով:
Երկուշաբթի, Օգոստոս 8-ին Պաքուի մէջ, եռակողմանի հանդիպում՝ Ատրպէյճանի եւ Իրանի նախագահներ՝ Իլհամ Ալիեւի եւ Հասան Ռոհանիի հետ: Ապա, վերադարձ Մոսկուա եւ յաջորդ օրն իսկ տեսակցութիւն Թուրքիոյ նախագահ Ռէճէպ Թայիպ Էրտողանի հետ: Այս երկար մարաթոնին աւարտին՝ Չորեքշաբթի,
Օգոստոս 10-ին, հանդիպում՝ Հայաստանի նախագահ Սերժ Սարգսեանի հետ:
Հայաստանի Հանրապետութեան Արտաքին Գործոց նախարարութեան տեղակալ Շաւարշ Քոչարեան, այս հանդիպումներու լոյսին տակ, յաւելեալ մանրամասնութիւններ փոխանցելով, յայտնեց թէ այս տեսակցութիւններուն ընթացքին, Արցախի հիմնահարցը չէ եղած, արծարծուած կարեւորագոյն կիզակէտներէն մէկը:
Այս Փութինեան հանդիպումներու մարաթոնին ամենէն աւելի փրոթոքոլային բնոյթ ունեցող տեսակցութիւնը՝ Թուրքիոյ նախագահ Էրտողանին հետն էր: Պարզապէս յետ-Նոյեմբերեան՝ Սուրիոյ սահմանէն ներս վար առնուած «Սուխոյ» ռմբաձիգէն ետք ստեղծուած պաղութենէն եւ բեւեռացումէն ետք ձիւնհալ՝ «մինի-կլասնոսթ» մը, շրջանային մաշտապով: Հաւանաբար խօսակցութիւններէն աւելի, ցուցադրուեցան լրագրողներու ոսպնեակներու ետին կանգնող ժպտերես դէմքերն ու ձեռնուող տիպարները:
Պաքուի մէջ կատարուած հանդիպումը եռակողմանի էր: Յաւելեալ մանրամասնելով, առաջին հերթին Փութին տեսակցեցաւ Իրանի եւ ապա Ատրպէյճանի իր պաշտօնակիցներուն հետ: Այս անհատաբար կատարուած հանդիպումներէն ետք, կատարուեցաւ եռանդամ նիստը, որմէ ետք, ստորագրուեցաւ հռչակագիր մը:
Առաջին անգամն էր որ նմանօրինակ եռանդամ տեսակցութիւն մը, կը կատարուէր Հայաստանի սահմանակից երկիրներու կողմէ: Ընթացք մը, որ պիտի շարունակուի յառաջիկային, եւ այս գծով Իրան նոյնիսկ պատրաստակամութիւն յայտնած է կատարելու հանդիպումը:
Այս հռչակագրին մէջ նշուած էր թէ, երեք երկիրները պիտի գործակցին տնտեսական, առեւտրական եւ ապահովական բնագաւառներէն ներս: Կասպից Ծովի շրջանէն ներս, անոնք շեշտեցին թէ, ամէն գնով պիտի պայքարին մաքսանենգներու եւ ահաբեկչական կազմակերպութիւններու դէմ:
Այս տեղեկութիւններուն կողքին, հռչակագրին մէջ նաեւ տեղ գտած էր Արցախի հետ առնչուող, այն հաստատումը, թէ տարածաշրջանին մէջ առկայ հակամարտութիւնները էական խոչընդոտ են տարածաշրջանային համագործակցութեան դիմաց, եւ պէտք է որ դասաւորուի այս հարցերու շուտափոյթ կարգաւորումն ու լուծումը: Հոս, տեղին է շեշտել Իրանի նախագահին մէկ այն հաստատումը թէ հարցեր կարելի չէ լուծել ռազմական արկածախնդրութիւններով:
Թէ ինչպէ՞ս աւարտեցաւ Փութինի քաղաքական բեմահարթակի մարաթոնին աւարտի հանդիպումը՝ Հ.Հ. նախագահին հետ: Արդե՞օք նախանցեալ երկու օրերու տեսակցութիւններու լոյսին տակ, պատրաստուած էր յատուկ գործընթաց:
Մէկ բան յիշատակելի է, թէ Փութին – Սարգսեան հանդիպումը պարզ զուգադիպութեամբ մը, տեղի ունեցաւ Սեւրի Դաշնագրին (1920) օրը՝ Օգոստոս 10-ին, ուր պաշտօնապէս յայտարարուած էր Օսմանական Թուրքիոյ պարտութիւնը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

One thought on “ՓՈՒԹԻՆԻՆ ՄԱՐԱԹՈՆԸ

  1. Having heard all said above regarding Putin’s Marathon, we didn’t hear anything concrete about the main agenda of the meetings plus the geopolitical, economical and the security impact of it on Armenia/Artzakh. The news was very trimmed of expected substance, quality. Thanks though

Leave a Reply

Your email address will not be published.

Social profiles