Փելոսիի  Այցելութիւնը` Հայաստան

0 0
Read Time:5 Minute, 35 Second

Ա․Մ․Ն․-ի Ներկայացուցիչներու տան նախագահ Նենսի Փելոսի ացեալ շաբաթավերջին այցելեց Երեւան եւ շփումներ ունեցաւ տեղւոյն ղեկավարութեան հետ։

Փելոսիի գլխաւորած պատուիրակութեան մաս կը կազմէին Քալիֆորնիա նահանգէն հայկական արմատներ ունեցող քոնկրէսական Ճեքի Սփիրը եւ Ներկայացուցիչներու տան ուժանիւթի եւ առեւտուրի հարցերով յանձնախումբի նախագահ Ֆրանք Փըլոն:

Ատրպէյճանի կողմէ Հայաստանի վրայ կատարուած յարձակումներու մթնոլորտին մէջ տեղի ունեցաւ այս այցելութիւնը, որ ձեւով մը Ուաշինկթընի կողմէ Երեւանի ի նպաստ ամենաբարձր մակարդակի վրայ արտայայտուած զօրակցութեան մը դրսեւորումը կարելի է համարել։ Փելոսի ընդունուեցաւ Հայաստանի վարչապետ Նիկոլ Փաշինեանի կողմէ, որու հետ տարածաշրջանային անվտանգութեան գործընթացներուն վերաբերեալ արժեւորում մը կատարեց։

Փելոսի նշեց, որ Միացեալ Նահանգները առանցքային տեղ կը գրաւեն Հայաստանի տնտեսական կեանքի մէջ: Ան շնորհակալութիւն յայտնեց Սեպտեմբեր 14-ի երեկոյեան Միացեալ Նահանգներու միջնորդութեամբ ձեռք բերուած փխրուն զինադադարի համաձայնութեան համար, ինչպէս նաեւ երախտագիտութիւն յայտնեց Միացեալ Նահանգներու իշխանութեան, ներառեալ բազմաթիւ քոնկրեսականներու` վերջին զարգացումներուն հասցէական գնահատական տալու համար: Ան շեշտեց, թէ Ուաշինկթըն պիտի շարունակէ աջակցիլ Հայաստանի տարածքային ամբողջականութեան։

Վարչապետ Փաշինեանի հետ ունեցած հանդիպման առընթեր, Նենսի Փելոսի հիւրընկալուեցաւ Հայաստանի Ազգային ժողովի նախագահ Ալէն Սիմոնեանի կողմէ։ Ան յարգանքի այցելութիւն մը տուաւ Ծիծեռնակաբերդի յուշահամալիրը՝ ընկերակցութեամբ Սիմոնեանի եւ խորհրդարանի փոխ-նախագահ եւ հայ-թուրք յարաբերութիւններու վերամշակման պատասխանատու Ռուբէն Ռուբինեանի։ Հայաստանի խորհրդարանէն ներս Փելոսի եւ Սիմոնեան սարքեցին համատեղ մամլոյ ասուլիս մը։

«Շատ յուզիչ էր: Մենք իմացանք սոսկալի ճշմարտութիւնը, զոր թանգարանին մէջ մեզի ներկայացուցին։ Սակայն վէրքերը ամոքելու համար աշխարհը պէտք է ճանչնայ այն ոճրագործութիւնը, որ ոչ այլ ինչ էր, քան ցեղասպանութիւն: Ցեղասպանութեան ուղղութեամբ մեր ջանքերը պէտք է շարունակուին, որպէսզի նման ոճրագործութիւններ երբեւէ չըլլան: Մենք երբեք չենք կրնար զայն մոռնալ», ըսաւ Փելոսի: Ան յիշեցուց, որ քոնկրէսական էտըմ Շիֆ 2019-ին ներկայացուցած է բանաձեւ, որ ո՛չ միայն կը դատապարտէր Հայոց ցեղասպանութիւնը, այլ նաեւ պատմութիւնը ջնջելու ջանքերու դէմ էր: «Մենք կը մերժէինք բոլոր այն քայլերը, որոնցմով Միացեալ Նահանգներու կառավարութիւնը կրնար ցեղասպանութեան մերժման հարցին հետ առնչութիւն ունենալ», ըսաւ Փելոսի, աւելցնելով, որ Ճօ Պայտըն Հայաստանի բարեկամն է, եւ մենք հպարտ ենք, որ ան ստորագրեց Հայոց ցեղասպանութեան մասին բանաձեւը, նաեւ Հայաստանի Հանրապետութեան վարչապետը հրաւիրեց ժողովրդավարութեան վեհաժողովին, որ շատ կարեւոր իրադարձութիւն էր: «Այստեղ եմ ես` ըսելու, որ Միացեալ Նահանգները յանձնառու են աջակցելու Հայաստանի ժողովրդավարութեան: Եւ մենք դժուար պահերուն հայ ժողովուրդի կողքին ենք, երբ պայքար կ՛ընթանայ ժողովրդավարութեան եւ բռնատիրութեան միջեւ: Հայաստանը այն վայրն է, ուր մենք կրնանք այս հակասութիւնները ակնառու կերպով տեսնել», ըսաւ ան` ընդգծելով, որ ինք Ներկայացուցիչներու տան առաջին նախագահն է, որ կ՛այցելէ Հայաստան: «Ես հիմա կանգնած եմ երկու երկիրներու դրօշներուն մէջտեղ, ասիկա կը փաստէ Հայաստանի հետ մեր գործընկերութիւնը», նշեց Փելոսի, որ քոնկրէսին շնորհաւորութիւնը յղեց սեպտեմբեր 21-ի` Հայաստանի անկախութեան տօնին ընդառաջ:

Ներկայացուցիչներու տան նախագահը յայտնեց. «Երբ մենք որեւէ երկիր կ՛երթանք, մեզի համար անվտանգութիւնը կարեւոր է: Չէինք գիտեր, որ մեր այցելութիւնը պիտի համընկնի զինուորական գործողութիւններուն յաջորդող օրերուն: Միացեալ Նահանգներու մէջ կը հպարտանանք, որ շրջապատուած ենք հայրենասէր հայերով, որոնք նաեւ մեր քաղաքացիներն են: Անոնք մեր ուժն են, մեր ամբողջութեան կարեւոր բաղադրիչը»։ Ան վերահաստատեց ԵԱՀԿ-ի Մինսքի խմբակին մէջ Միացեալ Նահանգներու դիրքորոշումը, թէ տագնապը զինուորական լուծում չի կրնար ունենալ:

«Միացեալ Նահանգները, իբրեւ ԵԱՀԿ-ի Մինսքի խմբակի համանախագահ եւ Հայաստանի բարեկամ, յանձնառու են աջակցելու բանակցային կայուն, խաղաղ հոլովոյթի լուծման: Միացեալ Նահանգներ շատոնց նշած են, որ այս տագնապը զինուորական լուծում չի կրնար ունենալ: Շարունակաբար տեղի ունեցող զինուորական գործողութիւնները նորանոր կեանքերու կորուստին, նորանոր տեղահանութիւններու պիտի յանգեցնեն, եւ ատոր համար մեծ գին պիտի վճարուի։ Հայաստանը մեզի համար կարեւոր նշանակութիւն ունի, եւ Հայաստանի սահմաններուն վրայ Ատրպէյճանի մահացու յարձակումները խստօրէն կը դատապարտենք: Մենք կը շարունակենք հետեւիլ իրադարձութիւններուն: Կ՛ուզենք ձգտիլ, որպէսզի Լեռնային Ղարաբաղի տագնապին բանակցային խաղաղ եւ տեւական լուծում ըլլայ», շեշտեց Փելոսի:

Ան կարեւորեց Հայաստան այցելութեան ծիրին մէջ իր եւ քոնկրէսականներու այցելութիւնը Ծիծեռնակաբերդ` Հայոց ցեղասպանութեան զոհերու յիշատակին յարգանքի իրենց տուրքը մատուցելու համար:

Միացեալ Նահանգներու Ներկայացուցիչներու տան ուժանիւթի եւ առեւտուրի հարցերով յանձնախումբի նախագահ Ֆրանք Փըլոն` պատասխանելով լրագրողի մը հարցումին, նշեց, որ իրենք Հայաստանի` ՀԱՊԿ-ի անդամ ըլլալու, վերաբերեալ ոչինչ կ՛ըսեն, միայն մտահոգ են Հայաստանի անվտանգութեամբ:

«Մենք կը հասկնանք, որ Հայաստանը Ռուսիոյ հետ Անվտանգութեան կազմակերպութեան մէկ մասն է: Ատոր առնչուած որեւէ բան չենք ըսեր, սակայն շատ մտահոգ ենք Հայաստանի անվտանգութեամբ եւ կը փորձենք հասկնալ, թէ Միացեալ Նահանգներ ի՛նչ կրնան ընել` առանց անդրադառնալու այդ զինուորական կազմակերպութեան», նշեց Փըլոն:

«Ժողովրդավար աշխարհի մէջ շատ կարեւոր կը նկատենք Հայաստանի ժողովրդավարութիւնը: Եւ ինչպէս պարոն Փըլոնը նշեց, մենք Հայաստանին այդ կառոյցներուն մէջ հաղորդակցութիւններու մասին որեւէ ըսելիք չունինք: Սակայն, Հայաստանի գերիշխանութիւնը եւ տարածքային ամբողջականութիւնը մեզի համար կարեւոր հարցեր են, եւ կ՛ուզենք այդ ուղղութեամբ մեր գործօն աջակցութիւնը ունենալ: Անշուշտ, որոշումը Հայաստանը կը կայացնէ, մենք մեր պատրաստակամութեան մասին կրնանք խօսիլ», աւելցուց Փելոսի:

Նշենք, որ Փըլոն նախապէս «Թուիթըր»-ի վրայ յայտնած էր, որ քոնկրէսական այլ անդամներու հետ ներկայացուցած է Ատրպէյճանի յարձակումը դատապարտող բանաձեւ մը, որուն մէջ կոչ կ՛ուղղուի անյապաղ դադրեցնելու Ատրպէյճանին տրամադրուող որեւէ օգնութիւն եւ կը հաստատէ Ներկայացուցիչներու տան աջակցութիւնը Հայաստանին: «Մենք պէտք է հզօր ուղերձ յղենք, որ Ալիեւի յարձակումը անընդունելի է», մատնանշած էր քոնկրէսականը:

Ներկայացուցիչներու տան անդամ Ճեքի Սփիր իր կարգին յայտարարեց. «Ներկայացուցիչներու տունը արդէն յառաջ մղած է բանաձեւ մը, որով կը դատապարտենք Ատրպէյճանի գործողութիւնները: Յոյսով եմ, որ այդ բանաձեւով յառաջ պիտի շարժինք: Ինչ կը վերաբերի մեր յանձնառութեան` պիտի շարունակենք Հայաստանի տարածքային ամբողջականութեան աջակցիլ եւ դէմ պիտի ըլլանք Հայաստանի սահմաններու որեւէ փոփոխութեան», յայտարարեց Սփիր` պատասխանելով «Զանգեզուրի միջանցք»-ին վերաբերող հարցումին:

Փելոսի աւելի ուշ, «Գաֆէսճեան» արուեստի կեդրոնին մէջ իր արտասանած խօսքին մէջ յայտնեց. «Այցելութիւնս շատ աւելի կանուխ ծրագրաւորուած էր, սակայն այնպէս եղաւ, որ մենք այստեղ եկանք այն պահուն, երբ կրնանք անձամբ խստօրէն դատապարտել Ատրպէյճանի անընդունելի եւ սպառնալից գործողութիւնները, որոնք կը վտանգեն խաղաղութեան հոլովոյթի յաջողութիւնը»:

Սեպտեմբեր 18-ին Փելոսի հանդիպում ունեցաւ Ազգային ժողովի ընդդիմադիր խմբակցութիւններուն հետ: Այս հանդիպումին մասնակցեցան Հ․Յ․Դ․ Հայաստանի Գերագոյն մարմինի ներկայացուցիչ, «Հայաստան» խմբակցութեան պատգամաւոր Իշխան Սաղաթէլեան, «Հայաստան» խմբակցութեան ղեկավար Սէյրան Օհանեան, «Հայաստան» խմբակցութեան պատգամաւորներ Վահէ Յակոբեան, Աննա Գրիգորեան, «Պատիւ ունեմ» խմբակցութեան ղեկավար Հայկ Մամիջանեան, պատգամաւոր Թագուհի Թովմասեան: «Նենսի Փելոսիի հետ խօսեցանք Ատրպէյճանի նախայարձակումին մասին։ Շատ յստակ փոխանցեցինք մեր դիրքորոշումը, որ Ատրպէյճանը, որ կը շարունակէ պատերազմը, մեզի համար անընդունելի է ամերիկեան պետութեան աջակցութիւնը Ատրպէյճանին: Խօսքը ռազմաքաղաքական աջակցութեան մասին է: Այդ պատճառով Ատրպէյճանը կը դառնայ աւելի սանձարձակ ու լկտի, կը շարունակէ նախայարձակումը Հայաստանի Հանրապետութեան վրայ: Խօսեցանք 907 բանաձեւին եւ յաջորդ տարի օգնութիւնները դադրեցնելու անհրաժեշտութեան մասին», հանդիպումէն ետք լրագրողներու հետ զրոյցի ընթացքին ըսաւ Իշխան Սաղաթէլեան:

Ան նշեց, որ քննարկուած է նաեւ հայ ռազմագերիներու մասին հարցը. «Խօսեցանք Հայաստանի ներքին ժողովրդավարութեան, Արցախի կարգավիճակին եւ բոլոր խնդիրներու մասին»:

Պատասխանելով այն հարցումին, թէ 907 բանաձեւի մասին ի՞նչ դիրքորոշում յայտնած է Փելոսին, Սաղաթէլեան ըսաւ. «907 բանաձեւի մասին ըսին, որ պիտի քննարկեն, միայն յայտարարութիւններով պիտի չբաւարարուին: Վերադարձէն ետք Քոնկրէսին մէջ պիտի քննարկուին եւ բարձրաձայնուին այս խնդիրները»:

Միւս կողմէն, Ատրպէյճանի արտաքին գործոց նախարարութիւնը դատապարտեց Միացեալ Նահանգներու Ներկայացուցիչներու տան նախագահի Երեւանի մէջ կատարած յայտարարութիւնները: «Անհիմն ու անարդար մեղադրանքները, որոնք Փելոսին Ատրպէյճանի հասցէին հնչեցուց, անընդունելի են», յայտարարեց Ատրպէյճանի արտաքին գործոց նախարարութիւնը` աւելցնելով, որ ասիկա լուրջ հարուած է հայ-Ատրպէյճանական յարաբերութիւններու կարգաւորման ջանքերուն:

Մինչ այդ Ա․Մ․Ն․-ի պետական քարտուղար Էնթընի Պլինքընն ալ կապ հաստատեց Պաքուի հետ։ Ան հեռախօսով զրոյց մը ունեցաւ Ատրպէյճանի նախագահ Իլհամ Ալիեւի հետ։ Այս զրոյցին ընթացքին Պլինքըն կոչ ուղղեց տէր կանգնիլ զինադադարին եւ Ատրպէյճանին վրայ ճնշում բանեցնել, որպէսզի զօրքերը ետ քաշէ Հայաստանի սահմաններէն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles