ՓԱՐԻԶ ՕԺՏՈՒԵՑԱՒ ՆՈՐԱԿԱՌՈՅՑ «ԱՐԱՊԵԱՆ» ԿՐԹՕՃԱԽՈՎ

0 0
Read Time:2 Minute, 35 Second

CJEkTXEXAAAFIEQarton113624-480x276

ՓԱՐԻԶ («Նոր Յառաջ»).- Յուլիս 4ին, լոյսերու քաղաքի հայահոծ Ալֆորվիլ շրջանը յիշատակելի օր մը ապրեցաւ։ Բազմութիւնը հաւաքուած էր «Կոմիտաս» փողոց։ Ներկայ էին նաեւ Ֆրանսայի եւ Հայաստանի վարչապետները՝ Վալս եւ Աբրահամեան:
Ներկայ էին ֆրանսական քաղաքական դասի ներկայացուցիչներ:
Իսկ հայկական կողմէն, կառավարութեան անդամներ՝ Գիւղատնտեսութեան, Կրթութեան, Սփիւռքի նախարարներ:
Եկեղեցական դասէն ներկայ էին Ֆրանսայի Թեմի Առաջնորդ՝ Վահան Եպիսկ. Յովհաննէսեան, Նորվան Արք. Զաքարեան, Գերմանիոյ Թեմի Առաջնորդ՝ Գարեգին Արք. Պեքճեան, Ռումանիոյ Առաջնորդ՝ Տաթեւ Եպիսկ. Յակոբեան եւ հոգեւոր դասու ներկայացուցիչներ։ Հոն էին նաեւ ֆրանսահայ գաղութի ներկայացուցիչներ եւ զանազան ընկերակցութիւններու նախագահներ։
Բացման ժապաւէնը կտրեցին վարչապետները ներկայութեամբ բարերար՝ Գէորգ Արապեանի եւ հոգեւոր եւ աշխարհական դասուն, որմէ ետք տեղի ունեցաւ դպրոցի բակին մէջ զետեղուած խաչքարի օծումը եւ դպրոցի այցելութիւնը ճարտարապետ Միրիամ Յակոբեանի առաջնորդութեամբ։105162081_oCJEkS8gWIAA9f7S
Առաջին խօսք առնողը եղաւ, այս հաստատութեան մատակարար մարմնի ներկայացուցիչ Կարին Լեռեան, որ շնորհակալութիւն յայտնեց այս գործը իրականացնողներուն, հայ մանուկներուն կրթական յարմարագոյն նոր պայմաններ ստեղծելուն համար։ Ապա խօսք առաւ Նորվան Արք. Զաքարեան, Թեմի նախկին Առաջնորդը, որ ամփոփ կերպով նշեց բոլոր անոնք որոնք այս գործին բերին իրենց մասնակցութիւնը, յատկապէս շեշտեց ցեղասպանութեան հետեւանքները յաղթահարելու ուժը, որուն բացայայտ օրինակն է այս դպրոցին գոյութիւնը:
Խօսք առաւ նաեւ Ֆրանսայի Թեմի Առաջնորդ՝ Վահան Եպիսկ. Յովհաննէսեան, որ իր կարգին շնորհաւորեց իրագործումը։
Ալֆորվիլի քաղաքապետը՝ Լիւք Քարվունաս, իր խօսքին մէջ շեշտեց դպրոցներու կարեւորութիւնը եւ Ալֆորվիլի բնակչութեան երիտասարդ ըլլալը, որուն ապացոյցն է Գէորգ Արապեան դպրոցի շինութիւնը, որ այս տարուան ընթացքին երրորդ կրթական նորակառոյց հաստատութիւնը կը հանդիսանար իր վարած քաղաքին մէջ։ Շեշտելով իր յունական ծագումը, ան վերահաստատեց հայութեան կողմէ իրենց դպրոցի ու կրթութեան միջոցով հայկական ինքնութիւնը ամրապնդելու կարեւորութիւնը Ֆրանսայի հանրապետական արժէքներու ծիրէն ներս։
Հայաստանի վարչապետ Յովիկ Աբրահամեան դրուատեց Ֆրանսա- Հայաստան դարաւոր յարաբերութիւնները, յիշեցուց հայութեան մօտ կրթութեան կարեւորութիւնը, հայերէն այբուբենը որ 1600ամեայ անցեալ ունի, իսկ տպագրութիւնը՝ արդէն 500 տարուան պատմութիւն…CJEkSp_WgAAIBxw
Ֆրանսայի վարչապետ Վալս, իր խօսքին մէջ կարեւոր երեք յայտարարութիւն կատարեց։ Առաջինը՝ այն որ պետութիւնը կը խոստանայ «Արապեան» դպրոցին հետ ընկերակցութեան պայմանագիր կնքել, յանձն առնելով պետական պաշտօնէութեան վարձատրութիւնը, այնպէս ինչպէս արդէն պատասխանատւութիւնը ստանձնած է նախակրթարանին համար։ Երկրորդ, պատասխանելով Հայաստանի վարչապետին, հաւաստեց, թէ կ՚ընդունի Հայաստան այցելելու անոր հրաւէրը։ Երրորդ, անդրադառնալով Ֆրանսայի արժէքներուն, շեշտեց երկրին աշխարհականութեան ազատամիտ ու լայնախոհ դրութիւնը, ուր զանազան ազգերէ անձեր պահպանելով սեփական ինքնութիւնը, կրնան ազատօրէն ապրիլ իրենց պատկանելիութիւնը, կրնան ֆրանսական մեծ հաւաքականութեան մաս կազմել ու իրենց մասնակցութիւնը բերել Ֆրանսայի հզօրացման ու զարգացման։
Պաշտօնական հանդիսութիւնը վերջ գտաւ դպրոցի աշակերտութեան կողմէ երկու հանրապետութիւններու քայլերգներու երգեցողութեամբ, Հ.Մ.Ը.Մ.-ի փողերախումբի նուագակցութեամբ։
Գլխաւոր բարերար Պրն. Արապեանին յանձնուեցաւ Ալֆորվիլի պատուոյ քաղաքացիի շքանշանը, իսկ Հայաստանի վարչապետն ալ՝ Վարչապետի յատուկ շքանշանը։
Այնուհետեւ, կլատարուեցաւ հիւրասիրութիւն եւ այցելութիւն՝ նորակառոյց կրթօճախը:
«Արապեան» դպրոցի շինութիւնը արժած է 4,5 միլիոն եւրօ, որ գոյացած է անհատներու եւ հաստատութիւններու նուիրատւութիւններէ։ DSC00222Պարոն Գէորգ Արապեան յատկացուցած է 2,5 միլիոնէ աւելին։ Իսկ քանդակագործ Էմմա Աբրահամեան իր բնակարանը կտակած էր դպրոցին, որ վաճառքի ընթացքի մէջ է։
Դպրոցին կառուցման ետին կար ամէնօրեայ պայքարը՝ քարացած մտայնութիւններու, անտարբերութեան, օր ըստ օրէ նահանջի անձնատուր մտայնութեան տէր դասակարգին դէմ։
Ֆրանսեւհայկական Մշակոյթի զարգացման միութեան հետեւողական աշխատանքի պտուղն է, այս կրթօճախին շինութիւնը: Այս միութեան աշխատանքին ու մղած պայքարին նպատակը եղած է դպրոցին կառուցումը հասցնել հարիւրամեակի ոգեկոչման խորհրդանշական պահուն։
Այս դպրոցը փաստն է Սփիւռքի դժուարին պայմաններուն մէջ հայութեան մշակութային վերականգնումին ու գոյատեւումին։
«Գէորգ Արապեան» վերանուանուած է նախապէս «Սուրբ Մեսրոպ» կրթարանը, որ հաւանաբար գալ տարի դառնայ նաեւ միջնակարգ վարժարան, կրթական ծրագրի բնական շարունակականութիւնը ապահովելով նախակրթարանը աւարտող դպրոցականներուն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles