ՓԱՐԻԶԻ ՄԷՋ.- ԱՐՑԱԽԻՆ ԵՒ ՀԱՅՈՑ ԲԱՆԱԿԻՆ ՆՈՒԻՐՈՒԱԾ ՁԵՌՆԱՐԿ

0 0
Read Time:3 Minute, 2 Second

p2-3 Ishkhanian5

ՓԱՐԻԶ.- Մարտ 13-ի յետմիջօրէին, իններորդ թաղամասի «Ռոսինի» սրահին մէջ տեղի ունեցաւ Արցախին եւ հայոց բանակին զօրակցութեան ձեռնարկը, տեղւոյն Հ.Յ.Դ.-ի նախաձեռնութեամբ:
Ելոյթ ունեցաւ Արցախի Ազգային ժողովի անդամ եւ Հ.Յ.Դ. Կեդրոնական կոմիտէի ներկայացուցիչ Դաւիթ Իշխանեան, որ այս առիթով յատկապէս հրաւիրուած էր Ֆրանսայի զանազան քաղաքներէն (Մարսէյ, Վալանս, Փարիզ, Տեսին) ներս, ներկայացնելու պաշտպանութեան բանակի եւ ժողովուրդի ներկայի կացութիւնը, նկատի ունենալով վերջին շրջանին ատրպէյճանական բանակի ա՛լ աւելի թափ ստացած ոտնձգութիւնները, երբ Պաքու խախտելով հրադադարը տասնեակներով զոհերու պատճառ դարձած է: Սրահը լեցուած էր բազմութեամբ, որ կը ծածանէր Արցախի դրօշակները: Մեծամասնութիւն կը կազմէին «Նոր Սերունդ»ի երիտասարդները: Ներկայ էին Ֆրանսայի մէջ Արցախի ներկայացուցիչ Յովհաննէս Գէորգեան, Հ.Յ.Դ. Բիւրոյի անդամ Մուրատ Փափազեան, տեղւոյն Կեդրոնական Կոմիտէի եւ Հայ Դատի յանձնախումբի անդամներ, համակիրներ եւ հոծ բազմութիւն:
Յոտնկայս ունկնդրուեցան Ֆրանսայի, Հայաստանի եւ Արցախի քայլերգները՝ կատարողութեամբ Ալֆորվիլի պատանեկան երգչախումբին, որմէ ետք հայերէնով եւ ֆրանսերէնով ցերեկոյթին բացումը կատարուեցաւ:
Ներկայացուեցաւ Արցախի մէջ Ֆրանսայի երիտասարդական շարժումին՝ «Նոր Սերունդ»ի գործունէութիւնը, ուր յատկապէս նշուեցաւ երիտասարդական չորս կեդրոններու վերակառուցումը՝ Բերձորի, Մարտունիի, Շուշիի եւ Ստեփանակերտի մէջ: Հանրապետութեան տարբեր շրջաններէն ներս կը կազմակերպուին նաեւ տարեկան ճամբարներ պատանիներուն համար:
Այնուհետեւ Արեւմտեան Եւրոպայի Կ.Կ.-ի անունով բեմ հրաւիրուեցաւ Յարութ Մարտիրոսեան: Անդրադառնալով թշնամիին կողմէ արցախեան պաշտպանութեան դիրքերու վրայ կատարուած անընդմէջ յարձակումներուն՝ բանախօսը ըսաւ, թէ ամէն ինչ պէտք է ընել որպէսզի Ատրրպէյճան վերջ տայ իր որդեգրած հակահայ քաղաքականութեան եւ նստի բանակցութեանց սեղան:
Հուսկ խօսք առաւ պատգամաւոր եւ Արցախի ազատագրական պայքարի օրերուն Մարտակերտի շրջանի հայ զինեալ ուժերու հրամանատար Դաւիթ Իշխանեան: Ան նախ շնորհաւորեց Արցախեան շարժման 28րդ տարեդարձը, որ ինչպէս միշտ, այս տարի եւս նշուեցաւ Սփիւռքի զանազան համայնքներու կողմէ, նկատի ունենալով, որ այդ շարժումը նոր էջ մը բացաւ հայ ժողովուրդի կեանքին մէջ՝ նախանշելով նոր հեռանկարներ: Ապա ան Արցախեան ազատագրական պայքարի համառօտ պատմականը ըրաւ 1988էն սկսեալ, որմէ ետք 1991 Սեպտեմբեր 2ին հռչակուեցաւ Անկախ Արցախի Հանրապետութիւնը, որ ամրապնդուեցաւ նոյն տարուան Դեկտեմբեր 10ին, համաժողովրդական հանրաքուէով:p2-3 Ishkhanian6
Դաւիթ Իշխանեան իր ելոյթին ընթացքին անդրադարձաւ այն բաղադրիչներուն, որոնք Արցախի անվտանգութեան համակարգին մաս կը կազմեն, ըլլայ ռազմական, ազգաբնակչութեան, քաղաքական թէ տնտեսական տեսանկիւններէ: «Այսօր, 150 հազար բնակչութեամբ եւ 13 հազար քառ. քմ. տարածութիւն ունենալով հանդերձ, ունինք շուրջ 115 քիլոմեթր երկարութեամբ պաշտպանութեան գօտի, եւ ես այս բեմէն ամենայն պատասխանատուութեամբ կրնամ յայտարարել, թէ այո՛, պաշտպանուած են Ղարաբաղի սահմանները, հակառակ ամէնօրեայ մարտական գործողութիւններուն», նշեց բանախօսը՝ աւելցնելով, թէ «մեր ունեցած ռազմական հնարաւորութիւններով, ինչպէս անցեալին, ներկայիս ալ ի վիճակի ենք դիմադրելու թշնամիի յարձակումներուն»: Ան տեղեկացուց, թէ Արցախի պետական անձերը յաճախ կ՛այցելեն սահմանային գիծ եւ միշտ թիկունք կը կանգնին պայքարող հայ զինուորներուն:Դաւիթ Իշխանեան խօսեցաւ նաեւ Արցախի ժողովուրդի ընդհանուր հոգեվիճակին մասին, նշելով, թէ հակառակ քայքայող պատերազմին՝ բնակչութիւնը երբեք չէ ընկճուած եւ պատրաստակամ է դիմադրելու դժուարութիւններուն:p2-3 Ishkhanian2

Ինչ կը վերաբերի Արցախի բնակչութեան վիճակագրական տուեալներուն, Դաւիթ Իշխանեան ցաւով նշեց, թէ այդ մարզին մէջ մեր յաջողութիւնները տակաւին շօշափելի չեն, եւ վերջին 10-15 տարիներուն ընթացքին փոխանակ 150 հազարով կրկնապատկուելու, մեր բնակչութեան թիւը միայն 15 հազար աւելցած է: «Անշուշտ այս գծով աշխատանքներ կը տարուին, եւ շատ գնահատելի են թէ՛ պետութեան եւ թէ բարեսիրական կազմակերպութիւններու աջակցութիւնները», նշեց բանախօսը աւելցնելով, թէ վերաբնակեցման հարցն ալ ցարդ հարկ եղած արդիւնքը չէ տուած, բայց համահայկական ջանքերով այդ ալ կարելի պիտի ըլլայ իրագործել:
Դաւիթ Իշխանեան դրուատեց Ֆրանսայի եւ Արցախի միջեւ ստեղծուած բարեկամական յարաբերութիւնները եւ կոչ ըրաւ շարունակելու պայքարը Արցախի անկախութեան եւ արցախահայութեան ինքնորոշման իրաւունքի միջազգային ճանաչման ուղղութեամբ:
Գեղարուեստական բաժինին մէջ երգիչ Վիգէն Դարբինեան իր ազգային եւ հայրենասիրական երգերով խանդավառեց ներկաները:
Նշենք թէ, Դաւիթ Իշխանեան հանդիպում ունեցած է Լիոն քաղաքի առաջին փոխքաղաքապետ Գէորգ Քեփենեքեանի, Վիյէօրպանի քաղաքապետ Ժան Փոլ Պրետի, Տեսինի քաղաքապետ Օրանս Ֆոթրայի եւ Վիէնի քաղաքապետ Քիրի Քովաքսի հետ: Այս հանդիպումներուն ընթացքին քննարկուած են համագործակցութեան վերաբերող հարցեր: Նշենք թէ, Վիյէօրպան եւ Վիէն քաղաքները նախապէս փոխադարձ համագործակցութեան համաձայնագիրներ ստորագրած են համապատասխանաբար Շուշի եւ Հատրութ քաղաքներուն հետ:
Իշխանեան Տեսինի Հայ մշակութային կեդրոնին մէջ հանդիպում ունեցաւ Լիոնի հայութեան ներկայացուցիչներուն հետ: Ան լայնօրէն անդրադարձաւ Ղարաբաղի ներկայ կացութեան եւ առկայ մարտահրաւէրներուն մասին:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԱՌԱՋԱՐԿՆԵՐ ՔՈՆԿՐԷՍԻՆ՝ ԱՐՑԱԽԻ ԵՒ ՀԱՅԱՍՏԱՆԻ ԿԱՏԱՐՈՒԵԼԻՔ ՕԺԱՆԴԱԿՈՒԹԻՒՆՆԵՐՈՒՆ ՀԱՄԱՐ
Next post Այս Է Մեր Տեսակը

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles