Տիթրոյթ․- Սարդարապատն Ու Մայիս 28-ը Հ․Բ․Ը․Մ․-ի Մանուկեան Վարժարանէն Ներս

1 0
Read Time:1 Minute, 27 Second

Զէք Կարապետեան

Հ.Բ.Ը.Միութեան Միշիկընի Ալեք եւ Մարի Մանուկեան վարժարանի հայկական բաժանմունքը այս տարի մեծ շուքով տօնեց Սարդարապատի, Բաշ Ապարանի ու Ղարաքիլիսէի յաղթանակներն ու Հայաստանի առաջին հանրապետութեան հիմնադրութեան տօնը:

Արդարեւ, Չորեքշաբթի, Մայիս 25-ին, առտուան ժամը 10-ին, դպրոցի բարձրախօսներէն սկսաւ հնչել հայրենասիրական եղանակներ: Մանկամսուրի, մանկապարտէզի, նախակրթարանի ու միջնակարգի աշակերտները, իւրաքանչիւրը իրենց փոքր Եռագոյն դրօշակները ծածանելով, տողանցելով դուրս եկան դպրոցի բակ: Սարդարապատի ու Զարթիր Լաօ-ի խրոխտ եղանակները կը թնդացնէին ամբողջ թաղամասը: Աշակերտները հպարտ եւ ուրախ կ’երգէին,  փաստելով որ հայրենասիրական ոգին բարձր է Մանուկեան վարժարանէն ներս, որուն համար եւ, դպրոցիս հիմնադիրն ու բարերարը՝ Տիար Ալեք Մանուկեան, 1969 թուականին հիմներ էր այս կրթական օճախը:

Մեր Հայրենիքի հնչիւններուն ներքոյ 9-րդ դասարանի աշակերտներ՝ Սեւակ Ղազարեանն ու Արման Դանիէլեանը դրօշակի հանդիսաւոր արարողութիւնը կատարեցին ծածանելով Արցախի ու Հայաստանի դրօշները: Ապա, վարժարանիս հայկական բաժանմունքի պատասխանատու Պրն. Սեպուհ Աւետիքեան ողջունեց բոլոր աշակերտներն ու ուսուցիչները: Ան հրաւիրեց 7-րդ դասարանի աշակերտներ՝ Դրօ Հացագործեանն ու Լիա Պօղոսեանը հայերէն ու անգլերէն լեզուներով ներկայացնելու օրուան խորհուրդը: Դրոն եւ Լիան վստահեցուցին որ պիտի չմոռնան Արամ Մանուկեանի, Դրոյի, Քաջազնունիի եւ բոլոր այն հերոսներուն զոհողութիւնները, որոնց շնորհիւ Հայաստանը իր անկախութիւնը հռչակեց Մայիս 28, 1918-ին: Իսկապէս ոգեշնչող էր տեսնել հայրենիքէն հեռու բնակող, սակայն հայրենիքով ապրող Միշիկընի Մանուկեան հայկական վարժարանի աշակերտներուն այս խանդավառութիւնը:

Ոգեւորութիւնը գագաթնակէտին հասաւ երբ Հայկական բաժանմունքի ուսուցչուհի՝ նաեւ երաժշտագէտ Արշալոյս Ղարիպեանի ղեկավարութեամբ, բոլոր աշակերտները սկսան երգել Գետաշէնն ու Հայեր Միացէք երգերը:

Նախակրթարանի ու միջնակարգի ժրաջան տնօրէնուհի Տիկ. Սօնա Գալֆայեան իր փակման խօսքին մէջ շնորհակալութիւն յայտնեց հայկական բաժանմունքի բոլոր ուսուցիչ-ուսուցչուհիներուն այս ձեռնարկը կազմակերպելու համար: Ան գոհունակութիւն յայտնեց որ Մանուկեան վարժարանը բարձրակարգ ուսում ջամբելուն առընթեր վառ կը պահէ նաեւ հայրենասիրութիւնը, սորվեցնելով մեր լեզուն ու մշակոյթը վարժարանս յաճախող հայ եւ ոչ հայ աշակերտներուն:

Հանդիսութեան աւարտին ոգեւորուած աշակերտները հայրենասիրական երաժշտութեան ներքոյ իրենց ձեռքի փոքրիկ եռագոյնները ծածանելով մեկնեցան իրենց դասարանները:

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles