0
0
ՓՐՈՎԻՏԸՆՍ (Րոտ Այլընտ).- Վերջերս, կարճ այցելութեամբ մը Միացեալ Նահանգներ ժամանեց Տիգրանակերտ քաղաքի քաղաքապետ Ապտուլլահ Տէմիրպաշը: Ուաշինկթըն եւ Րոտ Այլընտ այցելութեան ընթացքին, ան նաեւ տեսակցութիւններ ունեցաւ հայ գաղութին հետ:
Հինգշաբթի, Հոկտեմբեր 10ին, կէսօրէ ետք ժամը 4:00ին, Փրովիտընսի մէջ, քաղաքապետը Հայոց Ցեղասպանութեան յուշարձանին առջեւ ծաղիկներ զետեղեց: Քիւրտ քաղաքապետին կ՛ուղեկցէին Փրովիտընսի հայ եւ քիւրտ համայնքներու ներկայացուցիչներ: “Մենք կը խոնարհինք բոլոր անոնց յիշատակին առջեւ որոնք իրենց կեանքը կորսնցուցին“,- ըսաւ ան եւ նշեց թէ քիւրտերը, 1915-ի ջարդերուն մէջ դեր մը ունեցած են: Ան անցեալին հետ հաշուի նստելու անհրաժեշտութիւնը ընդգծեց եւ կոչ ուղղեց Թուրքիոյ որ ներողութիւն խնդրէ:
Տէմիրպաշ նոյն օրը, երեկոյեան ժամը 7:00ին հանդիպում ունեցաւ Փրովիտընսի հայ համայնքին հետ, տեղւոյն Ս. Վարդանանց եկեղեցւոյ սրահէն ներս: Օրուան հանդիսավար Անի Հարոյեան բարի գալստեան մաղթանքէն ետք խօսք տուաւ եկեղեցւոյ հոգեւոր հովիւ Տ. Կոմիտաս Ա. Քհյն. Պաղսարեանին: Ան ողջունեց քաղաքապետ Տէմիրպաշի ներկայութիւնը եւ բարձր գնահատեց պատմական ճշմարտութիւնը բարձրաձայնելու անոր խիզախ կեցուածքը, աւելցնելով. “Որպէս Ցեղասպանութեան ենթարկուած ազգի մը զաւակներ, մենք համոզուած ենք որ կարելի չէ ճշմարտութեան լոյսը խաւարամտութեամբ ծածկել, որովհետեւ անպայման օր մը պիտի բացայայտուի պատմական փաստը“:
Խօսք առնելով հայ բազմութեան դիմաց քաղաքապետը անգամ մը եւս կրկնեց Հայոց Ցեղասպանութեան մէջ քիւրտերու որոշ դերակատարութիւն մը ունեցած ըլլալու իրողութիւնը եւ որուն համար ներողութիւն խնդրեց: Ապա խօսքը շարունակելով ըսաւ. “Ձեզի դէմ բռնութիւն կիրառողը նաեւ մեր դէմ բռնութիւն կիրառեց ու դեռ կը շարունակէ կիրառել: Այո, ձեր նախնիները տեղահանուեցան իրենց հողերէն եւ ես այդ դառնութիւնը կ՛ընկալեմ: Այսօր երանի այդ մէկը տեղի չունենար ըսելը հարց չի լուծեր: Մեր ըրածներուն համար ներողութիւն կը խնդրեմ: Մեզի այդ չարիքները գործելու մղած եւ մեր դէմ նոյն չարիքները գործած կողմին ալ ներողութիւն խնդրելու ժամանակը արդէն եկած է: Այն ինչ որ մենք կ՛ընենք մեր խղճի պարտքն է, եւ անոր համար շնորհակալութիւն յայտնելու պէտք չունիք: Մեր մարդկային պարտքն է որ կը կատարենք, եւ այսօր այն ինչ որ կը ցանկամ քիւրտին համար, նոյնը կը ցանկամ հայուն եւ ասորիին”:
Հարց ու պատասխանի ընթացքին քաղաքապետ Տէմիրպաշ յայտնեց, որ իր քաղաքին մէջ հայերէն եւ սուրիանիներէն (արամերէն) լեզուներու դասընթացներ կը մատուցուին եւ այս օրինակը սկսած է վարակել նաեւ մօտակայ այլ քաղաքներ:
Խօսքի աւարտին, Տէմիրպաշ արծաթեայ յուշանուէր մը փոխանցեց Անի Հարոյեանին:
