0
0
Նախքան հրաժեշտ առնելը, Հայաստանի մօտ, Միացեալ Նահանգներու դեսպան, տիկին Մարի Եովանովիչ կատարած է կարգ մը այցելութիւններ ու տեսակցութիւններ, որոնց միտք բանին եղած են գործընթացի անխախտ շարունակութիւնը, յաչս թէ՛ ներքին եւ թէ՛ արտաքին “թափանցիկ“ քաղաքականութեան:
Բնականաբար մօտակայ Միջին Արեւելքի ներկայ կացութիւնը, իր հանրահռչակ “արաբական գարուն“էն ներշնչուած, տիկին Եովանովիչ իր ներկայացուցած երկրի Արտաքին Գործոց նախարարութեան կարծիքն ու ուղին ներկայացնելով, շարունակ կրկնեց թէ սատար կը հանդիսանայ ընդդիմութիւն-իշխանութիւն երկխօսութեան, բանտարկեալներու ազատ արձակման եւ ընդհանրապէս “հաշտութիւն“ բուրող եւ հանդուրժելի նկատուող ներկայ իրադարձութիւններուն:
Ներքին իրադարձութիւններէն դուրս գալով եւ արտաքին ու յատկապէս անմիջական շրջանային բնագաւառ մուտք գործելով, Արցախեան հիմնախնդրի հարցով ալ, հաշտութեան ու համաձայնութեան կոչերը մնացին անպակաս: Կոչեր` որոնց խորքը նոյնքան խորթ է ու նաեւ խորշ:
Միեւնոյն ժամանակ, երբ Եովանովիչ իր “հրաժեշտի քազել“ն ու փրոթոքոլային տեսակցութիւնները կը կատարէր, Սպիտակ Տան մէջ, Արտաքին Գործոց նախարար տիկին Հիլըրի Քլինթըն ամերիկեան եւ ատրպէյճանական բարեկամութեան եւ գործակցութեան գովքը կը հիւսէր, վստահեցնելով իր գործակիցին` Ատրպէյճանի Արտաքին Գործոց նախարար էլմար Մամետիարովին, թէ շտապօրէն աշխատանք պիտի տարուի Արցախի հիմնահարցը լուծելու: Եւ դեռ, տեղին է աւելցնել թէ, այս իրադարձութիւնները կը կատարուին Տօվիլեան հանդիպումը հազիւ աւարտած, ուր Միացեալ Նահանգներու, Ռուսաստանի եւ Ֆրանսայի նախագահները միասնաբար յայտարարութիւն մը լոյս ընծայած էին, Արցախի կարգաւորման վերաբերեալ` յայտարարելով քաղաքական կամք ցուցաբերել եւ ամէն գնով աւարտին հասցնել կարգաւորման հիմնարար սկզբունքներու շուրջ աշխատանքը:
Նաեւ, նշելի է թէ այս իրադարձութիւննեռրը կատարուեցան Ե.Ա.Հ.Կ.-ի Մինսքի խումբի համանախագահներու շրջան այցելութեան նախօրեակին:
Հոս տեղին է հարցադրել թէ ի՞նչ կարելի է սպասել, յառաջիկայ շաբաթներուն, յատկապէ՛ս ներքին քաղաքական ոլորտէն ներս:
Ընդդիմութիւն-իշխանութիւն` այս պարագային Հայ Ազգային Քոնկրէս – Հանրապետական Կուսակցութիւն երկխօսութիւնը որքան լուրջ ընթացք պիտի առնէ եւ յատկապէս որչափ թափանցիկ նկատուի:
Տաք եւ շոգ օրերու սեմին ենք…
Խմբագրական – ʼʼՀայրենիքʼʼ
Յունիս 6, 2011
