ՏԱՐՕՐԻՆԱԿ OՐԻՆԱԿԱՆՈՒԹԻՒՆ … ԴԱՏԱՊԱՐՏՈՒԱԾ ԴԱՏԱՎԱՐՈՒԹԻՒՆ

0 0
Read Time:1 Minute, 41 Second

khmp

ՀԱՅՐԵՆԻՔ
Խմբագրական
Հոկտեմբեր 19, 2015

Յաղթականի եւ պարտեալի բնոյթ մը ստեղծած թուրք ազգայնական Տողու Փերինչէքի դատական հարցը՝ «Փերինչէք ընդդէմ Զուիցերիա» դատավարութիւնը, որ կարճ նիստով մը կատարուեցաւ Հոկտեմբեր 15-ին, Մարդկային Իրաւանց Եւրոպական Դատարանին կողմէ, Սթրազպուրկի մէջ, իւրայատուկ է իր տարօրինակութեամբ եւ արտառոցութեամբ:
Այնպիսի դարձ-դարձիկ եւ հարցադրումի առարկայ հաստատումներ եւ եզրակացութիւններ կատարուեցան, որ ամենէն աւելի փորձառու փաստաբանն ու դատաւորն ալ անգամ գլխապտոյտի ենթարկուեցաւ:
Թէ՛ հայկական եւ թէ՛ թրքական կողմեր պաշտօնապէս հաստատեցին թէ ի նպաստ իրենց եղած են որոշումները:
Նոյնիսկ հայոց իրաւունքը պաշտպան փորփառու փաստաբաններ՝ Ամալ Քլունի եւ Ճէֆրի Ռապըրտսըն հաստատեցին թէ Մարդկային Իրաւանց Եւրոպական Դատարանին մէջ առնուած որոշումներն ու հաստատումները ի նպաստ հայութեան են: Միեւնոյն մօտեցումն ու կարծիքը հաստատեց Հայաստանի Հանրապետութեան ընդհանուր դատախազ Գէորգ Կոստանեանը:
Դատարանի առած որոշումին համաձայն՝ հայ ժողովուրդի արժանապատուութեան եւ ցաւին հետ ոչ ոք հարցադրման ենթարկելու իրաւունք ունի, այսինքն Հայոց Ցեղասպանութեան իրողութիւնը, եւ ապագային ուրացման փորձերը, որեւէ պարագային ճիշդ օրէնսդրութեամբ քրէական հարց կը նկատուին:
Հակառակ այս հաստատումներուն, դատարանը յստակօրէն չհաստատեց եւ չմատնանշեց թէ կատարուած յայտարարութիւնները ատելութեան եւ այլամերժութեան կոչեր էին:
Եւ դեռ աւելին, Մարդկային Իրաւանց Եւրոպական Դատարանը հրապարակած իր վճիռին մէջ բաժնելով հայ ժողովուրդի արժանապատուութեան իրաւունքը եւ թիկունք կանգնելով ցեղասպանութեան ժխտումը քրէականացնող օրէնքներու օրինականութեան, հաստատեց թէ կը պաշտպանէ Զուիցերիոյ մէջ Հայոց Ցեղասպանութիւնը հրապարակաւ ժխտած թուրք քաղաքագէտ Տողու Փերինչէքի խօսքի իրաւունքը:
Հոս տեղին է կրկին անգամ նշել թէ Փերինչէք, Մարտ 2007-ին, Լօզանի ոստիկանութեան դատարանին կողմէ, 90 օր բանտարկութեան եւ երեք հազար ֆրանք տուգանքի ենթարկուած էր, ցեղային խտրականութիւն կատարած ըլլալուն համար: Ան տարիներ շարունակ հաւաքներ կազմակերպած էր եւ Հայոց Ցեղասպանութիւնը որակած միջազգային սուտ:
Անգամ մը եւս, Մարդկային Իրաւանց Եւրոպական Դատարանը կտրուկ միջոցառումներու չէր դիմած, պարզաբանելով թէ Փերինչէքի կատարածը իրաւունքի չարաշահում չէր, այլ պարզապէս դժգոհութիւն պատճառելու հակամէտ հարցերը հրապարակաւ քննարկելու իրաւունքի գործադրում:
Մարդկային Իրաւանց Եւրոպական Դատարանը նաեւ շեշտեց թէ քրէական միջազգային դատարանի կառոյց եւ իրաւասութիւն չունի եւ հետեւաբար լիազօրուած չէ իրաւական յայտարարութիւններ կատարելու Ցեղասպանութեան մասին:
Սակայն մէկ բան յստակ է թէ, այս տարօրինակ օրինականութեան եւ դատապարտուած դատավարութեան ետին, կար պարտեալ մը, այդ յանձին աշխարհի ամենէն աւելի յառաջադէմ երկիրներէն՝ Զուիցերիոյ:
Նոյնինքն դատը՝ «Փերինչէք ընդդէմ Զուիցերիա» կը նսեմացնէր յարգանք վայելող երկիր մը…պարզ անձի մը դիմաց:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles