0
0
Զաւէն Խանճեան, Ամերիկայի Հայ Աւետարանչական Ընկերակցութեան Գործադիր Տնօրէն
Հայ Աւետարանական վաստակաշատ ծառայակից, հեղինակ, խմբագիր, համայնքի ղեկավար, վերապատուելի Պարգեւ Տարագճեանը միացաւ Տիրոջը:
«Ջուրը կ՛եռայ,- Հեռախօսէն կը լսուի անոր ազդու ձայնը,- Ձեզ կը սպասենք»:
Կապը, որ զարգացեր էր հեռակայ կարգով, տեղափոխուեր էր Քալիֆորնիոյ Կլենտէյլ քաղաքի թաղամասը: Որպէս հարեւաններ՝ ես եւ Սոնան երկար ժամանակ կը վայելէինք Պատուելի Պարգեւի եւ Արմինէի ընկերութիւնը , իսկ անոր ցաւալի մահէն յետոյ՝ Պատուելիի եւ Ակնէսի: Հարաւայի Քալիֆորնիան օրհնուեցաւ ժամանակակից պատմութեան մէջ ամենայայտնի հայ աւետարանական մտաւորականներէն մէկուն ներկայութեամբ: Պատուելի Պարգեւ Տարագճեանը հեռատես էր, ներոյժով լի, օժտուած ճանաչողական գանձերով, ընկերային հմտութիւններով, հաճոյախօսութեան զգացումով եւ անքննելի հաւատքով:
Ան իր կոչումին ուշ սկսաւ, բայց պատանեկութեան տարիներուն ժամանակ չխնայեց ինքնազարգացման համար, այնքան, որ երեսուն տարեկանին գոլէճ ընդունուելու ատեն, Պարգեւ Տարագճեանը հանրագիտարանային գիտելիքներ ձեռք բերած էր հայոց պատմութեան, գրականութեան եւ Աստուածաբանութեան մէջ: 20-րդ դարու երկրորդ կէսին մեծցած Մերձաւոր Արեւելքի հայ երիտասարդութեան սերունդները Պատուելի Պարգեւին հանդիպեցան Մերձաւոր Արեւելքի Հայ Աւետարանական ԵկեղեցիներուՄիութեան պաշտօնական հրատարակութիւններ՝ «Պատանեկան Արձագանգ»-ի եւ »Ջանասէր»-ի էջերուն:
Ան խրախուսեց եւ ոգեշնչեց զանոնք գրելու՝ հնարաւորութիւն ընձեռելով շատերուն, երեւելու համար հրատարակութիւններու էջերուն: Պատուելի Պարգեւ ունէր խոր եւ հարուստ ձայն, որով ան շռայլօրէն կը հռչակէր հաւատքը եւ կը գովերգէր արժանապատիւ ազգային ինքնութիւնը: Ան լաւագոյնս ըմբռնեց իր հայ աւետարանական արմատներն ու ինքնութիւնը եւ մեծահոգաբար լուսաբանեց զանոնք իր գրութիւններուն մէջ: Անոր «Հայ Աւետարանական Ինքնութիւն», «Անփոխարինելի Ժառանգութիւն» եւ այլ գիրքերը դասագրքային չափորոշիչներ են, որոնք պէտք է ըլլան ուսումնական ծրագրի մէկ մասը բոլոր անոնց համար, որոնք կը ձգտին ներդրում ունենալ Տիրոջ ծառայութեան մէջ:
Տասնամեակներ շարունակ Պատուելի Պարգեւի «համախոհները» այն երիտասարդներն էին, որոնք այնքան շատ կը սիրէին զինք, որ պսակեցին զինք «Շէֆ» (Chief) կոչումով: Պատուելի Պարգեւ առատօրէն իր գիտելիքները բաժնեց ուրիշներուն: Ըլլայ եկեղեցիներու ամպիոններէն, թէ դասախօսութիւններու սրահներէն. ան կրթեց, խոկաց եւ լուսաւորեց շատերուն Պէյրութի, Շիքակոյի, թէ Լոս Անճելըսի մէջ: Չնայած հայ աւետարանական պատկանելիութեան, իր խորաթափանց զգացումին, Ան հովիւ էր բոլորին:
Անոր ծառայութիւնը Շիգակոյի Հայ Աւետարանական եկեղեցիին մէջ, ոսկեդար էր այն համայնքին համար, ուր զինք կը փնտռէին դասաւանդելու, քարոզելու, դասախօսելու եւ ղեկավարելու համար: Չնայած իր մտաւոր կարողութիւննրուն, Պատուելի Պարգեւ ժողովրդական մարդ էր: Ան կը սիրէր ընկերակցութիւնը, հաց կը կտրէր կ՛երգէր, կ՛ուրախանար, թղթախաղ կը խաղար: Ըլլալով աւետարանիչի որդի՝ անոր այդ ոգին դրսեւորուեցաւ Տարագճեան թոռան մէջ, որ ծառայութիւն կը բերէ Տիրոջ Քրիստոնէական անդաստանին մէջ:
Պատուելի Պարգեւ Տարագճեան 20-րդ դարու երկրորդ կիսուն հայ աւետարանականներու բաբախող սիրտն ու ղօղանջող խիղճն էր: Բնութագրեր եւ համոզմունքներ, որոնք օրէցօր կը նօսրանան:
Ամերիկայի Հայ Աւետարանչական Ընկերակցութեան անունով մեր սրտագին ցաւակցութիւնները կը յայտնենք իր կողակցին՝ Ակնէս Անդրէասեան Տարագճեանին, դուտրերուն՝ Անիին եւ Հուրիին, անոնց ընտանիքներուն եւ Փեսային Աւետարանչականի նախագահ Դոկտ. Տարագճեանին:
Թող մեր Տէր Աստուածն իր առատ շնորհով մխիթարէ Տարագճեան ընտանիքի իւրաքանչիւր անդամ, եւ թող իր ժառանգութիւնը շարունակուի օրինակ ծառայել հայ երիտասարդութեան ներկայ սերունդներուն:
Յ․Գ․- Վեր. Պարգեւ Ն. Տարագճեան այս աշխարհէն հեռացաւ Հինգշաբթի, Ապրիլ 6, 2023-ին Կլէնտէյլի մէջ՝ ՔալիՖորնիա։ Վերապատուելիին Յիշատակի պաշտամունքը տեղի պիտի ունենայ Հինգշաբթի, Մայիս 4, 2023-ին՝ առաւօտեան ժամը 10-30ին, Լոս Անճելըսի Միացեալ Հայ Ժողովական Եկեղեցիին մէջ՝ որուն պիտի յաջորդէ Յիշատակի Ճաշ մը՝ Եկեղեցիի Աւազեան Սրահին մէջ։ Փոխան ծաղկեպսակի նուիրատուութիւնները պիտի յատկացուին Ամերիկայի Հայ Աւետարանչական Ընկերակցութեան (AMAA) Պարգեւ Տարագճեան Յիշատակի հիմնադրամին – 31 West Century Road, Paramus, NJ 07652:
