ՎԵՐԸՆՁԻՒՂՄԱՆ ՄԱՅԻՍ 28-Ը

0 0
Read Time:1 Minute, 41 Second

khemp1

ՀԱՅՐԵՆԻՔ
Խմբագրական

Կարելի չէ պատմութեան մոռցուած եւ մէկդի դրուած էջերուն մէջ պահել պատմական ճշմարտութիւններ, ճակատագրական պահեր եւ հերոսապատումներ:
Ղարաքիլիսէի, Սարդարապատի եւ Բաշ Ապարանի ճակատամարտերը կը մնան Հայոց Պատմութեան ոսկի էջերը, որոնց շառաւիղն էր Արցախի ազատագրութիւնը: Վայրերու անուններն էին, որոնք փոխուած էին՝ Աղտամ, Ջան հասան, Քեօսալար եւայլն, սակայն հայուն արիւնը, կամքն ու կողին կապուածութիւնը՝ միեւնոյնն էր: Եւ այսօր, գրեթէ 25 տարի ետք, մութ ձեռքեր կը փորձեն կրկին մեր սուրբ հողին, պատմութեան ու պատիւին դպնալ:
Անոնք չեն գիտեր թէ, Մայիսեան ճակատամարտը վերընձիւղուած է եւ այդ ալ այնպիսի հաստատ ու անդրդուելի հիմերու վրայ, որ կարելի չէ շարժել:
Այսպէս, վերընձիւղուած Մայիս 28-ը, դեռ քանի շաբաթ առաջ Արցախեան ճակատներուն վրայ ներարեց նոր խանդ ու աւիշ:
Վերընձիւղուած Մայիս 28 մը, որ հայութեան կը փոխանցէ ապրելու, պայքարելու, եւ գոյատեւելու վճռական կամք: Եւ այս պարզ նուաճում մը չէ, այլ սխրանք մը, ձեռք բերուած նորօրեայ հերոսներու քրտինքով ու արիւնով:
Ոգին ու ոգեղէնն է կարեւորը:
Վերընձիւղուած Մայիս 28-ը կը խօսի սրտերուն անոնց, որոնք քաջատեղեակ են թէ ի՞նչ իմաստ ունին հայրենի հողն ու մշակոյթը, եւ դեռ անոնց որոնք հպարտ են իրենց անկախութեամբ եւ ազատութեամբ:
Անգամ մը եւս, պատմութիւնը կը կրկնուի: 1918-ին, այսօրուայ Հայաստանի Հանրապետութիւնը քարտէսին վրայ գոյութիւն պիտի չունենար, եթէ Թուրքիան կարողանար գրաւել Արարատեան դաշտը, իրականացնելով համաթուրանական պետութիւն մը՝ երազ մը, որուն համար ցայսօր կը շարունակէ պայքարիլ: Այս անգամ տափաստանային դաշտերու փոխարէն, աւելի արեւելք՝ Արցախեան բարձրաւանդակներէն փորձուեցաւ այդ փանթուրանական երազը, հլու կամակատար՝ Ատրպէյճանի ճամբով:
Վերընձիւղուած Մայիս 28-ը բնական շարունակութիւնն է ազատագրական այն հերոսամարտերուն, որոնց բեմ հանդիսացան հայահոծ տարածաշրջաններ՝ Մուշէն մինչեւ Վասպուրական, Հաճըն եւ դեռ Մուսա Լեռ…: Տարածաշրջաններ (աւելի ծանօթ Արեւմտահայաստան անունով) որոնք այսօր կը գտնուին Թուրքիոյ հովանիին տակ:
Որքա՜ն տարիները կը թաւալին եւ հետզհետէ կը հեռանանք պատմութեան այս փառաւոր թուականէն, այնքան աւելի՛ կ՛արժեւորուի այս «խենթեր»ուն գտած հնարն ու անոնց ղօղանջած անլռելի զանգակատունը:Եւ դեռ աւելին… կը կրկնուի եւ շարունակ պիտի կրկնուի այս սխրանքը:
Վերընձիւղուած Մայիս 28-ով հայ ժողովուրդը չենթակուիր օտարի լուծին եւ զուտ անձնական շահերով զինք փայփայող կեղծ դրացիներու: Այլ ընդհակառակը, սերունդէ սերունդ այս վերընձիւղուած փաղանգը ինքնավստահ եւ ինքնակամ է:
Այսպէս են վերընձիւղուած Մայիս 28-ի դաւանանքն ու գերբը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles