Վահագն Խաչատրեան Ընտրուեցաւ Հ․Հ․ Նախագահ
ԵՐԵՒԱՆ.- Մարտ 3-ին, Հայաստանի Ազգային ժողովը եօթը տարուան ժամկէտով, Հայաստանի հինգերորդ նախագահ ընտրեց Վահագն Խաչատրեանը, որուն թեկնածութիւնը առաջադրած էր իշխող «Քաղաքացիական պայմանագիր» խմբակցութիւնը:
Օր մը առաջ՝ Մարտ 2-ին, ընտրութեան առաջին փուլին կարելի չեղաւ ընտրութիւն կատարել, ընդդիմադիր «Հայաստան» եւ «Պատիւ Ունեմ» խմբակցութիւններու պոյքոթին պատճառով: Առաջին փուլով ընտրութեան համար անհրաժեշտ էր առնուազն 81 թեր քուէ: Մարտ 3-ին, խորհրդարանի 107 պատգամաւորներէն 71-ին թեր ձայներով Խաչատրեան ընտրուեցաւ նախագահ։
Հանրապետութեան նախագահը պաշտօնը պիտի ստանձնէ Ազգային ժողովի յատուկ նիստին, որ արտակարգ ընտրութեան պարագային կը գումարուի հանրապետութեան նախագահի ընտրութենէն ետք՝ 10-րդ օրը:
Վարչապետ Փաշինեան շնորհաւորեց եւ ըսաւ.- «Դուք պաշտօնն ստանձնում էք Հայաստանի ապագայի համար կարեւոր ժամանակահատուածում, երբ գտնւում ենք տարածաշրջային եւ միջազգային մարտահրաւէրների բարդ շրջանում»:
Նորընտիր նախագահին շնորհաւորական ուղերձ յղեց նաեւ Ռուսիոյ նախագահ Վլատիմիր Փութին։
