0
0
ՍՏԵՓԱՆԱԿԵՐՏ․- Մայիս 11-ին «Գրիգոր Նարեկացի» համալսարանին մէջ կայացաւ Հայոց ցեղասպանութեան 108-ամեակին նուիրուած գիտական համագումար մը` «Արցախի մէջ ցեղային զտման ատրպէյճանական քաղաքականութիւնը» նիւթով: Գիտաժողովին ողջոյնի խօսքով հանդէս եկաւ «Գրիգոր Նարեկացի» համալսարանի նախագահ Սեւակ Յակոբեանը: Ան ներկաները ողջունելէ ետք մաղթեց արդիւնաւէտ աշխատանք եւ քննարկումներ:
Արցախի կրթութեան գիտութեան, մշակոյթի եւ մարմնակրթութեան նախարար Նորայր Մկրտչեան ողջոյնի խօսքին մէջ համոզում յայտնեց, որ գիտական համաժողովը կարեւոր քայլ կը հանդիսանայ գործնական ծրագիրներու յառաջացման եւ իրականացման ուղղութեամբ:
«Գիտաժողովի խորագիրն իսկ կը փաստէ քննարկուող նիւթին կարեւորութիւնն ու արդիականութիւնը, վերջին շրջանին տեղի ունեցած քաղաքական գործընթացները միանգամայն նոր մարտահրաւէրներու առջեւ կանգնեցուցած են մեր հանրութիւնը: Քաղաքակիրթ աշխարհի համակ ուշադրութեան պայմաններուն մէջ Ատրպէյճանը, նուաճելով մեր հայրենիքի նշանակալից հատուածը, աննախադէպ ծաւալներու հասցնելով հայատեացութեան քաղաքականութիւնը եւ քարոզչութիւնը, զուգահեռաբար ձեռնամուխ եղաւ նաեւ հայկական պատմական մշակութային ժառանգութեան բացայայտ ոչնչացման քաղաքականութեան, որ աւելի խորացուց հակամարտութիւնը եւ ընդգծեց Արցախի Հանրապետութեան անկախութեան կարգավիճակի լուծման հրատապութիւնը: Ստեղծուած պայմաններու մէջ առաւել մեծ է թէ՛ հայ քաղաքական գործիչներու եւ թէ՛ մտաւորականութեան դերը մեր ժողովուրդի անվտանգ եւ ճիշդ ճանապարհով առաջնորդելու ու անով իսկ բազում փորձութիւններ յաղթահարած մեր հայրենիքի պահպանումն ու պաշտպանութիւնը երաշխաւորելու գործին մէջ», ըսաւ նախարարը:
Անոր խօսքով, որպէսզի նորէն կարենանք հասնիլ բաղձալի յաղթանակներու եւ ազգային նոր վերածնունդի, պէտք է կարենանք մէկտեղել հայ մտաւոր ներուժը, նորէն միաւորուիլ մեր ազգային նպատակին շուրջ, որ կ՛ուղեկցի դէպի հայրենիքի հզօրացման եւ մեր ազգային իղձերու իրագործման:
«Նիւթը աւելի քան արդիական է, եւ ցաւով փաստեցինք, որ դարաւոր մեր հիմնահարցերը ո՛չ միայն չեն լուծուած, այլեւ կան անոնց սրացման շարժիչ ուժեր եւ նոր սրացման վտանգ», նշեց Սեւակ Յակոբեան:
Գիտաժողովի ընթացքին Ատրպէյճանի հայահալած, ցեղասպան քաղաքականութեան տարբեր դրսեւորումներու մասին զեկուցումներով հանդէս եկան` Արցախի վաստակաւոր իրաւաբան Վլատիմիր Յովսէփեանը, պատմական գիտութիւններու դոկտոր Դաւիթ Բաբայեանը, պատմական գիտութիւններու թեկնածու Լեռնիկ Յովհաննիսեանը, պատմական գիտութիւններու թեկնածու Նունէ Սարումեանը եւ ուրիշներ:
