0
0
Տարիներու ընկալեալ սովորութեան համաձայն, այս տարի եւս Սուրբ Սարգիս Հայոց Առաքելական Եկեղեցւոյ հիմնադրութեան 51-ամեակի տօնակատարութեան առթիւ, Տիթրոյթ ժամանած էր Թեմի Բարեջան Առաջնորդ Տ. Օշական Արք. Չօլոյեան: Կիրակի, առաւօտեան ժամը 10:30ին, Բարձրաշնորհ Սրբազան Հայրը, ընկերակցութեամբ Արժպ. Տէր Հրանդ Քհնյ. Գէորգեանի եւ սարկաւագներու, ուղղուեցաւ խորան:
Սրբազան Հայրը իր օրուայ քարոզին, ըսաւ.- “Այսօրուայ խօսքս պիտի կեդրոնացնեմ երկու գլխաւոր կէտերու վրայ: Առաջին` յստակ նախադասութիւնը որ կ՛ըսէ, Ինք ձեր Աստուածը պիտի ըլլայ, եւ դուք իր ժողովուրդը: Այս նախադասութեան մէջ պիտի զգաք որ Աստուծոյ զօրութիւնը որ մեզի հետ է: Երբ Աստուծոյ զօրութիւնը ունենաք մեր հետ, կը զգան ապահով երբ մենք իր ժողովուրդը ըլլանք եւ կ՛առնենք այդ իքնութիւնը որ մեր սրտին մէջ գրուած է: Աշխարհի ժողովուրդը մեզ Քրիստոնեայ կը կոչեն: Իքնութիւնը որ Քրիստոնեայ անուն է, եւ այդ ինքնութիւնը մեզի չի պատկանիր որպէս անհատ, ընտանիք եւ ազգութիւն, որ տրուած է Աստուծոյ կողմէ Աստուծոյ համար: Շատ կարեւոր է գիտակցիլ այդ ապահովութեան: Ապա, Սրբազան Հայրը իր խօսքը ուղղելով Կիրակնօրեայ վարժարանի աշակերտներուն ըսաւ.- “Ուրախ եմ որ հոս էք, ապահով չէք զգար որ ձեր ծնողաց հետ էք: Այո, աւելի ապահով չէք զգար որ Աստուծոյ ձեռքերուն մէջ էք: Աստուած, Քրիստոս աշխարհ եկաւ, մեր եղբայրը եղաւ, եւ այդ սիրով խոստացաւ մեզ պաշտպանել ամէն տեսակ փորձութիւններէն եւ դժուարութիւններէն, այս է օրհնութիւնը Աստուծոյ որ մեր սրտերուն մէջ է: Սիրելի եղբայրներ եւ քոյրեր, երբ կը խօսինք Աստուծոյ ապահովութեան մասին, ձեր մեծ ծնողները, ծնողները զգացին այդ ապահովութիւնը եւ կառուցեցին այս Եկեղեցին ապագայ սերունդի ապահովութեան համար: Եկեղեցին միայն աղօթքի վայր մը չէ, եւ ոչ ալ կառոյց մը, որ ժողովուրդը կու գայ եւ կ՛աղօթէ, Եկեղեցին մեր տունն է, եւ այս ժողովուրդը գիտցաւ Աստուծոյ տան կարեւորութեան: 120 տարիներ առաջ ձեր մեծ մեծ ծնողքները եկան այս երկիրը, շատ դժուար եւ տագնապալից ժամեր էին, հալածուած մեր հայրենիքին մէջ, եկան այս օրհնեալ երկիրը մեծ յոյսով: Եւ գիտէք որ շատ դժուար պայմաններ ունեցան, բնակարան չունէին, գաղթականներ էին, երբեմն մէկ տան մէջ 6-8, հոգի կ՛ապրէին մէկ սենեակի մէջ, բայց ունէին տեսիլք մը, եւ պատմութեան ամենէն գեղեցիկ փորձառութիւնը: Նախքան իրենց տուները շինելը, միասնաբար կառուցեցին Աստուծոյ տունը: Ինչու, գիտցան որ եթէ Աստուծոյ տունը չշինեն, իրենց ապագան կը կորսնցնեն, համայնք պիտի չունենային եւ ոչ ալ ազգութիւն: Ահաւասիկ դուք էք ժառանգորդը այդ տեսիլք ունեցող ժողովուրդին“:
Պատարագի աւարտէն ետք, Եկեղեցւոյ յարակից “Լիլիըն Առաքելեան“ սրահին մէջ, տեղի ունեցաւ Եկեղեցւոյ հիմնադրութեան 51րդ տարեդարձի ճաշկերոյթը հովանաւորութեամբ Առաջնորդին: Ներկայ էին Հայ Կաթողիկէ Ս. Վարդան, եւ Հայ Աւետարանական եկեղեցիներու հոգեւոր հայրերը, Գերպ. Տ. Անտոն Ծ. Վրդ. Ադամեան, Պատուակալ հովիւ Վերպ. Դոկտ. Վահան Թութիկեան եւ Պատուելի Շանթ Պարսումեան, Կիլիկեան Իշխան Տէր եւ Տիկ. Ճան եւ Ռոզ Մանուկեան, իշխանուհի Տիկ. Էմմա Սողոյեան, թեմիս Ազգային վարչութեան ներկայացուցիչ Պրն. Րաֆֆի Ուրլեան, եկեղեցւոյ հոգաբարձութեան անդամներ, Հ.Յ.Դաշնակցութեան “Ազատամարտ“ կոմիտէութեան, եւ քոյր միութիւններու անդամներ, շուրջ 225 հոգի: Ձեռնարկը հանդիսավարեց հոգաբարձութեան անդամ Սեպուհ Սարգիսեան, ան բեմ հրաւիրեց տիկ. Անն Մովսէսեանը որ դաշնակի ընկերակցութեամբ երգեց Ամերիկայի եւ Հայաստանի օրհներգները:
Ճաշի սպասարկութենէն առաջ, յարգելի հանդիսավարը հրաւիրեց Արժպ. Տ. Հրանդ Գէորգեանը փոխանցելու իր խօսքը: Տէր Հայրը կարեւորեց միասնաբար սիրով համադրուած գործակցութիւն եւ աշխատանք, որպէսզի կատարուած աշխատանքը արդիւնաւորուի եւ հասնի իր նպատակին:
Ճաշի ընթացքին Պրն. Հէրի Յովակիմեան (ջութակ) նուագեց Կոմիտասէն, Խաչատուրեանէն եւ այլ երգահաններու ստեղծագործութիւններէն կտորներ: Ապա. Սեպուհ Սարգիսեան շնորհակալութիւն յայտնեց Սրբազան Հօր, ներկայ հիւր հոգեւորականներուն եւ հասարակութեան: Համառօտ գիծերու մէջ անդրադարձաւ հոգաբարձութեան կատարած աշխատանքներուն: Որմէ ետք, օրդ. Սանան Մալգճեան արտասանեց Վահան Թէքէեանի “Լուսաւորչի Կանթեղը, օրդ. Մէրի Գարմէն դաշնակի վրայ նուագեց Կոմիտասէն կտոր մը, իսկ Գեղամ Ճալհայեան արտասանեց “Մայրիկը“: Այնուհետեւ օրիորդներ. Արաքսի Թոսունեան. Մէրի Գարմէն եւ Թամար Չէնկէլեան երաձայն երգեցին “Հայրապետական Մաղթանք“ը եւ Կոմի-տասի “Բաղի Պար“ը:
Գեղարուեստական բաժինի աւարտին, 19 զոյգեր որոնք 51 եւ աւելի տարիներ ամուսնացած են, Տէր Հօր եւ հոգաբարձութեան կողմէ պատրաստուած յատուկ գնահատագիր ստացան ձեռամբ Սրբազան Հօր:
Այնուհետեւ Սրբազան Հայրը փոխանցեց օրուայ պատշաճ պատգամը.- “Այսօր կը տօնենք Եկեղեցւոյ հիմնադրութեան 51րդ ամեակը, իրականութեան մէջ համայնքը աւելի եկար կեանք ունի: Ամէն անգամ որ կը տօնենք տարեդարձ մը, մեզի յիշեցում մըն է, մեր պարտականութիւններու եւ Եկեղեցւոյ նկատմամբ: Ձեր հայրերը որոնք ունեցան այդ տեսիլքը շինելու ոչ միայն Եկեղեցի որպէս ֆիզիքական կառոյց, այլ նաեւ Համայնքի կեանքը: Կը շնորհաւորեմ ձեզ, եւ կը մաղթեմ որ երկար տարիներ եւս տօնէք, որովհետեւ ինչպէս տեսանք այդ գեղեցիկ երեւոյթը որ պատուեցիք 51- եւ աւելի երկար տարիներ ամուսնացեալ զոյգերը, որպէս ազգային գաղութ պիտի գոյատեւենք այսպիսի ոգիով: Վստահ եմ որ երկար տարիներ ունինք մեր առջեւ: Եւ ինչու ունինք Հայ ընտանիք, որովհետեւ ազգութիւնը պահողը ընտանիքն է: Հռոմէական կայսրութիւնը կործանեցաւ ինչպէս պատմաբանը կ՛ըսէ.- որովհետեւ ամբողջ կայսրութեան մէջ ընտանեկան սրբութիւնը կործանած էր: Այս մէկը մեզի համար շատ կարեւոր է, որպէս հայ, որովհետեւ մեր վստահութիւնը կը դնենք հայ ընտանիքի արժէքին մէջ, մեր պարագային ընտանիքը հիմնաքարն է մեր գոյատեւման: Եւ փրկութիւնը հայ ընտանիքին դպրոցն է, ուր մեր զաւակներըն իրենց ուսումը եւ ազգային դաստիարակութիւնը կը ստանան, Եկեղեցւոյ մէջ իրենց մայրերուն հետ կաղօթէն ուրեմն զօրաւոր հիմը կարեւոր է մեր ազգային պահպանման եւ գոյատեւման: Եւ մանաւանդ այս օր, այլ մարդիք կը հետեւին տարբեր օրէնքի ուսուցումներուն: Որպէս հայ ընտանիք կը հետեւինք Աստուածային օրէնքին, եւ ոչ թէ մարդկային օրէնքին: Եւ այս է պատճառը որ մեր ազգը զօրաւոր է, եւ գոյատեւեց անկախ այդ դժուարութիւններուն, հալածանքներուն եւ ջարդի որուն ենթարկուեցանք: Սիրելիներ, ձեր օրինակելի պատճառներով է որ կարողացանք գոյատեւել, եւ մեր ոյժը առնել մեր զաւակներէն ու ընտանիքէն: Որովհետեւ հայ ընտանիքին մէջ իրար նկատմամբ կայ յարգանք, հաւատարմութիւն, անկեղծութիւն, սրբութիւն: Եւ միութեան արժէքները որոնք կը մնան մեզի հետ եւ կը քաջալերեն մեզ ձգտելու ապագային որպէս համայնք եւ ազգութիւն: Այսօր կը տօնենք 51րդ տարեդարձը Եկեղեցւոյ հիմնադրութեան, այս եւս ընտանիք մըն է, մենք ալ կը տօնենք նոյն արժէքները ինչպէս շեշտեցի, միշտ հնազանդիլ Աստուծոյ օրէնքներուն: Այնուհետեւ Սրբազան հայրը 19 զոյգերը շնորհաւորեց եւ մաղթեց առողջութիւն եւ 25 երկար տարիներ եւս: Ապա իր խօսքը ուղղելով երիտասարդ զոյգերուն թելադրեց հետեւիլ նոյն օրինակին“:
“Կիլիկիա“ երգեցողութեամբ, տօնակատարութիւնը հասաւ իր աւարտին:
ԱՆԴՐԱՆԻԿ
ԳԱՐԱՏՕԼԵԱՆ
