0
0
Կիրակի, Ապրիլ 9-ին, Մեծի Տանն Կիլիկիոյ Կաթողիկոսութեան Սուրբ Գրիգոր Լուսաւորիչ Մայր Տաճարին մէջ մատուցուեցաւ Զատկական Հայրապետական Սուրբ Եւ Անմահ Պատարագ, որուն ընթացքին Արամ Ա. շԿաթողիկոսը յղեց իր Հայրապետական պատգամը։ Նորին Ս. Օծութեան առընթերակայ եպիսկոպոսներն էին Մայր Տաճարի լուսարարապետ Գերշ. Տ. Կոմիտաս Արք. Օհանեան եւ «Կիլիկիա» մատենադարանի, հնատիպերու ու ձեռագիրներու բաժանմունքներու տեսուչ Գերշ. Տ. Շահան Արք. Սարգիսեան։ Ս. Պատարագի երգեցողութիւնը կատարեց Կաթողիկոսարանի «Շնորհալի» երգչախումբը:
Նորին Սրբութիւնը իր պատգամին մէջ կոչ ուղղեց ժողովուրդի զաւակներուն Քրիստոսի հրաշափառ Յարութեան հաւատքով շաղախելուիրենց կեանքը։ «Մեր պատմութիւնը ահաւոր տագնապներով լեցուած է. մեր եկեղեցին երբեք չէ վհատած, այլ Քրիստոսի Յարութեան հաւատքով դարձած է ամուր կռուան մեր ազգին ու հայրենիքի գոյութեան, զօրեղ վահան՝ մեր ազգն ու հայրենիքը ընկճելու ու գերելու ամէն տեսակ փորձերուն դէմ։ Չմոռնանք, որ Հայոց Ցեղասպանութենէն ետք մեր եկեղեցին մեր ազգի կեանքին մէջ դարձաւ Յարութեան հաւատքով ամրապնդող եւ մեր հաւաքական կեանքը Յարութեան շունչով թրծող յարուցեալ Քրիստոսի պատգամաբերը։ Մեր եկեղեցին իր առաքելութեամբ ու ծառայութեամբ մեր ազգին փոխանցեց Քրիստոսի թափուր գերեզմանէն ճառագայթող յարուցեալ կեանքի յոյսը եւ կեանքի չարիքներուն ու մահուան դէմ պայքարելու յարութեան հաւատքը», շեշտեց Արամ Ա.։
Խօսելով ներկայ ժամանակներուն մասին՝ Արամ Ա. Կաթողիկոս ըսաւ. «Մեր ժողովուրդի պատմութեան ներկայ տագնապալից ժամանակներուն, երբ Արցախը նոր ցեղասպանին կողմէ կը մնայ շրջափակուած, երբ Հայաստանը նոյն ցեղասպանին կողմէ միշտ կը մնայ ենթակայ յարձակումներու, մարդկային իրաւունքներու ու արժէքներու դէմ նկատուող այս կացութեան դիմաց, մեր եկեղեցին չի կրնար անտարբեր մնալ։ Մեր հայրենիքին ու ազգին պաշտպանութեան պայքարի առաջին գիծին վրայ եղած է միշտ մեր եկեղեցին՝ Վարդանանց պատերազմէն սկսեալ մինչեւ Սարդարապատ ու Արցախ։ Այսօր յարուցեալ Քրիստոս իր եկեղեցւոյ ճամբով կոչ կ՚ուղղէ մեր ժողովուրդի զաւակներուն՝ յԱրցախ, ի Հայաստան եւ ի սփիւռս աշխարհի՝ ըսելով մի՛ վախնաք, ես ձեզի հետ եմ։ Յարուցեալ Քրիստոսի մահուան դէմ տարած յաղթանակով հզօրացած մենք պէտք է շարունակենք մեր պայքարը յանուն արդարութեան, յանուն իրաւունքի ու արժանապատուութեան, յանուն Արցախի, Հայաստանի եւ մեր ազգի հզօրութեան», պատգամեց Նորին Սրբութիւնը։
Յաւարտ Ս. Պատարագին, Հայրապետական թափօրը մեծաշուք հանդիսութեամբ ուղղուեցաւ Վեհարան, ուր բոլոր ներկաները միասնաբար երգեցին «Կիլիկիա» օրհներգը եւ Հայրապետական մաղթերգը։ Ապա, Հայրապետը օրհնեց ներկայ հաւատացեալները՝ անգամ մը եւս աւետելով՝ Քրիստոս յարեաւ ի մեռելոց. օրհնեալ է Յարութիւնն Քրիստոսի։ Հուսկ, Հայրապետը Զատկական շնորհաւորութիւնները ընդունեց Վեհարանի դահլիճին մէջ։
