ՍՈՒՐԲ ԾՆՆԴԵԱՆ ԵՒ ԱՍՏՈՒԱԾԱՅԱՅՏՆՈՒԹԵԱՆ ՏՕՆԸ ՆՇՈՒԵՑԱՒ ՄԵԾԻ ՏԱՆՆ ԿԻԼԻԿԻՈՅ ՀԱՅՐԱՊԵՏԱՆԻՍՏ ՎԱՆՔԻՆ ՄԷՋ

0 0
Read Time:3 Minute, 51 Second

Ուրբաթ, Յունուար 6-ին, Սուրբ Ծննդեան տօնը հանդիսաւորապէս նշուեցաւ Սուրբ Գրիգոր Լուսաւորիչ Մայր Տաճարին մէջ։ Զանգերու ղօղանջներուն ներքոյ Հայրապետական թափօրը Վեհարանէն ուղղուեցաւ դէպի Մայր Տաճար, ուր Արամ Ա․ կաթողիկոսը մատուցեց Սուրբ եւ Անմահ Պատարագը։

Ստուար թիւով հաւատացեալ ժողովուրդի շարքին ներկայ էին նաեւ Լիբանանի մօտ Հայաստանի Հանրապետութեան դեսպանատան կազմը՝ գլխաւորութեամբ դեսպանին, Մեծի Տանն Կիլիկիոյ Կաթողիկոսութեան Ազգային Կեդրոնական Վարչութեան համա-ատենապետները եւ անդամները, պետական եւ ազգային երեսփոխաններ, կազմակերպութիւններու ու կառոյցներու վերին մարմիններու ներկայացուցիչներ։

Վեհափառ Հայրապետը իր պատգամը սկսաւ՝ հաստատելով, թէ «Բեթղեհէմը դարձաւ յոյսի աղբիւր, որովհետեւ Բեթղեհէմի մէջ ծնաւ տառապանքով լեցուն համայն մարդկութեան երկնային յոյսը։ Արդարեւ, մարդը հեռացած էր Աստուծմէ։ Տագնապներով լեցուն էր մարդկութիւնը եւ կը սպասէր երկնային յոյսի գալստեան։ Բեթղեհէմի ճամբով Աստուած կու գար մարդկութեան յոյս ներշնչելու. Բեթղեհէմի ճամբով Աստուած կու գար ըսելու, թէ ինք է ճշմարիտ ու յաւիտենական յոյսը աշխարհին. եւ ով որ մօտենայ այս յոյսին ու հաւատայ անոր, պիտի վերականգնի ու փրկուի։ Իր երկրաւոր առաքելութեան ընթացքին Քրիստոս յաճախ անդրադարձաւ յոյսին. այն յոյսին, որ հաւատքով կռանուած է, սիրով լեցուած ու Քրիստոսի փրկարար երկրորդ գալուստի տեսլականով մղուած։ Նոյն մօտեցումով առաքեալներ յիշեցուցին Քրիստոսի հետեւորդներուն, որ կեանքի տագնապները պէտք է յաղթահարել Քրիստոսի ճամբով աշխարհին յայտնուած երկնային յոյսով։ Եկեղեցին, իր կարգին, պատմութեան տագնապներուն դիմաց դարձաւ յոյսի վկան ու պատգամաբերը»։

Շարունակելով իր պատգամը, Վեհափառ Հայրապետը ըսաւ՝ «Բեթղեհէմը ո՛չ միայն դարձաւ երկնային յոյսի ծնունդ տուող վայրը, այլ՝ նաեւ երկնային յոյսի հրաւէրը, եկեղեցւոյ ճամբով ուղղուած աշխարհին։ Արդարեւ, յոյսը ոչ միայն քրիստոնէական բարոյական արժէքներու համակարգին մաս կազմող արժէք է, այլ՝ քրիստոնէական կեանքին որակ ու կոչում, ինքնութիւն ու նպատակ տուող աստուածային պարգեւ է։ Մկրտութեան ժամանակ երեխան քրիստոնեայ կը դառնայ լեցուելով հաւատքի, յոյսի ու սիրոյ երկնային շնորհներով։ Արդ, յուսահատութիւնը տեղ պէտք չէ ունենայ քրիստոնեայի կեանքին մէջ։ Յոյսը պէտք է դառնայ իր կեանքը իմաստաւող, հզօրացնող ու առաջնորդող ուղեցոյցը»։ Անդրադառնալով ներկայ ժամանակներուն, Նորին Սրբութիւնը ըսաւ. «Այսօր, կը նշենք երկնային յոյսին էջքը Բեթղեհէմ, անոր մարդեղացումը ու գալուստը աշխարհ։ Այսօր, Բեթղեհէմի յոյսը կը հրաւիրէ մեզ երկրի վրայ մեզ շրջապատող բոլոր տեսակի կեղծ, ժամանակաւոր, ապականիչ ու խաբուսիկ յոյսերը մերժելու եւ դառնալու աշխարհի ճշմարիտ յոյսին։ Բեթղեհէմի յոյսով լեցուած մարդը պէտք չէ ընկճուի յուսահատութեան մղող երկրաւոր կեանքի տագնապներէն, այլ՝ հաւատքով փարի յոյս կենարար ուժին»։

Ապա Վեհափառ Հայրապետը ըսաւ. «Այսօր յուսահատութիւնը շրջապատած է մեր ազգին կեանքը։ Սակայն, հաւատքով հզօրացած, մենք կը մերժենք մեզ յուսահատութեան առաջնորդող որեւէ երեւոյթ ու կացութիւն։ Այսօր, անմարդկային միջոցներով շրջապատումի ենթարկուած Արցախի ժողովուրդը յոյսով հզօրացած՝ կը մերժէ տեղի տալ որեւէ պարտադրանքի, որ հարցականի տակ կ՚առնէ իր ինքնորոշման իրաւունքը։ Այսօր, ներքին բեւեռացումներով լեցուն հայրենի ժողովուրդը կը մերժէ, պէ՛տք է մերժէ, բոլոր տեսակի պարտադրանքները, դիւանագիտութեան խաբուսիկ քօղով զարդարուած, որոնք կրնան վտանգել Հայաստանի ամբողջականութիւնը ու անկախութիւնը։ Սփիւռքի տարբեր պայմաններուն մէջ ապրող մեր գաղութները պէտք է մերժեն որեւէ մէկ մտածելակերպ, կենցաղակերպ կամ գործելակերպ, որ կրնայ վտանգել քրիստոնէական ու ազգային արժէքներով շաղախուած մեր հայու ինքնութիւնը։ Ճշմարիտ յոյսը կրաւորական ու սպասողական հոգեվիճակ մը չէ։ Ճշմարիտ յոյսը Սուրբ Հոգւոյ ներգործութեամբ հզօրացած ու հաւատքով թրծուած քաջարի կեցուածք է, գործօն մասնակցութիւն է, տոկուն վճռականութիւն է կեանքի բոլոր տեսակ տագնապներուն նկատմամբ»։

Եզրակացնելով իր Հայրապետական պատգամը, Նորին Սրբութիւնը ըսաւ. «յոյսի պատգամը մեզի կու գայ յոյսի աղբիւրէն՝ Բեթղեհէմէն, ուր Աստուած մեզի հետ եղաւ, որպէս յոյսը աշխարհին. եւ այսօր ու միշտ Աստուած Բեթղեհէմի ճամբով միշտ մեզի հետ է։ Դառնանք յոյսի աղբիւրին եւ մեր կեանքը լեցնենք այդ աղբիւրէն առատօրէն հոսող յոյսով, որպէսզի կարենանք կեանքին պարտադրած բոլոր տեսակի տագնապները ու չարիքները յաղթահարել»։

Վեհափառ Հայրապետը իր պատգամին սկիզբը եղբայրական սիրով ողջունեց Ամենայն Հայոց Կաթողիկոս Գարեգին Բ. Կաթողիկոսը՝ մաղթելով քաջառողջութիւն եւ աստուածահաճոյ ծառայութիւններով լեցուն եր­կար գահակալութիւն։

Եկեղեցական արարողութեանց աւարտին, Վեհափառ Հայրապետը Վեհարանի դահլիճին մէջ ընդունեց քաղաքական եւ պետական անձնաւորութիւններուն, ինչպէս նաեւ ներկայ մեր ժողովուրդի զաւակներուն շնորհաւորութիւններն ու բարեմաղթութիւնները:

Հինգշաբթի, Յունուար 5-ի երեկոյեան, նախագահութեամբ Արամ Ա. Վեհափառ Հայրապետին, Սուրբ Գրիգոր Լուսաւորիչ Մայր Տաճարին մէջ մատուցուեցաւ մեր Տիրոջ եւ Փրկիչին՝ Յիսուս Քրիստոսի ծննդեան Ճրագալոյցի Սուրբ եւ Անմահ Պատարագը։

Հայրապետական թափօրը «Խորհուրդ մեծ» շարականի երգեցողութեամբ ուղղուեցաւ Վեհարան, ուր տեղի ունեցաւ տնօրհնէքի արարողութիւն։ Հայրապետը, օրհնելով կեանքի խորհրդանիշ ջուրը, հացն ու աղը, նաեւ օրհնեց ներկայ հաւատացեալ ժողովուրդը եւ աւետեց Քրիստոսի Սուրբ Ծնունդը։

Վեհափառ Հայրապետը յատուկ խօսք արտասանեց եւ Արցախի հայութեան համար աղօթք բարձրացուց առ Աստուած։ Նորին Սուրբ Օծութիւնը կոչ ուղղեց, որ «Աստուածայայտնութեան եւ Ս. Ծննդեան տօնին առիթով բոլորս միասնաբար աղօթենք, որ Աստուած Իր երկնային բարիքներով լեցնէ Արցախի մեր ժողովուրդի սիրելի զաւակները, որոնք 22 օրերէ ի վեր տագնապի մէջ կ՚ապրին։ Թող Աստուած խաղաղութիւն ու արդարութիւն պարգեւէ արցախահայութեան։ Մենք ալ, մեր կարգին, ժողովուրդ հայոց, աղօթե՛նք Արացխի մեր ժողովուրդին համար եւ միաժամանակ մեր ամբողջական զօրակցութիւնը յայտնենք՝ նոյն եւ մէկ ազգի պատկանելիութեան խոր գիտակցութեամբ։ Արցախի մեր հայրենակիցները թող իմանան, թէ ողջ Սփիւռքը, յատկապէս Մեծի Տանն Կիլիկիոյ Կաթողիկոսութիւնը՝ իր թեմերով, կառոյցներով, Միաբանութեամբ իր կողքին է, արդարութեա՛ն կողքին է։ Թող Աստուած, մեր Տիրոջ՝ Քրիստոսի յայտնութեամբ ու ծնունդով բացուող նոր տարին, մեր ժողովուրդի կեանքին բերէ լոյս եւ յոյս. թող զօրացնէ մեր ազգին հաւատքը եւ պարգեւէ արդարութիւն ու խաղաղութիւն՝ թէ՛ մեր ազգին եւ թէ ողջ մարդկութեան»։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles