ՍՈՒՐԲ ԹԱԴԷԻ ՈՒԽՏԱԳՆԱՑՈՒԹԻՒՆՆԵՐՈՒ 60ՐԴ ՕՂԱԿԸ ՀԱՒԱՏՔԻ ԱՄՈՒՐ ՄԱՆԵԱԿԸ ԱՄՐԱՑՈՒՑ ՀԱՄԱՅՆ ՀԱՅՈՒԹԵԱՆ ՎԻԶԻՆ

0 0
Read Time:5 Minute, 43 Second

p6  h Ատրպատական, Ազգային Առաջնորդարանի դէպի Սուրբ Թադէ կատարուած հաւատքի ուխտագնացութիւններու վերսկսման 60րդ տարեդարձը կատարելով, ինչպէս նաեւ Ատրպատականի Հայոց Թեմի հիմնադրութեան 770ամեակը տօնախմբելով, ընդհանրապէս Իրանահայութիւնը եւ մասնաւորապէս Ատրպատականի հայութիւնը ապրեցաւ պատմական օրեր, եռօրեայ կեցութեամբ Վանքի վեհավայրին մէջ, Յուլիս 31էն մինչեւ Օգոստոս 2, 2014:

Հովանաւորութեամբ Ատրպատականի Հայոց Թեմի Առաջնորդ՝ Գերշ. Տ. Գրիգոր Ս. Եպս. Չիֆթճեանի, 60րդ տարին ըլլալով Իրանի տարբեր քաղաքներէն եւ արտասահմանէն մեծաթիւ ուխտաւորներ ժամանեցին Ս. Թադէի Վանքը, ժամասացութեամբ, Ս. Պատարագով եւ ազգային ժողովրդային տօնախմբութեամբ կատարելու Ս. Թադէոս Առաքեալի եւ Ս. Սանդուխտ Կոյսի տօնը:
Ազգային Վարչութեան հովանաւորութեամբ, Վանքերու ուխտագնացութեան յանձնախումբի ջանքերով եւ 60ամեակի առիթով կեանքի կոչուած մշակութային յատուկ յանձնախումբի աշխատանքով, եռօրեայ ուխտագնացութեան ծրագիր պատրաստուած էր:p6 a
Ժամանման թուական նկատի առնուած էր Հինգշաբթի Յուլիս 31ի օրը: Նախապէս Վանքի շրջապատին մէջ լարուած հարիւրաւոր վրաններու ապահովումը կատարած ըլլալով, ուխտաւորներ տեղաւորուեցան, նախապատրաստուելով առաջիկայ երկու օրերու յայտագրերուն:
60ամեակի մշակութային յանձնախումբի կողմէ ուխտաւորներու երեխաներուն յատուկ յայտագրեր՝ խաղեր եւ մրցոյթներ կազմակերպուած էին, ինչպէս ճատրակի մրցում, ուրախ ժամանց եւ ազատ բեմ եւ այլ հաճելի խաղեր, որպէս սկիզբ ազգային խանդավառ ուխտաւորութեան: Յայտնենք, թէ 60ամեայ ուխտագնացութիւններու շարանը պատկերացնող լուսանկարներու ցուցահանդէս եւս կազմակերպուած էր Տաճարի արեւմտեան շրջափակին մէջ, ցոյց տալու յատկապէս այն հաւատքը, որ ունեցած են Ատրպատականի անցնող սերունդի զաւակները, Վանքին մէջ բնակութեան անյարմար օրերուն իսկ հիմը դնելով ուխտագնացութեան: Լուսանկարները պատկերացում կու տային այն դժուարին պայմաններուն՝ ճամբու չգոյութեան, ջուրի մատակարարման դժուարութեան, վրաններու խեղճութեան ու մանաւանդ փոխադրամիջոցներու անյարմարութեան մասին, եւ սակայն ժողովուրդը սիրով ընդառաջած էր Ազգային Իշխանութեան հրաւէրին, ու իր մասնակցութեամբ կեանք եւ շունչ տուած դարաւոր վանքի սրբատաշ քարերուն:
p6 bՕրուան աւարտին, հոգեւոր հայրերու կողմէ որպէս գոհաբանութիւն, կատարուեցաւ երեկոյեան ժամերգութիւն, բարեպաշտ հաւատացեալներու աղօթական ներկայութեան:
Ուխտագնացութեան երկրորդ օրը բացուեցաւ առաւօտեան ժամերգութեամբ, երբ շրջակայ լեռներուն մէջ դարձեալ զնգաց Ս. Թադէի մելանոյշ զանգը, վրանաքաղաքի բարեպաշտ ժողովուրդը հրաւիրելով աղօթքի ու զԱստուած փառաբանելու երջանիկ պահուան:
Տաճարի շրջափակին մէջ զետեղուած յատուկ տաղաւարներու ներքեւ կը վաճառուէին նաեւ այս տարուան համար պատրաստուած յուշանուէրներ, Ս. Թադէի վանքի պատկերով վերնաշապիկներ, մանուկներու համար փուչիկներ, պնակների մէջ Թաւրիզահայ արուեստագիտուհի Անայիս Խալաֆեանի կողմէ նկարուած Ատրպատականի վանքերու պատկերներ, ինչպէս նաեւ տարբեր յուշանուէրներ, վիճակախաղի յատուկ զարդեր եւ պարգեւներ, որոնց բոլորին հասոյթէն գոյացած գումարը պիտի յատկացուի Թեմի վանքերու բարեզարդման ու պահպանման:
Նոյն օր դարձեալ շարունակուեցան երեխաներու յատուկ մրցութիւններ եւ պարգեւներ բաշխուեցան յաղթողներուն:p6 c
Ապա, երեկոյեան Վանք ժամանեցին Թեհրանի Հայոց Թեմի Առաջնորդ Գերշ. Տ. Սեպուհ Ս. Արք. Սարգիսեանն ու Ատրպատականի Հայոց Թեմի Առաջնորդ՝ Գերշ. Տ. Գրիգոր Ս. Եպս. Չիֆթճեանը: Ժողովրդային դիմաւորութիւն տեղի ունեցաւ Վանքի հիւսիսային դրան առջեւ, եւ աղ ու հացի օրհնութենէն ետք, Սրբազան հայրերը ուղղուեցան դէպի Տաճար ուր կատարուեցաւ կանոնական աղօթք: Այս առիթով Առաջնորդ Սրբազանը բարի գալստեան խօսք ուղղեց ուխտաւորներուն եւ Թեհրանի Հայոց Առաջնորդին, որ նաեւ իր սրտի խօսքը փոխանցեց ուխտաւորներուն:
Տաճարին մէջ կատարուեցաւ Գիշերային ժամերգութիւն, մասնակցութեամբ հոգեւորականաց դասուն եւ բարեպաշտ ուխտաւոր ժողովուրդին: Այս տարի եւս, եկեղեցւոյ մէջ զետեղուած գամերով լեցուն հսկայ խաչին վրայ ուխտաւորներ իրենց սրտի փափաքները արձանագրեցին ու դրին, խնդրելով Ս. Թադէոս Առաքեալին եւ Ս. Սանդուխտ Կոյսին բարեխօսութիւնը:
Գիշերուան ուշ ժամերէն սկսեալ մինչեւ առաւօտեան ժամը 4, եկեղեցւոյ արեւմտեան շրջափակին մէջ տեղի ունեցաւ երիտասարդական հաւաք եւ ազատ բեմ, ղեկավարութեամբ Կարէն Սարգիսեանի: Ներկայ երիտասարդութիւնը երգերով պարերով մեծ խանդավառութիւն վայելեց: Առաւօտեան ժամը 4ին խօսք առնելով, Առաջնորդ Սրբազանը իր մեծ գոհունակութիւնը յայտնեց տաղանդաշատ երիտասարդութեան սրտաբուխ մասնակցութեան համար, յատկապէս շեշտելով եկեղեցւոյ հովանաւորութեան ներքոյ ապրելու եւ մնալու անհրաժեշտութիւնը. “Ս. Թադէի այս գմբէթներու մագնիսացնող ուժն է որ ձեզ համախմբած է այստեղ: Մի հեռանաք մեր եկեղեցիէն, անոր առաջնորդութիւնը եւ մեր ազգային արժէքներն են որոնք մեր ցեղային ինքնութիւնը կը կազմեն“ ըսաւ Սրբազանը: Վերջապէս, ան բարձրօրէն գնահատեց անոնց եկեղեցասիրութիւնը, ազգասիրութիւնը եւ հայրենասիրութիւնը, մեծ ծափողջոյններ խլելով խանդավառ երիտասարդութենէն:p6 d
Տաճարի սրբազան կամարներու ներդաշնակ դարաւոր արձագանգի խորհրդաւորութեան մէջ, Ատրպատականի Հայոց Թեմի “Կոմիտաս“ երգչախումբը համերգով հանդէս եկաւ, ղեկավարութեամբ երաժիշտխմբավար Վարդան Վահրամեանի:
Ընտրեալ երգերու փունջով, երգչախումբը Վանքի կամարներու ձիգ սիւները քնարի ու տաւիղի լարերի վերածեց, հին հին դարերէն յիշատակ մնացած խորախորհուրդ ապրումներ հաղորդելով ներկաներուն:
Յայտագրի աւարտին, Թեմակալ Առաջնորդը իր բարձր գնահատանքը յայտնեց “Կոմիտաս“ երգչախումբին ու անոր ղեկավարին, յիշելով որ Թեմի պատմութեան ընթացքին, “անցած երկարաշունչ դարերու անմահացած ժամանակահատուածին ինչքա՜ն ձայներ Աստուած են գովերգած Ս. Թադէի վանքին մէջ: Առաւօտեան լոյսի ծագելուն հետ, մինչեւ երեկոյեան մայրամուտ եւ գիշերային խոր լռութեան մէջ, հայ շարականը, հայ երգն ու երաժշտութիւնը անպակաս են եղած այս Վանքէն, որոնց արձագանգը շրջակայ լեռներէն կը լսուի մինչեւ օրս: Իսկ այս համերգը ուրիշ բան չէ՛ եթէ ոչ՝ դարձեալ շքեղ մէկ արձագանգը նախորդ դարերու հայ երգին ու երաժիշտներու ստեղծագործութիւններուն“ ըսաւ Գրիգոր Սրբազան, եւ իր բարձր գնահատանքը յայտնեց ե՛ւ խմբավարին, ե՛ւ երգչախումբին:p6 e
Ժամերգութեան աւարտին, Հ.Մ.Ա.Կ.ի Թաւիրիզի մասնաճիւղի սկաւուտական կազմը կարգապահ շարքերով թափօր կազմեց, եւ Առաջնորդ Սրբազանի ձեռամբ Սուրբ Թադէի Տաճարի խորանէն վառուած մոմը առաջնորդեց դէպի զանգակատան տակը, որտեղ Սրբազան Հօր ձեռամբ վառուեցաւ միջմասնաճիւղային խաղերու ջահը:
Ատրպատականի Հայոց Թեմի Առաջնորդը խօսք առնելով յատկապէս անդրադարձաւ 60տարիներու ուխտագնացութեան շարունակական ընթացքին, ըսելով. “Սա պատգամ է, 60 տարիներու քրիստոնեայիսլամ ներդաշնակ կեանքի խորքէն եկող, որը ուղղուած է համայն աշխարհին, ըսելով՝ իսլամներ եւ քրիստոնեաներ, ձեր խղճին հակառակ մի՛ շարժիք: Մենք կրնանք միասնաբար ապրիլ, ինչպէս ապրած են մեր նախնիք ու կÿապրինք մենք այսօր Իրանի Իսլամական Հանրապետութեան մէջ: Աշխարհը երբեք նեղ չէ՛ տարբեր կրօններու եւ ազգութիւններու կողք կողքի ապրելուն համար: Աշխարհի մէջ չկա՛ն կրօններու յատուկ երկիրներ: Այս աշխարհը Ամենակալ ու Միակ Աստուծոյ կողմէ ստեղծուած է ու հաւասարապէս պարգեւուած համայն մարդկութեան: Այսօր մենք Իրանի մէջ երբ նման յարգանք կը ցուցաբերենք իրարու նկատմամբ, Ս. Թադէի վանքէն ձեզի կը յղենք մեր պատգամը, դուք ալ, հանդուրժողութեամբ ընդունեցէք զիրար, յարգեցէք ձեր կրօնական տարբերութիւնները եւ միասնաբար պայքարեցէք ահաբեկչութեան, մարդասպանութեան, աւերածութեան ու հաւաքական ջարդերու դէմ“ ըսաւ Առաջնորդ Սրբազանը:
p6 fԻր խօսքի երկրորդ մասով, ան անդրադարձաւ Հայոց Ցեղասպանութեան 100րդ տարելիցի նախաշէմին գտնուելու իրողութեան, ըսելով. “Ընդամէնը մէկ տարի մեզ կը բաժանէ մեր ժողովուրդի պատմութեան ամէնէն սեւ տարիին 100ամեակը նշելու թուականէն: Այս վանքին քարերը վկայ, թէ ինչպիսի կոտորածներ են տեղի ունեցած Օսմանցիներու դէպի Իրան ներխուժման շրջանին, որոնք իրենց շուրջ միայն մահ ու աւեր սփռեցին: Սակայն մեր ժողովուրդի հաւատքով եւ Իրանի Իսլամական Հանրապետութեան աջակցութեամբ մոխիրներու տակէն դարձեալ դուրս բերուեցաւ Ս. Թադէն: Վանքի այսօրուան ծաղկուն վիճակը նաեւ խորհրդանիշ է հայ ժողովուրդի յարութեան եւ անմահութեան, որուն համար նաեւ երախտագիտութիւն կը յայտնենք մեր այս հայրենիքին՝ Իրանի պետական աւագանիին՝ սկսած կրօնական առաջնորդէն, մինչեւ նախագահ եւ այլ պատասխանատուներ, մինչեւ դուք՝ յարգելի Կուսակալ“, շեշտեց Սրբազանը:
Պետական յարգանքէն ետք եկեղեցւոյ զանգի ղօղանջին ներքոյ, հոգեւորականաց դասը զգեստաւորուած ընթացաւ դէպի Տաճար: Ս. Պատարագը մատուցեց եւ քարոզեց Թեհրանի Հայոց Թեմի Առաջնորդ՝ Գերշ. Տ. Սեպուհ Ս. Արք. Սարգիսեան: Խորանին կը սպասարկէին Ատրպատականի Հայոց Թեմի քահանայ հայրեր՝ Արժ. Տ. Ներսէս Պասիլեան եւ Արժ. Տ. Առաքել Տմտմեան: Իսկ խորանէն կÿերգէր Արժ. Կ. Կոմիտաս Քհնյ. Թորոսեանը:p6 g
Առաջնորդ Սրբազանը “Հայր Մեր“էն առաջ խորանէն ընթերցեց Արամ Ա. Վեհափառ Հայրապետի Օրհնութեան Գիրը, ձօնուած թէ՛ ուխտագնացութիւններու 60ամեակին, թէ՛ Ատրպատականի Հայոց Թեմի Հիմնադրութեան 770ամեակին: Ապա, ան հրաւիրեց պատարագիչ Սրբազանը, տալու օրուան հոգեւոր պատգամը:
Սեպուհ Սրբազան իր քարոզին մէջ վեր առաւ Ս. Թադէոս Առաքեալի եւ Ս. Սանդուխտ Կոյսի նահատակութեան սրբազան պատկերը, զոհաբերութեան նոյն ոգին տարածուած տեսնելով համայն քրիստոնէական կեանքին վրայ, ներկայ տառապող մարդկութեան առօրեային մէջ:
Սուրբ պատարագի երգեցողութիւնը քառաձայն կատարեց Թաւրիզի “Կոմիտաս“ երգչախումբը, ղեկավարութեամբ Վարդան Վահրամեանի, բարձրորակ կատարումով յաւելեալ աղօթական մթնոլորտ ստեղծելով Տաճարին մէջ հաւաքուած ուխտաւորներուն համար, ի փառս Աստուծոյ:
p6 iԱպա, ներկայ հոգեւորականները բեմ բարձրանալով միասնաբար կատարեցին ջրօրհնէքը սուրբ մասունքներով, որմէ ետք ծայր առաւ թափօրը, Տաճարի հիւսիսային շրջափակէն մինչեւ հարաւային շրջափակը: Աւարտին, Սեպուհ Սրբազանի “Պահպանիչ“ով վերջ գտաւ հանդիսաւոր արարողութիւնը, որ այս տարի 60րդ օղակը ըլլալով անկողոպտելի հաւատքի մանեակին, աստուածային անտեսանելի ձեռքերով ամրացուեցաւ համայն հայութեան վիզին:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles