Սումկայիթի Ջարդերու Տարելից

0 0
Read Time:2 Minute, 23 Second


ԵՐԵՒԱՆ.- Սումկայիթի մէջ, հայերու դէմ կատարուած ջարդերու 34ամեակին առիթով, Հայաստան եւ Արցախ հրապարակեցին յայտարարութիւններ՝ նշելով, որ հայատեացութիւնը եւ ուժի կիրառման սպառնալիքը կը շարունակէ մնալ Ատրպէյճանի պետական քաղաքականութիւնը, ինչ որ ակնյայտօրէն կը հակասէ խաղաղ, զարգացող եւ կայուն տարածաշրջան ունենալու վերաբերող միջազգային ջանքերուն:
Հ․Հ․ Արտաքին Գործոց նախարարութիւնը յայտարարութեամբ մը տեղեկացուց, թէ «Հայերի դէմ կազմակերպուած զանգուածային սպանութիւնները եւ խոշտանգումները, որոնք նպատակ ունէին բռնի ուժով ճնշելու Արցախի հայութեան ժողովրդավարական կամ արտայայտումը եւ ինքնորոշման անքակտելի իրաւունքի իրացումը, հետագայում շարունակուեցին Պաքւում, Կիրովապատում եւ Ատրպէյճանի այլ հայաշատ բնակավայրերում. Լեռնային Ղարաբաղի ժողովրդի կողմից իր հայրենիքում ազատ եւ անվտանգ ապրելու կամքի բարձրաձայնմանն Ատրպէյճանը պատասխանեց հայերի նկատմամբ հաւաքական պատժի քաղաքականութեան իրագործմամբ»։
Արցախի Ազգային ժողովի նախագահ Արթուր Թովմասեան հրապարակեց յայտարարութիւն մը.- «Ցեղասպանութիւնից տառապել եւ տառապում են աշխարհի շատ ժողովուրդներ, ազգեր ու ազգութիւններ, իսկ հայ ժողովրդի համար այն անցեալն է ու ներկան, բայց ոչ երբեք՝ ապագան: 20-րդ դարասկզբին ծնունդ առած արհեստածին պետութիւն Ատրպէյճանն իր կազմաւորման ժամանակներից ի վեր ստանձնել է հայատեաց առաքելութիւն: Ապացոյցը՝ 1988-ին կազմակերպած սումգայիթեան ջարդերն ու պարբերաբար շարունակուող պատերազմներն են:
․․․Խստօրէն դատապարտելով Սումկայիթեան ոճրագործութիւնը եւ արցախահայութեան հանդէպ իրականացուող շարունակական քաղաքականութիւնը՝ կոչ ենք անում քաղաքակիրթ աշխարհին գործուն քայլեր ձեռնարկել հայերի հանդէպ ադրբեջանական ցեղասպան քաղաքականութեան կանխարգելման ուղղութեամբ: Մենք պէտք է դուրս գանք այս ծանր իրավիճակից եւ, մեր պապենական հողում ապրելով, պահանջատէր լինենք մեր իրաւունքներին: Խոնարհումս ատրպէյճանական բռնութիւններին զոհ դարձած մեր հայրենակիցների եւ արցախեան բոլոր պատերազմներում նահատակուած քաջորդիների յիշատակին»:
Հ․Յ․Դ․ Հայաստանի Գերագոյն Մարմինն ալ յայտարարութիւն մը լոյս ընծայեց: Ստորեւ բովանդակութիւնը․-
«Ի պատասխան Հայաստանի եւ Արցախի վերամիաւորման համար Լեռնային Ղարաբաղի Ինքնավար Մարզում սկիզբ առած խաղաղ եւ օրինական ժողովրդական ցոյցերի, 1988 թուականի Փետրուարի 27-ին Ատրպէյճանի Սումկայիթ քաղաքում սկսուեցին տեղի հայ բնակչութեան ջարդերը:
Ատրպէյճանի ղեկավարութեան կողմից հրահրուած ազրպէյճանական հրոսակները տանջամահ արեցին տասնեակ հայերի, հազարաւոր հայ ընտանիքներ, իրենց ետեւում թողնելով տարիների վաստակը, տունն ու գոյքը, դարձան գաղթական: Նրանցից մի մասն ապաստանեց Հայաստանի եւ Արցախի Հանրապետութիւններում, հազարաւոր ընտանիքներ ցրուեցին ամբողջ աշխարհով մէկ:

Ատրպէյճանական իշխանութիւնները չդատապարտեցին ջարդարարներին, չբացայայտեցին յանցագործութեան հեղինակներին ու իրականացնողներին:
Որպէս հետեւանք, Սումկայիթի ջարդերին հետեւեցին հայերի ջարդերն այլ քաղաքներում` Պաքւում, Գանձակում, Շամխորում եւ այլուր:
Դեռեւս 1920 թուականի Շուշիի ջարդերից սկսած` ատրպէյճանական հայատեաց եւ ցեղասպան քաղաքականութիւնը շարունակուեց մեր օրերում եւ առաւել ցայտուն կերպով դրսեւորուեց 44-օրեայ պատերազմի ընթացքում, երբ բնակչութեան դէմ կիրառուեց արգելուած ֆոսֆորային զէնք, իսկ հարիւրաւոր խաղաղ բնակիչներ եւ գերեվարուած զինուորականներ տանջամահ արուեցին:
Այս պայմաններում առնուազն տարակուսելի են Հայաստանի Հանրապետութեան պարտուողական իշխանութեան որդեգրած դիրքորոշումն ու վարած քաղաքականութիւնը:
Որեւէ հայ չի կարող իրեն Ազրպէյճանում ապահով զգալ, ապրել, արարել ու կերտել իր ապագան: Ուստի անընդունելի ու աններելի են Քաղաքացիական պայմանագրի իշխանութիւնների պնդումները, թէ Արցախը կորցրել է անկախ լինելու որեւէ հնարաւորութիւն: Սա ուղղակի նշանակում է Արցախը դատապարտել հայաթափման, իսկ արցախցիներին` բնաջնջման:
Հ․Յ․Դ․ Հայաստանի Գերագոյն մարմինը, յարգանքի տուրք մատուցելով Սումկայիթում եւ այլուր յօշոտուած անմեղ զոհերի յիշատակին եւ գլուխ խոնարհելով արցախեան պատերազմներով զոհուած հերոսների առջեւ, վերահաստատում է իր դիրքորոշումը. Արցախը չի եղել եւ չի լինելու Ազրպէյճանի կազմում: Արցախի հարցը չի կարող լուծուած համարուել, քանի դեռ միջազգայնօրէն չի ճանաչուել ու չի երաշխաւորուել Արցախի ժողովրդի` սեփական միասնական հայրենիքում ազատ ու անկախ ապրելու իրաւունքը»:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles