0
0
“Շարունակած եմ մտածումներս եւ զգացումներս արտայայտել կիրարկած արուեստիս միջոցաւ: Այսպէս, վերջին տարիներուն, վրձինիս եւ ներկիս միջոցաւ կը պատմեմ պատահարներ ու դէպքեր“, կը յայտնէ Սուզան Գրիգորեան, որ բարձր մակարդակի ուսում ստանալէ ետք, Մասաչուսէցի “Tufts“ համալսարանէն եւ “MFA“ (Museum of Fine Arts) հիմնարկէն, հաստատուած է Նիւ Եորք, ուր կը գործէ եւ կը դասաւանդէ:
Ներշնչուած Ռետ Կրումզի, Ֆէյթ Ռինկոլտի, Ռոմարէ Պիրտընի, Ալիս Նիլի, Փօլ Կօկէնի եւ Հանրի Մեթիսի գործերէն, ան նմանօրինակ գոյներ, մտայղացումներ եւ գործեր լոյս կ՛ընծայէ: Դեռ վերջերս, Նիւ Եորքի “Լեքսինկթըն“ պանդոկը յատուկ ապսպրանք մը կատարած էր, դիմելով Սուզանին: 
Արդարեւ, ընդհանրապէս արուեստագէտ իջեւանող յաճախորդներուն յաւելեալ գոհացում պատճառելու համար, սոյն պանդոկի տնօրէնունութիւնը, որոշած էր երգն ու պարը ներկայացնող գործերով զարդարել, պանդոկի սրահին մուտքը:…Եւ այդ մէկը, ամենայն բծախնդրութեամբ եւ հոգատարութեամբ կատարած էր Գրիգորեան: “Մանկութենէս հրապուրուած բնութիւնով, ժամեր անցուցած եմ մեր տան պարտէզին մէջ, բոյսեր եւ ծառեր յանձնելով պաստառին: Գոյները մեծ տպաւորութիւն կը ստեղծեն: Այս գծով, դպրոցէն ներս ալ, դասընկերուհիներս եւ ուսուցիչներս կը հիանային համբերութեանս վրայ: Իսկ այժմ, քանի մը տարիէ ի վեր, մէջս զգացում մը ստեղծուած է հին լուսանկարներ, իւրայատուկ ակնոցովս վրձնահարելու“, կը յայտնէ Գրիգորեան, որ նաեւ դասաւանդած է իր պաշտած գործը, երկրորդական վարժարաններէ ներս:
Հետաքրքրական է նշելը թէ վրձինի հետ կապ ունեցող արհեստէն ներս մասնագիտացած Սուզան, քոյրն է Նէնսիին, որ գիր եւ գրականութեան բնագաւառէն ներս հռչակ սփռած է: Յաւելեալ մանրամասնութիւններու համար կարելի է այցելել Սուզանի դիմատետրը:
