ՍԼԱՔ.- ՏԱՐՕՐԻՆԱԿ ԴԵՂԱԳԻՐ

0 0
Read Time:2 Minute, 27 Second

SM
Ս.Մ.

Քանի մը շաբաթ առաջ, ստամոքսի բաւական լուրջ անհանգստութիւն զգացի։ Կասկածներս կը տարուբերէին պաղառութեան եւ ճաշի հետեւանք՝ թեթեւ թունաւորումի միջեւ։ Թէյ, տնային դարմանումի միջոցներ… արդիւնք չտուին։
Հեռաձայնեցի բժիշկիս, որ նոյն օրն իսկ ժամադրութիւն մը ճշդեց։
Հարց ու փորձ, ընթացիկ քննութիւններ եւ մասամբ նորին։ Կարելի չեղաւ ախտաճանաչում ընել։ Դէմքէն կարելի էր կռահել, որ միտքէն գէշ բաներ ալ կþանցնէին…։ Ճարահատ, զիս ղրկեց իրեն ծանօթ մասնագէտի մը։
Մասնագէտն ալ քննութիւններու ենթարկեց զիս. դարձեալ ոչ մէկ յստակ արդիւնք։ Գլուխը շարժեց տարահատի պէս եւ ըսաւ, որ ստիպուած է նորահնար եւ դեռ փորձարկումի մէջ եղող ելեկտրոնիկ գործիքով մը քննել ստամոքսս։ Փորիս վրայ, ստամոքսիս չորս բոլորը ամրացուց ելեկտրոնիկ 9 կոճակներ, որոնք բարակ թելերով միացուց յատուկ համակարգիչի մը։ Ունէի սրտի քննութեան ենթարկուողի տեսք։
Պաստառին վրայ երեւցան ալիքաւոր գիծեր, որոնք գունաւոր թիթեռնիկներու նման կը թռչկոտէին։ Քիչ ետք, մասնագէտին դէմքը պայծառացաւ։
 Բան մը չունիս. մտահոգիչ բան չկայ,- ըսաւ թեթեւ ժպիտով մը։
 Բայց… սա անհանգստութեանս պատճառը ի՞նչ է,- հարցուցի՝ չվարակուելով լաւատեսութենէն։
 Կþերեւի թէ դուն վերջերս շատ պատկերասփիւռ կը դիտես…, – ըսաւ խորհրդաւոր ձայնով մը։
 Տարիներէ ի վեր պատկերասփիւռին հետ գլխաւոր կապս լուրերն են,- բացատրեցի, հասկցնելով, որ ատիկա անհանգստութիւնս հետ կապ ունենալու չէ։
 Հա՜… Կասկածս ճիշդ է ուրեմն,- վրայ բերաւ յաղթական ձայնով մը։
Եւ հարցական նայուածքիս՝ տուաւ հետեւեալ բացատրութիւնը.
 Նայէ՛, բարեկամ։ Դեղի պէտք չունիս, բայց անոր փոխարէն այլ դարման մը պիտի առաջարկեմ։
Ու գրասեղանին ետին անցնելով, համակարգիչին վրայ արագ-արագ բաներ մը գրեց. հիմա ձեռագիրի դարը անցած է… բարեբախտաբար. դեղագործի պէտք չունեցայ ինծի երկարած դեղագիրը կարդալու համար։ Թուղթին վերեւը գրած էր.- ՓՈԽԱՆ ԴԵՂԱԳԻՐԻ, իսկ էջին վրայ կար տասնաբանեայի պէս ցանկ մը. կþարտագրեմ քանի մը կարեւոր կէտեր.
1.- Պիտի հրաժարիս Միացեալ Նահանգներու նախագահութեան թեկնածուներու պատկերասփիւռուող մրցակցութիւններն ու տխմար յայտարարութիւնները լսելէ։
2.- Պիտի հրաժարիս հայկական կայաններէ սփռուող կարգ մը սերիալներէն, որոնք կը ներկայացուին տեպիլ դերասաններով եւ խնդուք մուրալու նախնադարեան (իր բառն էր փրիմիթիւ) «հնարքներով», նմանապէս՝ այն արտառոց շարքերէն, զորս կը կապկեն հայկական յիշեալ շարքերուն արտադրիչները։ («Հայաստանցի» բարեկամ մը յետոյ բացատրեց, որ տեպիլ-ը կը համախմբէ տկարամիտ, ապուշ, տմպօ, համբակ եւ նմանօրինակ յատկանիշներ)
3.- Պիտի դադրիս նաեւ մարդկային զանգուածներու կեանքը խաղալիքի վերածած մեծապետական-աշխարհակալական խաղերուն լուրերը լսելէ։
4.- Ականջ պիտի չտաս արեւմտեան աշխարհի պետական մարդոց այն խօսքերուն, որոնք կþըսեն, թէ Թուրքիա մեղսակից չէ Սուրիոյ եւ Իրաքի մէջ ահաւոր ոճիրներ գործողներուն։
5.- Ընդհանրապէս պիտի չհետեւիս ամերիկեան տարածուն կայաններու «լրատուութեանց», որոնք կա՛մ ոճիրներու-աւազակութիւններու մասին են, կամ ալ առեւտրական ծանուցումներու բնոյթ ունին։ (Եւ այսպէս՝ քանի մը կէտ եւս)։
Ցանկին տակը աւելցուցած էր. «Ասոնք են սիրտ-խառնուքիդ պատճառները»։
 Սերիալներ չեմ դիտեր արդէն, բայց միւսները առօրեայիս մաս կը կազեն…,- գանգատեցայ՝ հասկացնելով, որ անոնք մորթիս պէս դարձած են ինձմէ անբաժանելի։
 Ուրեմն ազատում չունիս. շատ «պիտի քաշես»,- բացատրեց ճարահատ։ Յետոյ, ափով ճակատը շփեց ու աւելցուց.- Նայէ՛, եթէ այս ըսածներս չընես, անհանգստութիւնդ ստամոքսէդ պիտի բարձրանայ դէպի ուղեղդ։ Ատիկա աւելի լուրջ պարագայ է…
Տուն վերադարձայ քիչ մը թերահաւատ. ամէն մարդու ներսիդին Թովմաս Առաքեալ մը նստած կþըլլայ, չէ։ Մտածեցի՝ փորձեմ մէկ-երկու շաբաթ. ի՞նչ կը կորսնցնեմ։
Փորձեցի, եւ հիմա, քանի մը շաբաթ ետք, ստամոքսս բաւական բարելաւուած է։ Մտածեցի՝ այս դառն փորձառութեանս բաժնեկից դարձնեմ նաեւ ընթերցող բարեկամներս։ Թերե՞ւս մէկուն օգտակար կ’ըլլամ…

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Սրտի խօսք.- Խոնարհ Հ.Մ.Ը.Մ.ական՝ Անդրանիկ Յարութիւնեանի Անթառամ յիշատակին
Next post Հայց. Եկեղեցւոյ Հիւսիսային Ամերիկայի Արեւելեան Թեմի Առաջնորդ ԳԵՐՇ. Տ. ԽԱԺԱԿ ԱՐՔ. ՊԱՐՍԱՄԵԱՆԻ Ս. ԶԱՏԿԻ ՊԱՏԳԱՄԸ.- ՍՈՎՈՐԱԿԱՆ ՍՈՒՐԲԵՐ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles