ՍԼԱՔ.- Ձերբազատիլ Պոլսոյ Պատրիարքական Ս. Աթոռի Տեղապահ Արք. Արամ Աթէշեանէն

0 0
Read Time:2 Minute, 7 Second

ateshian photo

Սարգիս Տաղտէվիրեան

Յունիս 8, 2016

Այլեւս ժամանակն է, որ Պոլսոյ Պատրիարքական Ս. Աթոռի տեղապահ արք. Արամ Աթէշեանը ո՛չ միայն պաշտօնազրկուի, այլ նաեւ կարգալոյծ ըլլայ: Ան, Գերմանիոյ խորհրդարանին կողմէ Հայոց Ցեղասպանութեան ճանաչման առիթով Թուրքիոյ նախագահ Էրտողանին իր ուղղած նամակով, ոտնակոխած է իր գրաւած Ս. Աթոռին ամէնէն հիմնական պահանջներն ու նուազագոյն պայմանները, թէ՛ քաղաքացիական, թէ՛ կրօնական հիմքերով:

– Ա՛ն, ոչ միայն Պոլսահայ գաղութը կը ստորնացնէ Թուրքիոյ միւս ազգութիւններու քաղաքացիներուն դիմաց, այլ ամբողջ հայ ժողովուրդի բարօրութիւնը կը դնէ իր նմաններուն ստրուկ մտածելակերպի բովանդակութեան սահմաններուն մէջ: Ան չի տեսներ, թէ Պոլսահայութիւնը այլեւս թեւակոխած է քաղաքացիական հաւասարութեան պահանջատիրութեան փուլ՝ «Ակօս», Հրանդ Տինք, «Քեմփ Արմէն»:

– Ան չի հետեւիր այլ եկեղեցիներու կրօնապետերուն կեցուածքներուն: Չի տեսներ, թէ Աստուծոյ այլ, բայց իսկական ծառայ մը՝ Վատիկանի Ֆրանսիս Պապը, ի՞նչ կեցուածք որդեգրեց ու ի՞նչ յորդորեց Աստուծոյ միւս ծառաներուն եւ երկիրներու իշխանաւորներուն, Հայոց Ցեղասպանութեան 100-ամեակին առիթով:

– Ան համաշխարհային քաղաքականութեան տեսողութիւնն իսկ չունի: Ո՛չ թէ  Հայոց Ցեղասպանութիւնը ճանաչող երկիրները իրենց «իմբերիալիստական» նպատակներուն համար կը գործածեն զայն, այլ իրականութիւնը շատ լաւ գիտցող, սակայն աշխարհաքաղաքական իրենց շահերուն պատճառով տակաւին չճանաչող երկիրները, ինչպէս Միացեալ Նահանգներն ու Անգլիան, հակառակ իրենց այդ օրերու Թուրքիոյ մէջ դեսպաններուն ու ցեղասպանութեան վայր նահանգներու հիւպատոսներուն ականատեսի վկայութիւններուն եւ տեղեկագիրներուն:

– Ան չունի նուազագոյն հեռատեսութիւն ու անցեալի փորձի գիտակցութիւն, որ նման կեցուածք իր ծանր հետեւանքները պիտի ունենայ նոյնինքն Պոլսահայութեան հաւասարութիւն տենչացող խաւին վրայ: Ամէն անգամ որ Թուրքիոյ աթոռակալները որեւէ տեսակի յարձակում շղթայազերծեն հայութեան դէմ Պոլսոյ մէջ, առաջ պիտի քաշեն այս տեղապահին նամակը (նամակները), որպէս Պոլսահայութեան մեծամասնութեան ներկայացուցիչ եւ դատապարտեն հաւասարութեան ձգտողները որպէս, նուազագոյն պարագային՝ թրքականութեան վարկաբեկիչներ, իսկ ծայրագոյն պարագային՝ ահաբեկիչներ: Տակաւին չխորանանք այն հետեւանքներուն մասին, որ թրքական քարոզչական մեքենան հայութեան գլխուն պիտի տեղացնէ, աշխարհի տարածքին, ի պահանջել հարկին:

– Ան չունի իր Ս. Աթոռին արժանավայել ողնաշար: Եթէ նոյն Ս. Աթոռին պաշտօնավարած պատրիարք Մկրտիչ Խրիմեանը (Հայրիկ), հայ ժողովուրդի կեղեքումի ու հալածանքի դժուարին օրերուն, այն ալ «կարմիր» սուլթան Ապտիւլ Համիտի գահակալութեան շրջանին, տուաւ «Երկաթէ Շերեփ»-ի իր ազատատենչ քարոզը, այս տեղապահէն, այս պարագային, կ’ակնկալուէր նուազագոյնը ԼՌԵ՛Լ եւ ո՛չ մէկ արտայայտութիւն ունենալ:

Տեղապահին նամակին իւրաքանչիւր հատուածը ստրկամիտ է ու հայութեան վնասակար, Պոլսահայ թէ այլ: Անհասկնալի է նոյնիսկ իր ծուխին ֆիզիքական անվտանգութեամբ «մտահոգ» կրօնաւորի պարագային: Անվտանգութիւնը չ’ապահովուիր հայ ղեկավարին ծնկաչոքութեամբ, որեւէ երկրի մէջ, որեւէ գաղութի պարագային, ընդհակառակը այդ արարքը դուռ կը բանայ շարունակական հայավնաս ճնշումներու եւ պահանջներու: Իսկ ատիկա կատարել  մեր ժողովուրդի ցեղասպանին առջեւ, այդ արդէն մարդկային նոր նկարագրի կերտում է, ժխտական տարածքի մէջ:

Նման անձերու աթոռներու վրայ գտնուիլը եւ Ս. Միւռոնի պաշտպանութիւնը վայելելը արգելք կը հանդիսանան մեր ժողովուրդի իւրաքանչիւր պահանջատիրական քայլին՝ Հայոց Ցեղասպանութեան ճանաչում ըլլայ, թէ կորուստներու հատուցում, այլ խօսքով Հայ Դատի հայանպաստ վերջնական իրականացումին: Առ այդ, հեռացնել եւ կարգալուծել նմանները:

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles