Սէնթ Փիթըրզպուրկի Մէջ.- Սարգսեան – Ալիեւ – Փութին Հանդիպում

0 0
Read Time:5 Minute, 6 Second

aliyev-sargsyan2

Երկուշաբթի, Յունիս 20-ին, Ռուսաստանի պատմական քաղաք՝ Սէնթ Փիթըրզպուրկի մէջ, տեղի ունեցաւ նախագահներ՝ Սերժ Սարգսեանի, Վլատիմիր Փութինի եւ Իլհամ Ալիեւի եռակողմանի հանդիպումը: Նախքան այս հանդիպումը, Ռուսաստանի նախագահը հանդիպումներ ունեցաւ առաջին հերթին Հայաստանի եւ ապա Ատրպէյճանի նախագահներուն հետ:
Աւարտին, կողմերը լոյս ընծայեցին յայտարարութիւն մը, որուն մէջ կը նշուի թէ, ԵԱՀԿ-ի Մինսքի խմբակի համանախագահները յաւելեալ յանձնարարութիւններ պիտի ստանձնեն եւ անոնց դիտորդներու թիւը պիտի բարձրանայ:
Օրուան առաջին հանդիպումը նախագահներ Փութինի եւ Սարգսեանի միջեւ էր: Հայաստանի նախագահի աշխատակազմի հասարակութեան եւ տեղեկատուութեան միջոցներու հետ կապերու վարչութենէն յայտնեցին, որ ռազմավարական գործընկեր երկու երկիրներու նախագահները քննարկեցին Արցախի տագնապի խաղաղ լուծման բանակցային հոլովոյթին վերաբերող հարցեր, այդ ծիրին մէջ անդրադարձան շրջանային զարգացումներուն եւ անվտանգութեան սպառնացող ներկայ մարտահրաւէրներուն: Անոնք մտքեր փոխանակեցին Վիեննայի մէջ ԵԱՀԿ-ի Մինսքի խմբակի համանախագահող երկիրներու արտաքին գործոց նախարարներու նախաձեռնութեամբ տեղի ունեցած հանդիպումին իբրեւ արդիւնք ձեռք բերուած համաձայնութիւններու գործադրման ընթացքին շուրջ: Ապա, հանդիպումը շարունակուեցաւ ընդլայնուած ձեւաչափով` մասնակցութեամբ Հայաստանի եւ Ռուսաստանի արտաքին գործոց նախարարներուն: Ռուսաստանի նախագահ Փութին ըսաւ.- «Մենք քիչ առաջ երկուքով` Սերժ Սարգսեանի հետ, որոշ հարցերու շուրջ բաւական հանգամանալից զրոյց ունեցանք: Ընդլայնուած կազմով մեր հանդիպումին սկիզբը պիտի ուզէի նշել, որ մենք կ՛արձանագրենք ապրանքաշրջանառութեան աճ` հակառակ մեր եւ միջազգային տնտեսութիւններուն մէջ գոյութիւն ունեցող բոլոր դժուարութիւններուն: Քանի մը անգամ, կարելի է ըսել, աճած է հայկական կողմէն գիւղատնտեսական ապրանքներու մատակարարումը ռուսական շուկայ, ինչ որ մեզի ուրախութիւն կը պատճառէ: Յոյսով եմ, որ ընդհանուր առմամբ, այս միտումը լիովին կ՛ամրապնդուի թէ՛ ապրանքաշրջանառութեան զարգացման, թէ՛ մեզի համար զգայուն ապրանքներու տեսակէտէն: Կարելի է նշել, որ համարկման հոլովոյթներու ծիրին մէջ մեր յարաբերութիւնները կը զարգանան շատ աւելի աշխոյժ, քան անոնք նախապէս կը զարգանային երկկողմանի հիմերու վրայ, ինչ որ մեզի շատ կ՛ուրախացնէ: Կարելիութիւն եւ անհրաժեշտութիւն կայ խօսելու այն մասին, թէ ինչպէ՛ս պիտի գործենք հետագային: Այժմ Հայաստանը կը նախագահէ Հաւաքական անվտանգութեան պայմանագիրի կազմակերպութեան, եւ աշնան պէտք է կայանայ բարձր մակարդակի հանդիպում: Հոկտեմբերին այդ մասին եւս պիտի խօսինք: Մենք շատ ուրախ ենք ձեզ տեսնելով: Շնորհակալութիւն, որ ընդունեցիք հրաւէրը»:
Նախագահ Սարգսեան իր կարգին շնորհակալութիւն յայտնեց Փութինին, այսպիսի հանդիպում մը կազմակերպելու նախաձեռնութեան համար: Սարգսեան վստահութիւն յայտնեց, որ Եւրասիական տնտեսական միութեան բոլոր երկիրներուն մէջ ուշադիր հետեւած են այդ կարեւոր նախաձեռնութեան: «Որովհետեւ այս հանդիպումը հիմնականին մէջ նուիրուած է Արցախին, ես կանգ պիտի չառնեմ երկկողմանի հարցերու օրակարգին վրայ: Բոլոր ուղղութիւններով կապերը կ՛ամրապնդուին: Իրականութեան մէջ, այստեղ խնդիրներ չկան: Մեր դիրքորոշումը Արցախի հարցին մէջ յայտնի է բոլորին: Մենք կ՛ուզենք, որ հարցը լուծուի բացառապէս խաղաղ ճամբով: Ես կ՛ուզեմ շնորհակալութիւն յայտնել նախագահ Փութինին, ԵԱՀԿ-ի Մինսքի խմբակի համանախագահող երկիրներու միւս ղեկավարներուն այն ուշադրութեան, ջանքերուն համար, զորս դուք կը յատկացնէք այս հարցին: Սակայն, ցաւօք, մէկ կողմի ցանկութեամբ նման տագնապները ոչ մէկ ձեւով կը լուծուին: Եւ մենք, վստահաբար, շատ ուրախ պիտի ըլլայինք, եթէ այսօր կարենայինք յառաջ շարժիլ Վիեննայի մէջ ձերք բերուած համաձայնութիւններու գործադրման ուղղութեամբ` այսինքն` զինադադարի դրութեան խախտումներու հետաքննութեան մեքանիզմներ ստեղծենք: Ատիկա աշխատանքային տրամադրութիւն պիտի ստեղծէ բանակցութիւններու կատարման համար», շեշտեց նախագահ Սարգսեան:Sarkissian-Putin
Ռուսաստանի նախագահի բանբեր Տմիթրի Փեսքով յայտնած էր թէ Սարգսեանի եւ Ալիեւի հետ Փութինի բանակցութիւնները դիւրին պիտի չըլլան:
Հայաստանի նախագահ Սերժ Սարգսեան, Փութինի հետ իր հանդիպումէն առաջ` պատասխանելով լրագրողի հարցումներուն արտայայտուած էր հանդիպումէն իր սպասելիքներուն մասին: «Վերջին քանի մը տարիները ցոյց տուած են, որ բանակցային հոլովոյթը քիչ թէ շատ արդիւնաւէտ կրնայ ըլլալ, եթէ կողմերը կատարեն իրենց պարտաւորութիւնները: Այսինքն, իրենց գործողութիւնները համահունչ են 1994 եւ 1995 թուականներուն կնքուած զինադադարի համաձայնագիրի կէտերուն: Վիեննայի մէջ 16 մայիսին համանախագահներու յայտարարութիւնը եւս այդ մասին կը վկայէ: Կ՛ակնկալեմ, որ Ս. Փիթըրզպուրկի մէջ մենք ի վերջոյ կը համաձայնինք եւ Ատրպէյճան պիտի կատարէ իր պարտաւորութիւնները, սահմաններու վրայ խախտումներ չեն ըլլար, եւ մենք պիտի շարունակենք բանակցային հոլովոյթը Արցախի տագնապի լուծման լաւ նպատակով», ըսաւ ան:
Միւս կողմէ, Փութինի օգնական Եուրի Ուշաքով անդրադառնալով Սարգսեան-Ալիեւ հանդիպումին յայտնած էր, որ Ռուսաստանը պիտի փորձէ Արցախեան տագնապի լուծման հարցին մէջ, աշխուժօրէն աջակցիլ կողմերուն: «Մենք արդէն ունեցած ենք, կ՛ըսէի, որոշիչ դեր մարտական գործողութիւններու դադրեցման մէջ», շեշտած էր ան:

*

Ատրպէյճանի նախագահ Ալիեւի հետ հանդիպումին, Ռուսաստանի նախագահ Փութինը յայտնեց թէ այն խնդիրը, որ պիտի քննարկուի, Արցախի տագնապն է: Սակայն, այս հանդիպումին առիթը պիտի օգտագործուի` արծարծելու համար երկկողմանի յարաբերութիւնները: «Դժբախտաբար, ականատես կը դառնանք անծանօթ պատճառներով առեւտուրի շրջանառութեան անկումի: Պատճառը՝ ուժանիւթի գիներու անկումն է եւ ազգային դրամանիշերու միջեւ տարբերութիւնը», ըսաւ Ռուսաստանի նախագահը:
Ալիեւ, իր կարգին յայտնեց թէ տագնապը ձգձգուած է, ինչպէս յայտարարած են Ռուսիան եւ Մինսքի խմբակի միւս համանախագահները: «Այս գոյավիճակը անընդունելի է: Մենք այդ յայտարարութեան լիովին համաձայն ենք: Սակայն գոյավիճակը փոխելու համար անհրաժեշտ է Ատրպէյճանի տարածքներու ապաբռնագրաւում, որ կ՛երկարի աւելի քան 20 տարի», ըսաւ ան: Իսկ տնտեսական կացութեան մասին անդրադառնալով, ան ըսաւ.- «Մենք կը փնտռենք ձեւեր վերականգնելու եւ յառաջ մղելու առեւտրական շրջանառութիւնը: Կը կարծեմ, որ ատիկա տեղի պիտի ունենայ: Աւելի՛ն, մենք փոխադարձ աշխատանք ունինք ուժանիւթի եւ փոխադրամիջոցներու մարզերուն մէջ, գործակցութեան հեռանկարներ»:
Ռուսաստանի արտաքին գործոց նախարար Սերգէյ Լաւրովը` ամփոփելով Վլատիմիր Փութինի, Սերժ Սարգսեանի եւ Իլհամ Ալիեւի եռակողմանի հանդիպումը, յայտնեց թէ երեք նախագահները պայմանաւորուած են Արցախի տագնապի լուծման լրացուցիչ ուժականութիւն հաղորդել, անոնք նաեւ հաւատարմութիւն յայտնած են շփման գիծին մէջ իրավիճակի բնականոնացման գծով եւ համաձայնած են աւելցնել ԵԱՀԿ-ի դիտորդներուն թիւը:
Լաւրով յայտնեց թէ .- «Երեք երկիրներու նախագահները հրապարակած են եռակողմանի յայտարարութիւն մը, որուն մէջ կ՛արտայայտուի հաւատարմութիւն քաղաքական լուծման կայուն յառաջընթացի պայմաններու ստեղծման, շփման գիծին մէջ իրավիճակի բնականոնացման եւ ԵԱՀԿ-ի դիտորդներու թիւի բարձրացման առումով: Մենք նախանշած ենք բանակցային հոլովոյթի աշխուժացման յստակ քայլեր», ըսած է Լաւրով: Անոր համաձայն, վերջին օրերուն զինադադարը կը պահպանուի Լեռնային Ղարաբաղի մէջ: «Երկիրներուն ղեկավարները հանդիպում ունեցած են առանց ընկերակիցներու կամ օգնականներու»:
Սէնթ Փիթըրզպուրկի մէջ տեղի ունեցած եռակողմանի հանդիպումէն ետք, նախագահներ՝ Սերժ Սարգսեան, Վլատիմիր Փութին եւ Իլհամ Ալիեւ հանդէս եկան միացեալ յայտարարութեամբ մը, յայտնելով թէ.-
«Հայաստանի Հանրապետութեան, Ռուսաստանի եւ Ատրպէյճանի Հանրապետութեան նախագահները 20 յունիս 2016-ին հանդիպեցան Սէնթ Փիթըրզպուրկի մէջ Ռուսաստանի նախագահին հրաւէրով եւ քննարկեցին Լեռնային Ղարաբաղի տագնապի խաղաղ լուծման վերաբերող հարցեր: Հայաստանի Հանրապետութեան եւ Ատրպէյճանի Հանրապետութեան նախագահները վերահաստատեցին Մայիս 16-ին Վիեննայի մէջ տեղի ունեցած հայ-ատրպէյճանական վեհաժողովի պայմանաւորուածութիւնները` ուղղուած տագնապի գօտիին մէջ իրավիճակի կայունացման եւ խաղաղ հոլովոյթի յառաջընթացին նպաստող մթնոլորտի ստեղծման: Այդ նպատակով անոնք համաձայնեցան մասնաւորապէս բազմացնել տագնապի գօտիին մէջ միջազգային դիտորդներու թիւը: Անոնք գոհունակութիւն յայտնեցին վերջին շրջանին շփման գիծին մէջ զինադադարի դրութեան պահպանման առնչութեամբ: Կատարուեցաւ տագնապի խաղաղ լուծման առանցքային/բովանդակային հարցերու շուրջ միտքերու հանգամանալից փոխանակում: Պետութիւններու ղեկավարները փաստեցին շարք մը հարցերու առնչութեամբ փոխըմբռնման հասնելու հանգամանքը, որոնց լուծումը կարելիութիւն կ՛ընձեռէ պայմաններ ստեղծելու յառաջընթաց արձանագրելու Արցախի տագնապի խաղաղ լուծման հարցին մէջ: Նախագահները նշեցին իրենց կանոնաւոր շփումներու կարեւոր նշանակութիւնը եւ պայմանաւորուեցան շարունակել զանոնք նման ձեւաչափով ի յաւելում ԵԱՀԿ-ի Մինսքի խմբակի համանախագահներու աշխատանքին, որոնք հրաւիրուած էին Սէնթ Փիթըրզպուրկի մէջ տեղի ունեցած հանդիպումի աւարտին»:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles