ՍԵՐԺ ՍԱՐԳՍԵԱՆԻ ՀՐԱԺԱՐՄԱՆ ՎԱՂՈՐԴԱՅՆԸ

0 0
Read Time:2 Minute, 24 Second

Կարօ Արմենեան
Ապրիլ 23, 2018
Ուաշինկթըն

Երէկուան յօդուածիս («Մեր Ճշմարիտ Յաղթանակը») արագօրէն արձագանգելով, բազմաթիւ ընկերներ դիտել կու տային, թէ հակառակ ըրած ախտանշումներուս՝ ՀՀ Վարչապետին հրաժարման խնդիրը բացէ ի բաց չէի դրած որպէս քաղաքական տագնապի հանգուցալուծման նախապայման։ Աւելի՛ն։ Ընկերները հարց կու տային, թէ ի՞նչ տրամաբանութեամբ համակարգային փոփոխութիւններ կը պահանջէի վարչապետէ մը, որ լայնօրէն վարկաբեկուած էր ժողովուրդի աչքին և հետևաբար քաղաքականօրէն անընդունակ՝ նման քաղաքականութիւն ճամբայ հանելու։ Արդարացի դիտողութիւն և ճիշտ հարցադրութիւննե՛ր։ Ապրի՛ն ընկերուհիներն ու ընկերները իրենց զգաստ դատողութեան համար։ Բանակցութիւններու թէժ պահը (Դաշնակցութեան գործօն դերակատարութեամբ) յղի էր հետևանքներով, երբ կը գրէի վերոյիշեալ յօդուածս, և այսօր պէտք է շնորհաւորել բոլոր գործող անձինք (ներառեալ Վարչապետը՝ ի՛նք), որ ի վերջոյ խոհեմութիւնը ըստ ամենայնի տիրող հանդիսացաւ և երկիրը ուշիմութեամբ դուրս եկաւ արիւնի որոգայթներէն։

Հիմա, որ ազգովին կը գտնուինք Սերժ Սարգսեանի հրաժարման փաստին առջև, ստիպուած ենք վերադառնալու նոյն անհանգստացնող հարցերուն։ Իրականութիւնը այն է, որ «Յեղափոխութիւն»ը վերջ չէ գտած, ինչպէս շատեր կը թուին հաւատալ և հետևաբար դեռ շատ հեռու է տօնելու մեր օրը։ Անդրադառնանք, որ յեղափոխութիւնը այսօր է, որ պիտի սկսի, քանի որ օլիգարխիան դեռ կը շարունակէ տիրապետել երկրի քաղաքական և տնտեսական բոլոր կամրջագլուխներուն։ Սերժ Սարգսեանի և Հանրապետական Կուսակցութեան մեծագոյն մեղանչումը – ինչպէս դիտել տուեր էի քանիցս – խորհրդարանական այս «մեծամասնութեան» ձևաւորումն էր դիմելով բոլոր կարելի միջոցներուն և խորհրդարանական համակարգի արագ խեղաթիւրումը։ Հարց պէտք է տալ, թէ ներկայ դրութեան մէջ ի՞նչ պիտի ըլլայ Սերժ Սարգսեանի դիրքը իր կուսակցութեան մէջ…Ի վերջոյ ուժի բանալին կը շարունակէ ըլլալ Հանրապետականներու պլոքը Ազգային Ժողովին մէջ։ Պէտք է նոյնիսկ հարց տալ, թէ ի՞նչ պիտի ըլլայ Սերժ Սարգսեանի անհատական ուժի տարածքը Հանրապետական Կուսակցութենէն ներս թէկուզ այն ատեն, երբ Հանրապետականները որոշեն օրուան «տեսք»ը ապահովելու սիրոյն և անուանականօրէն Սերժ Սարգսեանը «դուրս բերել» ղեկավարութեան իր ներկայ դիրքերէն։

Նկատի առնելով բոլոր այս հաւանական րիսքեըը, հանրութիւնը պէտք է մերժէ ներկայ խորհրդարանի կազմը իր թերի մեծամասնութեամբ ևանմիջական քայլեր առնէ խորհրդարանի նոր ընտրութիւններու ձեռնարկելու յաղթահարելով սահմանադրական նրբութիւնները։

Մինչ այդ համակարգային յեղաշրջման բացակայութիւնը, որ արմատն է երկրի ցաւերուն, Սերժի հրաժարումով որու՞ն բարեհոգութեան պիտի յանձնուի արդեօք և ե՞րբ պիտի սեղան բերուին այս հարցերը։ Նոր վարչապետը – ով ալ, որ ըլլայ ան – ինչպիսի՞ մեղրալուսին պիտի ունենայ և որքա՞ն ժամանակ պիտի համբերենք, որ ան սկսի արմատական քայլեր առնել մենաշնորհային տնտեսութեան կազմաքանդման մարզին մէջ…Կ՚ուզեմ յիշեցնել, որ մեր մեծ խնդիրը կը շարունակէ ըլլալ օլիգարխիան հաշուի առնելով, որ Սերժ Սարգսեանը բնականաբար պիտի չդադրի ըլլալէ նոյն Սերժ Սարգսեանը իշխանութենէ նե՞րս թէ դուրս։

Հիմա, որ իշխանութեան յանձանձում տեղի պիտի ունենայ պետութեան բարձր ոլորտներուն մէջ, բացարձակապէս կենսական է, որ համակարգային յեղաշրջման պայմանը յետաձգման չենթարկուի, այլ ան մաս կազմէ իշխանութեան փոխանցման քաղաքական աքթին, որպէսզի փոխանցումը ծառայէ իր իսկական նպատակին։

Մտքերու փոխանակութեան կարգով, ՀՅԴ Բիւրոյի Պաշտօնական Կայքէն ընթերցողի սեղանին վերստին կը դնեմ Դեկտեմբեր 19, 2017 թուակիր իմ յօդուածս («Օլիգարխիան Իր Էութեամբ Եւ Պատմական Փոխընտրութիւններով»), որ օրին լոյս տեսաւ ՀՅԴ մամուլի սիւնակներուն մէջ։ Ժամանակն է, որ հայ քաղաքական միտքը անյապաղ քննարկման ենթարկէ մեր պետականութեան կեանքէն ներս օլիգարխիայի ցաւոտ խնդիրը և անյապաղ սանձազերծէ անհրաժեշտ քաղաքական գործընթացները այս ուղղութեամբ։

 

 

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles