Սա «Գող-Աւազակ» Ապօրինի Գաղթականները…

0 0
Read Time:3 Minute, 2 Second

p6 Illegal_Immigrants_Cirkewwap6 immigrati_deserto

ՎԱՉԷ ԲՐՈՒՏԵԱՆ

vproodian@gmail.com

Արեւմտեան մամուլը (տպագիր ու եթերային) ողողուած է Ափրիկէէն եւ Միջին Արեւելքի զանազան երկիրներէն Եւրոպա մուտք գործած կամ մտնել փորձող հազարաւոր ապօրինի գաղթականներու լուրերով:
Ֆրանսայի Քալէ քաղաքին մէջ (դէպի Անգլիա սահմանային անցակէտը), ապօրինի գաղթականները կը փորձեն Անգլիա մտնող բեռնակառքերուն մէջ սպրդիլ ու ձեւով մը իրենք զիրենք «աւետեաց երկիր» նետել:
Հիւսիսային Ափրիկէի պարագային, գլխաւորաբար Լիպիոյ ծովափէն, ամէն տարիքի ու սեռի մարդիկ, խարխուլ մակոյկներով ու շատ յաճախ կեանքի գնով, կը փորձեն Իտալիա անցնիլ (Լամփատուզա կղզին)՝ Միջերկրականի ամենանեղ մասէն: Բազմաթիւ պարագաներու, այս մակոյկները շրջուած են, խեղդամահ ընելով ճամբորդները: Իտալական եզերապահ նաւերը շատ յաճախ կը ստիպուին փութալ անոնց օգնութեան եւ զանոնք փոխադրել իտալական ամենամօտիկ նաւահանգիստը:
Նոյնն է պարագան Թուրքիոյ, ուրկէ հարիւրաւորներ (Սուրիայէն, Իրաքէն եւ Աֆղանիստանէն) կը փորձեն մակոյկներով Յունաստան հասնիլ, շունչերնին առաջին հերթին Քոս կղզին առնելով: Այս պարագային՝ բնականաբար թրքական իշխանութիւններուն մեղսակցութեամբ:p6 lampedusa2
Գերմանիոյ, Ֆրանսայի, Շուէտի եւ եւրոպական այլ երկիրներու մէջ, մամուլը եւ հանրութիւնը կը դժգոհին, որ նոյն այս ապօրինի գաղթականներու հոսքէն ետք, բազմացած են ոճիրներն ու քրէական այլ արարքները: Մամուլը (գլխաւորաբար աջակողմեան) կը հրահրէ հանրային կարծիքը, ստեղծելով ու տարածելով կեղծ ու սուտ պատում մը, որ ապօրինի գաղթականները բեռ են տուեալ երկիրներու տնտեսութիւններուն համար եւ թէ նոյնիսկ պատճառ կը դառնան յաւելեալ անգործութեան: Եւրոպական Միութեան դրամատիրական կարգերուն կողմէ իրենց սեփական ժողովուրդներուն յղուած պատգամը յստակ է. «Կը տեսնէ՞ք, այս ապօրինի գաղթականներն են մեր տնտեսական դժուարութիւններուն բո՛ւն պատճառը, ուրիշ բան մտքերնէդ չ՛անցընէք… մենք ամէն ինչ կ՛ընենք ձեր բարօրութեան համար, բայց «ասոնք» են, որ կը խանգարեն»: Իշխանութիւնները այս ձեւով մէկ քարով երկու թռչուն կը զարնեն, մէկ կողմէն իրենց ագահութեան նկատմամբ կասկածները իրենցմէ հեռացնելով եւ միւս կողմէ քաւութեան նոխազի վերածելով գաղթականները:
Այս ապօրինի գաղթականները կու գան գլխաւորաբար Լիպիայէն, Մալիէն, Սոմալիէն ու ինչպէս նշեցինք՝ Սուրիայէն, Իրաքէն եւ Աֆղանիստանէն:p6 Migrant Boat Deaths 07
Նշմարեցի՞ք հասարակ յայտարարը այս նշուած երկիրներուն միջեւ: Յստակացնենք, բոլորն ալ զոհերն են Արեւմտեան երկիրներու վարած քաղաքականութեան, որուն հետեւանքով քար ու քանդ եղած են այս երկիրները: Այս երկիրներու բնական հարստութիւններուն տիրանալու, անոնց վայելած ռազմավարական դիրքին վրայ հակակշիռ ունենալու, այդ երկիրներուն մէջ Արեւմուտքին հլու հնազանդ կամակատարներ իշխանութեան բերելու արեւմտեան քաղաքականութիւնն է պատճառը, որ այսօր նշեալ երկիրները, Ափրիկէի թէ Մ. Արեւելքի մէջ, կա՛մ անյոյս կերպով քանդուած են եւ կամ քանդումի ընթացքին մէջ են:
1920էն ի վեր պետութիւն-պետականութիւն ու համապատասխան կառոյցներ ստեղծուած էին Իրաքի մէջ, որուն բնակչութիւնը արաբական աշխարհին ամէնէն ուսեալը կը համարուէր, ըստ Մ.Ա.Կ.-ի տուեալներուն: Ամերիկեան բանակը 3 շաբթուան ընթացքին գետնին հաւասարցուց 80 տարուան մէջ կառուցուած ֆիզիքական եւ վարչական կառոյցները: Հիմա գիտենք, թէ ինչ է կացութիւնը հոն…
Նոյնը պատահեցաւ Լիպիոյ պարագային, այս անգամ՝ ՆԱԹՕի կողմէ, որ հալումաշ եղած «Պաշտպանելու պատասխանատուութիւն» կոչուած մարդասիրական կարգախօսով (Responsibility to Protect, R2P) քարուքանդ ըրաւ Ափրիկէի մէջ ամէնէն բարձր կենսամակարդակ ունեցող այդ երկիրը: Վերջն ալ, ֆիզիքապէս ու բառացիօրէն բռնաբարելէ ետք Լիպիոյ ղեկավար Քատտաֆին, զայն սպաննեցին: Չդատեցին: Հապա՞ եթէ դատարանին մէջ Քատտաֆի յայտարարէր ու ապացուցէր, որ միլիոնաւոր տոլարներով զօրակցած է Ֆրանսայի նախագահ Սարքոզիի ընտրապայքարին (ու նման բազում գաղտնիքներ), գիտէ՞ք ինչ խայտառակութիւն կրնար ստեղծուիլ…p6 african-immigrants_998807c
Աֆղանիստանի մասին խօսիլը արդէն աւելորդ է: Եմէնի ու Սուրիոյ պարագային՝ նոյնպէս: Դասական օրինակներ են արեւմտեան միջամտութիւններուն:
Իսկ յաճախ կեանքի գնով Եւրոպա մտնել փորձող այս գաղթականները, որոնք կու գան գլխաւորաբար այս երկիրներէն, իրաւունք չունի՞ն մարդավարի ապրելու, իրաւունք չունի՞ն ֆիզիքականի, ինչքի եւ ապագայի ապահովութեան, իրենց ու իրենց զաւակներուն համար: Բայց տրուած ըլլալով, որ Արեւմուտքը քանդած է իրենց երկիրները, յուսահատած՝ կը փորձեն ապրուստ մը, խաղաղ երդիք մը ապահովել իրենց ընտանիքներուն համար. խաղաղ տեղ մը, ուր յանկարծ ռումբեր չտեղան իրենց վրայ օդանաւներէն կամ յիսուն քիլոմեթր հեռուէն թռչող առանց օդաչուի օդանաւէ մը հրթիռ մը չարձակուի իրենց զաւակներուն հարսանեկան խրախճանքին վրայ:
Այնպէս որ, երեկոյեան, երբ ձեր հեռատեսիլի պաստառներէն կամ առաւօտեան սուրճին հետ արեւմտեան թերթի մը էջերէն «ապօրինի գաղթականներու» մասին լուրերու կը հանդիպիք, ու ձեր առօրեայ հանգիստը կը խանգարուի, գիտցէք, որ ի՛նչն է պատճառը, ո՛ւր է արմատը այս մարդկային աղէտին ու տառապանքին:

Օգոստոս 12, 2015

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles