Սահմաններու Բացումով Կը Վտանգուի Հ․Հ․ Տնտեսական Անվտանգութիւնը
ԵՐԵՒԱՆ («Նիուզ»)․- Տնտեսական հետազօտութիւններու գրասենեակի պատասխանատու, տնտեսագէտ Սուրէն Պարսեան յայտնեց, որ տարածաշրջանին մէջ տնտեսական, առեւտրական եւ փոխադրութեան կապերու ապաշրջափակման` սահմաններու բացման իբրեւ արդիւնք պիտի վտանգուի Հայաստանի տնտեսական անվտանգութիւնը:
Ըստ անոր՝ թրքական, իսկ յառաջիկային արդէն ատրպէյճանական ապրանքներու հայկական շուկայ մուտքը կանխելու եւ Հայաստանի տնտեսութիւնը թուրք–ատրպէյճանական ներդրումներէն զերծ պահելու նպատակով պէտք է կարելի եղածին չափ շուտ դիտարկել թրքական ապրանքներէն հրաժարելու այլընտրանքային կարելիութիւնները:
Տնտեսագէտը նշեց, որ, հակառակ ժամանակաւոր սահմանափակումներուն, ներկայիս շուկային մէջ կայ թրքական ծագման մեծաթիւ ապրանք: Մասնաւորապէս 2019ի պաշտօնական վիճակագրութեան համաձայն` Հայաստանի Հանրապետութիւն ներածուած են թրքական արտադրութեան 2908 ապրանքատեսակներ, որոնցմէ 2285ը սպառման պատրաստ ապրանքներ են` նարինջ, հագուստ, իւղեր եւ այլն, իսկ 623ը` վերամշակման ենթակայ ապրանքներ` կտոր, շինանիւթ եւ այլն, որոնք դեռ սպառած չեն:
Նշենք, որ Հայաստանի կառավարութեան 20 Հոկտեմբեր 2020ի որոշումով` 31 Դեկտեմբեր 2020էն սկսեալ կ՛արգիլուի Հայաստանի Հանրապետութիւն թրքական ծագման վերջնական սպառման ապրանքներու ներածումը (6 ամիսով):
«Թրքական ծագման ապրանքների ներմուծման արգելքով ոչ միայն տնտեսական բնոյթի սանկցիա (պատժամիջոց-Խմբ.) է կիրառւում Թուրքիայի նկատմամբ, այլեւ անվտանգութեան տեսանկիւնից դադարեցւում է հայկական աղբիւրներից Թուրքիայի պետական գանձարանի ֆինանսական սնուցումը: Միաժամանակ, կանխարգելւում է վերջնական սպառման ապրանքների ներմուծման միջոցով տարատեսակ վտանգների ներթափանցումը», շեշտեց ան:
Ընդհանուր առմամբ, ըստ Պարսեանի, Թուրքիայէն ներածուող ապրանքներու հիմնական մասը ունի համադրելի որակներով փոխարինողներ, սակայն այդ անցումը որոշ ժամանակի կը կարօտի, որպէսզի տնտեսվարողները կարենան գտնել այլընտրանքային շուկաներէն որակապէս նոյնանման ապրանքներ:
