ՌՈՒՍ-ԹՐՔԱԿԱՆ ՁԻՒՆՀԱԼ

0 0
Read Time:1 Minute, 59 Second

putin-erdogan2ՀԱՅՐԵՆԻՔ

Խմբագրական

Յուլիս 4, 2016

Շարունակ եօթ ամիս «պաղ» յարաբերութիւն մը ստեղծուած էր Ռուսաստանի եւ Թուրքիոյ միջեւ: Թէեւ շատ էին տարակարծութիւններն ու հակադրութիւնները, սակայն ինչպէս հին առածը կ՛ըսէ.- «ջուրը տակառէն դուրս կաթելու սկսաւ» անցեալ Նոյեմբեր 24-ին, երբ ռուսական օդուժին պատկանող «Սուխոյ 24» տիպի ռմբաձիգ մը՝ Թուրքիոյ սահմանէն թափանցած Սուրիոյ ահաբեկչական ուժերը ռմբակոծելու ժամանակ, վար առնուեցաւ թրքական օդուժի պատկանող մէկ «Էֆ 16»ին կողմէ: Դեռ աւելին, ծայրայեղ ահաբեկչականներ շարունակ կրակեցին անկարգելորդ ռուս օդաչուին, որ կրցած էր մետասաներորդ վայրկեանին ինքզինք դուրս արձակել խորտակուող սաւառնակէն: Գետին չհասած, օդաչուն բազմիցս արագահարուածներու թիրախ դառնալով, սպաննուած էր:
Ռուսաստանի ղեկավարին համար որոշումները կտրուկ եղան, յատկապէս տնտեսական բնագաւառէն ներս: Քրեմլը որոշած էր կասեցնել եւ ընդհատել ամեն տեսակի առեւտուր՝ Անգարայի հետ, նոյնիսկ պոյքոթի ենթարկելով զբօսաշրջութիւնը, որ ռուսերուն համար յաճախակի եւ ժողովրդականութիւն վայելող ժամադրավայրերէն մէկն էր:
Ամիսներ շարունակ տեւող այս գոյավիճակը իր ազդեցութիւնը ունեցաւ տարածաշրջանէն ներս, թէ՛ տնտեսական, թէ՛ աշխարհաքաղաքական եւ նոյնիսկ ռազմագիտական բնագաւառներէն ներս: Նոյնիսկ Արցախի քառօրեայ պատերազմին դրդապատճառները կարելի է նկատել, վելոյիշեալ լարուածութիւնը:
Յունիս 29-ին, աւելի քան քառասուն վայրկեան տեւողութիւն ունեցող տեսակցութիւն մը, ազդանշանը տուաւ ռուս-թրքական յարաբերութիւններու ձիւնհալին: Հաւանաբար, երկրորդական մանրամասնութիւն մըն է պրպտելն ու երեւան հանելը, թէ ո՞վ էր առաջին անգամ ընկալուչը վերցնողն ու զանգողը, այսինքն նախաձեռնողը:
Պոլսոյ օդակայանին մէջ պատահած ահաբեկչական արարքը, ճիշտ առիթն էր, որ այս խօսակցութիւնը կատարուէր: Փութին, խոր ցաւակցութիւն յայտնած էր պատահած արարքին, որ խլած էր աւելի քան քառասուն զոհ, իսկ Էրտողան անգամ մը եւս իր կարգին ցաւակցութիւն յայտնած էր եօթ ամիսներ առաջ սպաննուած օդաչուի պարագաներուն:
Մէկդի դրած այս ձիւնհալին ստեղծելիք կացութիւնը տնտեսական բնագաւառէն ներս, անդրադառնանք թէ ի՞նչ ազդեցութիւն կրնայ ունենալ այս ռուս-թրքական մերձեցումը Հայաստանին եւ յատկապէս Արցախի հիմնահարցին վրայ:
Յստակ է թէ, Պաքու օգտուեցաւ երկու երկիրներու «պաղ» յարաբերութիւնէն: Արդարեւ, ռուսական արդի ռազմամթերքով օժտուած եւ թրքական դրդումն ու կանաչ լոյսը ստանալով, Ալիեւի ղեկավարութիւնը կատարած էր Ապրիլեան քառօրեայ պատերազմը: Արդեօք, ներկայ ձիւնհալով կարելի պիտի ըլլա՞յ Պաքուի համար նմանօրինակ յարձակումներ կրկնել: Հակառակ անոր որ, թէ՛ Անգարա եւ թէ՛ Մոսկուա պիտի նախընտրեն ոչ մէկ ապահովական եւ ռազմագիտական ոդիսականներ ձեռնարկել, սակայն տնտեսական Ռուսաստան-Ատրպէյճան-Թուրքիա գործակցութիւն մը, կրնայ որոշ ախորժակներ բանալ «ագահ» Ալիեւին համար:
Յստակ է թէ ներկայ իրավիճակով, այսինքն ռուս-թրքական ձիւնհալով, Մոսկուա աւելի կարելիութիւն պիտի ունենայ հետեւելու Կովկասեան բարձրաւանդակի անցուդարձերուն:
Մինչ այդ, ԵԱՀԿ-ի Մինսքի խմբակի գործակցութեամբ, արդէն իսկ Ռուսաստանի Արտաքին Գործոց նախարար՝ Սերգէյ Լաւրով գործի լծուած է հանդիպումներ կատարելով թէ՛ ազերի եւ թէ՛ հայ ղեկավարներու հետ: Հոս յստակ է թէ հայրենի կողմին համար առաջնահերթութիւն մըն է, որ Արցախը դիտորդի կարգավիճակով մասնակցի՛ ԵԱՀԿ-ի հանդիպումներուն:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles