ՊՈՒՆՏԸՍԹԱԿԻՆ «ՊԼԻՑՔՐԻԿ»Ը

0 0
Read Time:2 Minute, 1 Second

ABD0144_20150424 - WIEN - …STERREICH: Kundgebung "March for Justice" am Freitag, 24. April 2015, anl. 100. Jahrestag des Beginns des Genozids an den Armeniern in Wien. - FOTO: APA/HERBERT P. OCZERET

ՀԱՅՐԵՆԻՔ
Խմբագրական
Յունիս 3, 2016

Բ. Համաշխարհային պատերազմի օրերուն բազմիցս կատարուած «Պլիցքրիկ»էն՝ կայծակնային յարձակումներէն, տարբեր էր Յունիս 2-ին, Գերմանիոյ խորհրդարանէն ներս, ջախջախիչ մեծամասնութեամբ ընդունուած ի նպաստ Հայոց Ցեղասպանութեան ճանաչման բանաձեւը:
Ռազմաճակատներէն հեռու էր այս մէկ «Պլիցքրիկ»ը, որ վերջերս բազմիցս նշուեցաւ Արցախի Ապրիլեան քառօրեայ պատերազմին:
Գրեթէ երկու ամիս առաջ, այդ օրերուն Ատրպէյճանն էր «Պլիցքրիկ»ը կատարողը…ներշնչուած Բ. համաշխարհային պատերազմի Հիթլըրեան օրերու ծաւալողապաշտ եւ նախայարձակ ոճէն:
Պերլինի մէջ, Գերմանիոյ նման պետութեան մը նմանօրինակ դիրքորոշումը՝ խորհրդարանին կատարած կայծակնային ընտրութիւնը, յստակ է թէ ինչ նշանակութիւն ունի եւ ինչ դասեր կարելի է քաղել:
Առաջին հերթին, Գերմանիան Եւրոպական պարզ երկիր մը չէ, այլ ընդհակառակը, Եւրոմիութեան ռահվիրաներէն եւ տնտեսապէս այդ հին ցամաքամասի տնտեսապէս ամենէն աւելի ուժեղն ու հաստատ հիմերու վրայ կանգնողը:
Երկրորդ՝ Գերմանիան այն երկիրն է, որ այդ տարիներուն եղած է Թուրքիոյ գլխաւոր ռազմական դաշնակիցը եւ ապա տասնեակ տարիներ ետք,
այդ «Պլիցքրիկ»ի օրերուն, կատարած էր այլ Ցեղասպանութիւն մը՝ Հրեաներու Ողջակիզումը, որուն գծով արդէն իսկ տարիներէ ի վեր խորհրդարանը պատշաճօրէն ներողամտութիւն յայտնած էր:
Երրորդ՝ եօթանասունականներէն ի վեր թուրք բանուոր դասակարգի գաղթը, այնպիսի կացութիւն մը ստեղծած էր որ Ռայնի ափին ստեղծուած էր զօրաւոր գաղութ մը, եւ որուն յաջորդող սերունդը մուտք գործած էր քաղաքական ասպարէզ, մաս կազմելով տեղական զանազան կուսակցութիւններու եւ քաղաքական շարժումներու: Այդ միեւնոյն ծագումով թուրք սերունդն է, որ իր կարգին գործեց յաչս Հայոց Ցեղասպանութեան ճանաչման, ի բացառեալ կարգ մը կրօնամոլ եւ ազգայնամոլ տիպարներու: Յատկապէս «Կանաչներ»ու ներկայացուցիչ Ճէմ Էօզտեմիրն է, որ ամիսներ շարունակ ոգի ի բռին գործեց, յատկապէս լոպիինկի գործընթացէն ներս հետեւողական եւ վիթխարի աշխատանք ցուցաբերելով:
Չորրորդ՝ սուր պայքար չկատարուեցաւ խորհրդարանէն ներս: Ոչ մէկ յիշատակելի խոչընդոտ: Այլ ընդհակառակը, բանաձեւը մեծամասնութեամբ ընդունուեցաւ, արձանագրելով ընդամէնը մէկ դէմ, մէկ ձեռնպահ ձայն: Դեռ աւելին, այս պատմական բնոյթ ունեցող բանաձեւը պատրաստուած էր միասնաբար, շարունակ իրարու դէմ պայքարող կուսակցութիւններու կողմէ, որոնց կարգին յատկապէս Քրիստոնեայ-Ժողովրդավարական (CDU), Քրիստոննեայ-Ընկերվարական (CSU), Ընկերվար-Ժողովրդավարական (SDP) եւ ընդդիմադիր Կանաչներու կուսակցութիւնները, որոնք, յստակօրէն կը շեշտեն թէ Թուրքիոյ մէջ գտնուող հայկական ժառանգութեան պահպանման գծով անհրաժեշտ միջոցառումներ պէտք է որ քննուին, աւելցնելով թէ անցեալին Թուրքիոյ մէջ սկսած հայկական մշակոյթի պահպանութեան ջանքերը պէտք է ամենայն թափով շարունակել:
Այս խիզախ որոշումին լոյսին տակ, բնականաբար պերճախօս վկայութիւն մըն է կատարուածը, մարդկային իրաւանց նկատմամբ Գերմանիոյ յանձնառութեան, ինչպէս նաեւ աշխարհին ուղղուած պատգամ մը՝ անցեալին պատասխանատու կերպով մօտենալու կարեւորութիւնը յիշեցնող եւ արծարծող:
Այս ակնոցով պէտք է դիտել Պերլինի Պունտըսթակին «Պլիցքրիկ»ը…աշխարհագրականօրէն ոչ շատ հեռու այդ խաչմերուկէն, ուր
95 տարի առաջ, միեւնոյն օրերուն տեղական դատարանը անմեղ հռչակած էր քանի մը թաղ անդին Օսմանեան կայսրութեան ներքին գործոց նախարար Թալէաթ փաշան ահաբեկած, հայ վրիժառու Սողոմոն Թեհլիրեանը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles