«ՊՈՒԼԻՍՏՆԵՐ»ՈՒ ՆԱԽԱԳԱՀ ԺԷԺԷ ՔԷՇԵԱՆ ՓԱՌԱՒՈՐՈՒԱԾ Է
Կեդրոնականցի Արմենակ հեռաձայնեց:
– Մակա՛ր, մեծ լուր: Քաղաքապետարանի տեղեկատուին մէջ կարդացի, որ հայ համայնքը, նաեւ ազգը, պատուած են:
– Ի՞նչ պատիւ: Ո՞վ եկած Հայաստանէն,- հարցուցի:
– Ինչու միայն հիւրե՞րը կը պատուեն: Չէի գիտեր, որ մեր քաղաքը «Պուլիստներու Միութիւն»* ունի: Բազմաթիւ են միութիւնները եւ իւրաքանչիւրը նախագահ ունի: Իմացայ, որ մեր քաղաքի «Պուլիստներու միութեան» նախագահը մեր հայրենակից Ժէժէն է, Ժէժէ Քէշեան, անցեալին եղած է Գէորգ Քէշիշեան:
– Լաւ է, կը նշանակէ որ հայ Ժէժէն համարկուած, էնթէկրէ եղած քաղաքացի է:
– Չկարծես որ շքանշան ստացած է: Պսակաձեւ ժահրի, «քովիտ 19»–ի այս օրերուն «Պուլիստներ»–ը չեն խաղար: Բայց իրենց նախագահը քաջաբար այդ ժահրին դէմ առաջին պատուատուողներէն եղած է, եւ քաղաքապետարանի Կազէթը ի լուր աշխարհի հաղորդած է լուրը, որ Պուլիստներու նախագահը պատուաստուած է:
– Արմենա՛կ, ձեր քաղաքի Կազէթի լրագրողը էջի վրայ պարապ մնացած անկիւն մը ունէր եւ Ժէժէիդ պատուատուելու աւետիսը տուած է:
– Լսէ՛: Ժէժէն թեւին տակ տրցակ մը Կազէթով մը կը պտըտի, եւ ամէն անգամ որ մէկը բարեւէ, Կազէթ մը կու տայ, որուն մէջ իր պատկերն ալ կայ, ափին մէջ երկաթեայ գունտ մը:
– Ցուցադրուելու մարմաջի դարուն Ժէժէդ իր բաժինը ստացած է շաուէն (show): Ժամանակին մարդն է:
– Մակա՛ր, պատմութիւնը հոս չ’աւարտիր: Կազէթի լրագրողին դիտողութիւն ընողներ եղած են, որ այդ լրագրական ի՜նչ թեթեսոլիկութիւն է,- ուրեմն դեռ ողջմիտներ կան,- ան ըսած է որ նախագահ Ժէժէն զինք հրաւիրած է քաղաքի չինական ճաշարանը, եւ փափաքած, որ իր քովիտի դէմ պայքարելու-պատուաստուելու հերոսութեան լուրը հաղորդէ:
– Պռաւօ՛, ուրեմն ձեր քաղաքին մէջ կը շարունակուի ղազէթաճիութեան աւանդութիւնը:
– Մակա՛ր, Կազէթէն օրինակ մը պահած եմ քեզի համար: Կը ղրկես հայկական թերթերուն: Այս մէկը ընթացիկէն տարբեր գօտեպնդող լուր է:
Հեռախօսի անջատուելէն ետք, խորհեցայ, որ Կեդրոնականցին սփիւռքի վրիժառական տենչին պատմաբանը կրնայ ըլլալ եւ անմահացնել հերոս Ժէժէները:
Ի վերջոյ յաղթանակը աւելի լաւ է քան պարտութիւնը:
Մակար ի Գաղիա, 27 Յունուար 2021
* «Պուլիստ»ը կը խաղայ նարինջի մեծութեամբ մետաղեայ գունտերով: Ժողովրդական խաղ մը, որ ախոյեաններ ալ ունի:
