Պոսթընի Մէջ Հայաստանի Վերանկախացման Ձեռնարկ

0 0
Read Time:2 Minute, 35 Second

Harout FLAGS2Harout flags

Շաբաթ Սեպտեմբեր 12-ին, Պոսթընի հայահոծ Ուաթըրթաուն շրջանի Հայ Կեդրոնին մէջ, նշուեցաւ Հայաստանի Հանրապետութեան վերանկախացման տօնը: Այս առթիւ, հրաւիրուած էր Յարութ Փամպուքճեանը, իր նուագախումբով, որպէսզի խանդավառէ երեկոն:
Աւելի քան չորս հարիւր հայորդիներ ներկայ էին այս ձեռնարկին, որուն հանդիսավարն էր Ճորճ Պարմաքեանը: Նախքան Փամպուքճեանի ելոյթը, հանդիսավարը օրուան խօսքը փոխանցելու համար, բեմ հրաւիրեց Ա.Մ.Ն. Արեւելեան Շրջանի Կեդրոնական Կոմիտէի անդամ եւ «Հայրենիք»ի նախկին խմբագիր Խաժակ Մկրտիչեանը:
Ստորեւ, լոյս կ՛ընծայենք Խաժակ Մկրտիչեանի խօսքը.-
Սիրելի Հայրենակիցներ,
Հայաստանի Հանրապետութեան վերանկախացման տօնը, որ մեզ բոլորս համախմբած է այս յարկին տակ, կ’ուզեմ բնութագրել երեք բառերով՝ հպարտութիւն, մտահոգութիւն եւ յոյս:
Բոլորս այսօր հպարտանալու բազմաթիւ պատճառներ, երբ մեր հայրերն ու մեծ հայրերը անկախութեան գաղափարը ամբողջ եօթանասուն տարի իրենց կրծքին տակ պահեցին ու զայն կեանքի կոչելու ականատես եղան:
Բոլորս հպարտանալու արդար իրաւունքը ունինք, երբ ոմանց կողմէ մերժուած անկախ պետականութեան խորհրդանիշ եռագոյնին ու զինանշանին տիրութիւն ընելով՝ զանոնք փոխանցեցինք նորանկախ պետութեան:
Բոլորս հպարտանալու իրաւունք ունինք, երբ մեր ժողովուրդը մէկ մարդու պէս ոտքի կանգնեցաւ ու ոչ միայն վերատիրացաւ իր անկախ պետականութեան, այլ նաեւ կամաւոր ազատամարտիկներու գերագոյն նուիրաբերումով իր իրաւատիրոջ վերադարձաւ հայապատկան Արցախը:
Բոլորս հպարտանալու իրաւունք ունինք, որովհետեւ որպէս հայրենազուրկ սփիւռք ոչ միայն քաղաքական, տնտեսական ու քարոզչական աջակցոթեամբ մեր ներդրումը ունեցանք անկախութեան ձեռքբերման՝ այլ նաեւ Հայ Յեղափոխական Դաշնակցութեան գաղափարական ակունքներէն սնանած երիտասարդներ պատասխանեցին հայրենի հողի կանչին ու ոմանք նուիրաբերեցին իրենց գերագոյնը: Վկայ Մհեր Ջուլհաճեանն ու Վիգէն Զաքարեանը:
Ինչպէս հպարտանալու բազմաթիւ պատճառներ կան, այնպէս ալ մտահոգուելու բազում առիթներ այսօր մեզ կ’անհանգստացնեն:
Չենք կրնար չմտահոգուիլ, երբ կը տեսնենք թէ ինչպէս մեր թշնամին չէ հաշտուած պատմական արդարութեան հաստատման մտքին հետ եւ ամէն օր խախտելով հրադադարի պայմանները գազանաբարոյ իր դէմքը ցոյց տալով հայ կեանքեր կը խլէ:
Չենք կրնար չմտահոգուիլ, երբ մեր երկիրը վերանկախացումէն քսանհինգ տարի ետք դեռ չէ կրցած վերածուիլ այն ցանկալի հայրենիքի, որ հայրենաբնակ ժողովուրդին ու սփիւռքին տիրութիւն կ’ընէ:
Չենք կրնար չմտահոգուիլ, երբ մեր սեփական հայրենիքին մէջ կը տիրէ անպատժելիութեան ու անարդարութեան մթնոլորտ, արտօնեալ հեղինակութիւններ մեր ժողովուրդն ու երկիրը թալանելով զբաղած են:
Մտահոգուելու շատ լուրջ պատճառ է այն փաստը, որ մեր հայրենիքը չէ կրցած նուաճել այն մակարդակը որ տուն դարձի փարոս դառնայ տարագիր հայութեան: Աւելին, արտագաղթը հասած է մեր ազգային անվտանգութեան սպառնացող վտանգի աստիճանին:
Այս բոլորը սակայն մեզ յուսահատեցնելու փոխարէն մեզի պիտի մղեն սրբագրութեան վճռական պայքարին, որովհետեւ հայրենի երկնակամարին վրայ կան նաեւ յուստու ցոլքեր:
Արդարօրէն աւելի փայլուն ապագայի յոյս ունինք, երբ կը տեսնենք որ անցեալի կամաւոր ազատամարտիկին արժանավայել կերպով եկած է փոխարինելու հայ զինուորը, ու մարտունակ բանակով կը հսկէ հայրենիքի սահմաններն ու սահմանամերձ բնակավայրերը:
Աւելի փայլուն ապագայի յոյս ունինք, երբ կը տեսնենք, թէկուզ որոշ խարխափումով եւ քաղաքական ու կազմակերպական փորձի պակասով, հայրենի նորահաս երիտասարդ սերունդ մը հասած է, նոր մտածողութեամբ ու նոր կամքով վճռած է չլքել իր հայրենիքը, բողոքի ձայն կը բարձրացնէ ընդդէմ անարդարութեան եւ տէր կը կանգնի իր իրաւունքներուն:
Աւելի արդար համակարգ մը ունենալու յոյս ունինք, երբ սահմանադրական բարեփոխումներով կրնանք վերջ տալ միանձնեայ իշխանութեան ու օլիկարխին անձեռմխելիութիւն երաշխաւորող համակարգին:
Աւելի լաւ ապագայի յոյս ունինք, երբ կը տեսնենք սփիւռքահայ երիտասարդութեան եռանդը, Հայ Դատի յանձնախումբերու ու գրասենեակներու շուրջ համախմբուած կը շարունակէ յիշել ու պահանջել, Արցախի ճանաչման ու հայրենիքի հզօրացման համար պայքարիլ:
Հպարտանալով ու սրտցաւ մտահոգուելով յոյս ունինք, որ պիտի գայ այն օրը, ուր Ազատ ու Անկախ Հայաստանը պիտի վերածուի այն հաստատուն պատուանդանի, որուն վրայ պիտի կառուցուի Միացեալ, ամբողջական Հայաստանը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles