«Պելոռուսական Ռուլէթ»…

0 0
Read Time:1 Minute, 50 Second

p1-khemp-loukashenko-aliyev1

ՀԱՅՐԵՆԻՔ
Խմբագրական
Նոյեմբեր 28, 2016

«Ռուսական Ռուլէթ»ին մէկ տարբերակն է «Պելոռուսական Ռուլէթ»ը:
Տարբերակ ըսելով իսկապէս կը տարբերի ռուսական նախատիպէն: Տարբերութիւնն ալ, իր կարգին ունի երկու բոլորովին տարբերակներ.- առաջինը՝ փամփշտանոցները բոլորն ալ կը պարունակեն փամփուշտներ, իսկ երկրորդը՝ բոլորովին դատարկ են փամփշտանոցները:
Այսինքն, այս տարբերակները ցոյց կու տան թէ բոլորովին անյոյս է այդ խաղին մասնակցողը, եւ միայն ճակատագիրն է որ կը տարբերի…:
Այս բացատրողականը լաւապէս կը ներկայացնէ Պելառուսիոյ վարած քաղաքականութիւնը՝ Հայաստանի հետ, յատկապէս նկատի ունենալով բռնատէր նախագահ Ալեքսանտր Լուքաշենքոյի այցելութիւնը, այլ բռնատիրոջ մը՝ Իլհամ Ալիեւին, այդ ալ այս շաբաթասկիզբին՝ Նոյեմբեր 28-29-ին:
Կրօնական եւ ընկերային ապրելակերպի պայմանները մէկդի դրած, յար եւ նման են Պելառուսիոյ եւ Ատրպէյճանի բռնատիրական ղեկավարութեան ոճը:
Տնտեսական սերտ կապ եւ գործակցութիւն գոյութիւն ունի Մինսքի եւ Պաքուի միջեւ, եւ քաղաքական այլ դաշինքներ, համաձայնութիւններ կամ պարտաւորութիւններ բոլորովին երկրորդական եւ անկարեւոր կը նկատուին:
Արդէն իսկ, «Պելոռուսական Ռուլէթ»ն ու Լուքաշենքոյի Ատրպէյճանամէտ քաղաքականութիւնն ու ընթացքը յստակօրէն պարզուած էր, անցեալ Հոկտեմբերի կէսերուն, Երեւանի մէջ կատարուած Հաւաքական Անվտանգութեան Պայմանագրի Կազմակերպութեան (Հ.Ա.Պ.Կ.) սեղմ կազմով խորհուրդի նիստին, երբ Պելառուսիոյ նախագահը չներկայացաւ լրագրողներու հետ սպասուած հանդիպում-զրոյցին, հակառակ կատարուած խոստումներուն եւ համաձայնութիւններուն:
Հոս տեղին է նշել թէ, յատկապէս Ալեքսանտր Լուքաշենքոյի հետ կատարուելիք
այս մամլոյ ասուլիսն ու լրագրողներու հետ սպասուած զրոյցը կարեւոր էր, այն իմաստով որ, Հաւաքական Անվտանգութեան Պայմանագրի Կազմակերպութեան խորհուրդի յառաջիկայ 2016-17 տարեշրջանի նախագահութիւնը պիտի ստանձնէ նոյնինքն Պելոռուսիան:
Նոյեմբեր 28-ին, Պաքուի մէջ նախագահներ՝ Ալիեւ եւ Լուքաշենքօ հանդթս եկան միացեալ յայտարարութեամբ մը, որուն մէջ կը յայտարարէին թէ երկու երկիրներն ալ կը հաստատեն թէ առաջնահերթ է Արցախի հիմնահարցի կարգաւորումը, որ անպայմանօրէն պէտք է համապատասխանէ միջազգային իրաւունքի կանոններուն, յատկապէս ինքնիշխանութեան ապահովման, տարածքային ամբողջականութեան եւ պետութեան սահմաններու անխախտելիութեան սկզբունքներուն, ինչպէս նաեւ Միացեալ Ազգերու Կազմակերպութեան Անվտանգութեան խորհուրդի համապատասխան բանաձեւերուն եւ որոշումներուն:
Վերոյիշեալ նախադատասութիւններու շարադրումն ու բացատրողականն իսկ Պաքուի յանկերգն է, որ կը կրկնուի Արցախի անկախութեան օրերէն…այսինքն ահաւասիկ 25 տարիներէ ի վեր:
Այս միեւնոյն յայտարարութիւնը, նաեւ կատարած էր Պելոռուսիոյ Արտաքին Գործոց նախարարը՝ քառօրեայ պատերազմի առաջին օրերուն, նոյնիսկ խեղաթիւրելով ռազմադաշտին վրայ պատահածը, եւ անուղղակիօրէն քննադատելով հայկական կողմը՝ իբրեւ նախայարձակ:
Օրին, Երեւանի մօտ Պիելոռուսիոյ դեսպանը կանչուած էր Հ.Հ. Արտաքին Գործոց նախարարութեան կողմէ եւ ազդարարուած թէ նմանօրինակ յայտարարութիւններ անյարիր եւ անընդունելի են, յատկապէս Հաւաքական Անվտանգութեան Պայմանագրի Կազմակերպութեան անդամ երկու երկիրներուն համար:
Այս անգամ, նախագահ Լուքաշենքոյի նոյնանման յայտարարութենէն ետք, ժամանակն է չէզօքացնելու «Պելոռուսական Ռուլէթ»ը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles