ՊԱՏՆԷՇՆԵՐՈՒ ԵՏԻՆ ԿԱՆԳՆԱԾ ՀԵՐՈՍՆԵՐՈՒ ԱՄԱՆՈՐԸ

0 0
Read Time:1 Minute, 51 Second

ՀԱՅՐԵՆԻՔ
Խմբագրական
Յունուար 2, 2017

«Դժգոհ է այն երկիրը, որ կարիքն ունի հերոսներու»
Գերմանացի թատերագիր եւ բանաստեղծ Պերթոլտ Պրեշթ (1898-1956)

Տարեվերջին կը կատարուին հաշուեյարդարներ ու կը ներկայացուին տարուան ընթացքին կատարուած իրադարձութիւնները:
Զանազան բնագաւառներէ ներս կատարուած աշխատանքները կը նշուին, թէ՛ յաջողութիւնները եւ թէ՛ ձախողութիւնները: Եւ ըստ այնմ տարեսկիզբին կը կատարուին մաղթանքներ եւ յառաջիկան ընկալելու առաջարկներ:
Բնականաբար շատ մելան կարելի է հոսեցնել անցնող տարուան մասին, որուն ընթացքն ալ ըստ երեւոյթին պիտի շարունակուի ո՛չ թէ միայն այս տարի, այլ յառաջիկայ տարիներուն եւս:
Քաղաքականութեան համաշխարհայնացած պայթուցիկ կացութիւնը զգացինք մեր մորթին վրայ, Սուրիոյ պատերազմի ահաւոր ու դժնդակ օրերուն: Յատկապէս Հալէպն է որ ամիսներ շարունակ ռմբակոծուեցաւ, ցնցուեցաւ, մռայլեցաւ եւ գրեթէ կիսափուլ վիճակի մէջ մնալէ ետք, բաւական մը ինքզինք վերագտաւ:
Դաժան օրեր անցնելէ ետք, ի վերջոյ Հալէպահայը կրցաւ տօնել իր Ամանորը՝ Նոր Տարին ու Սուրբ Ծնունդը: Ամանոր մը որուն կարիքն ունէր:
Սակայն շրջանը ցայսօր կը մնայ պայթուցիկ կացութեան մէջ, յանձին «Մեծ»երու կիրարկած վատ խաղերուն:
Դեռ շատ մանրամասնութիւններու մէջ կարելի է մուտք գործել, թէ՛ Հայաստանի եւ թէ՛ մերձակայ շրջանները նկատի ունենալով, սկսելով անցեալ Յուլիս 15-ին կատարուած Թուրքիոյ ձախողած պետական հարուածէն, պոլսահայ երեսփոխան Կարօ Փայլանի եւ անոր պատկանած քրտամէտ Ժողովուրդներու Ժողովրդավարական Կուսակցութեան անդամներու հալածանքներէն մինչեւ «Սասնայ Ծռեր»ու շաբաթներ շարունակ կատարած արարքը՝ Երեւանի մէջ:
Այս բոլորէն աւելի, կը գերադասուին, պէտք է որ գերադասուին Արցախի հիմնահարցին շուրջ կատարուած անցեալ տարուայ եղելութիւնները եւ այդ իսկ պատճառով առանց այլեւայլի այս ամանորը կը պատկանի պատնէշներու ետին կանգնած այդ անյայտ, համեստ ու հողին կառչած զինուորներուն:
Հակաքարոզչութենէ աւելի ստախօսութիւն է խօսիլ զինադադարի մասին: Բազմիցս կը նշենք զինադուլի խախտման մասին, հաւանաբար ներկայացուած
ոճն ու ինքնին նախադասութիւնը պէտք է փոխել ու շրջանցել, եւ շատ աւելի իրապաշտ է տեղեկացնել թէ պատերազմի ճակատին վրայ քանի մը ժամով կամ օրով, համեմատաբար աւելի հանդարտութիւն կը տիրէ:
Այո՛, կատարուած իրադարձութիւնները նկատի ունենալով կարելի չէ նկարագրել պատահածը՝ իբրեւ զինադուլի խախտում: Պատահածը պատերազմ է, մե՛րթ պաղ, մե՛րթ տաք ու սաստիկ, որուն ցայտուն օրինակը՝ անցեալ Ապրիլեան քառօրեայ պատերազմն էր:
Ամանորի այս օրերուն, իբրեւ հայորդի, կարելի չէ այլ բանի մասին մտածել: Այդ անծանօթ զինուորներուն կամ ինչպէս տեղայնական նկարագրումով՝ զինծառայողներուն տարին է որ պէտք է նշել:
Շարքը երկար է սուրբ հողին համար զոհուած հերոսներուն անունները: Առանց բացառութեան պէտք է նշել զանոնք:
Անդրադառնալով Պրեշթի հաստատումին, մենք երբեք դժգոհ չենք: Շատ են մեր հերոսները:
Հետեւաբար, մոմ ու խունկ …ի յարգանք այս հերոսներուն:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles