ՊԱՏՄԱԿԱՆ ՃԱԿԱՏԱԳՐԱԿԱՆ ՓՈՐՁԱՔԱՐ

0 0
Read Time:3 Minute, 20 Second

 

kes1  ՊԵՏՐՈՍ ՔՀՆՅ. ՇԻԹԻԼԵԱՆ

 

Այսօր ինչ որ այսօր տեղի կ’ունանայ Քեսապի մէջ իր մէջը մեծ խորհուրդ մը ունի:

Քեսապի հարցը միայն հայկական հարց մը չէ,

Քեսապի հարցը միայն  փոքր հողատարածքի մը հարց մը չէ,

Քեսապի հարցը կրնայ ըլլալ, որ պատմական ճակատագրական փորձաքար մըն է մեզի համար:

Ան փորձաքար մըն է մեզի համար որպէս ազգ, որպէսզի հասկնանք թէ այսքա՜ն տարիներու աշխատանք է ետք ուր հասած ենք և ուր կը կենանք, ան յաջորդ Արցախեան  պատերազմն է՝ այս անգամ մեր մեծ թշնամիին դէմ, և ան կրնայ ըլլալ այն շրջադարձային պահը, որ բեկում մը կրնայ յառաջացնել մեր ու մեր թշնամիին ուժերու յարաբերութեան դասաւորման մէջ:

Յայտնի Ամերիկացի քրիստոնեայ հրապարակախօս մը այս առիթով յօդուած մը գրած է ու մեր թշնամին կոչած է «հակաքրիստոս ժողովուրդ», Antichrist Nation of Turkey, (http://shoebat.com/2014/03/27/antichrist-nation-turkey-wants-revive-genocide-christians/):

Այսօր քրիստոնեայ աշխարհի կարեւոր մէկ մասը կը խօսի Քեսապի մասին: Այդ մասին կը խօսի մանաւանդ Ուղղափառ Ռուսիան իր զանգուածային լրատուական միջոցներով, Թուրքիոյ դերը մատնանշող՝ արտաքին  գործոց նախարարութեան յայտարարութեամբ և ՄԱԿ-ի անվտանգութեան խորհուրդին մէջ Քեսապի հարցը օրակարգի նիւթ դարձնել փորձելով, բան մը որ մերժուեցաւ Արեւմուտքին կողմէ: Վերջին օրերուն Ռուսիոյ մէջ նոյնիսկ ձայներ կը բարձրանան կամաւորական գունդեր կազմելու համար, առ ի պաշտպան Սուրիոյ քրիստոնեաներուն:

Այս պայքարին մէջ մեզի դաշնակից է նաև աւանդական և չափաւորական  Իսլամը, որուն ներկայացուցիչները արդէն իրենց ձայնը բարձրացուցած են Քեսապի համար, ինչպէս որ այդ մէկը ըրաւ Չիչենիոյ ղեկավար Քատիրովը և ուրիշներ:

Բայց այս բոլորէն անդին ու առաջին Քեսապը մե՛ր հարցն է, պատմական Հայաստանէն մնացած վերջին բեկորը ու այս պատճառով ան ճակատագրական է:

Վա՜յ մեզի, եթէ այսօր պատմութեան մեզի նետած մարտահրաւէրին համապատասխան չըլլանք,

Վա՜յ մեզի, եթէ օտարներուն և նոյնիսկ մեր բարեկամներուն վրայ միայն մեր յոյսը դնենք,

Վա՜յ մեզի, եթէ քաղքենիանանք ու եթէ կարիքը հասնի՝ հրաժարինք հայկական հերոսական մեր բռունցքը ի գործի դնելէ:

Դեռ քաղաքական միջոցները օգտագործելու տեղ ու ժամանակ կայ, չնայած այն բանին որ այսօրուան դրութեամբ այնպէս կ’երեւի, որ Քեսապի գրաւումը կատարուած է մեծերէն կանաչ լոյս ստանալով:Այսօր պաշտօնական անձինք ամէն բան կ’ըսեն Քեսապի համար, կ’ընդունին որ Քեսապը գրաւուած է Ալ-Քայիտայի հետ կապ ունեցող ոհմակներուն կողմէ, բայց կը խուսափին Թուքիոյ դերը մատնանշելէ, առանց որուն մանուկին անգամ հասկնալի է որ Քեսապի գրաւումը տեղի չէր կրնար ունենալ: Անկարելի է չտեսնել այն հանգամանքը, որ Թուրքիան՝ Սուրիոյ տագնապը և Ուքրանիոյ հարցէն ետք քաղաքական նոր իրավիճակը օգտագործելով, առիթը գտաւ հարուածելու նաե՛ւ մեզ, մեր ամենազգայուն ջիղին, պատմական Հայաստանէն մեզի մնացած վերջին բեկորը խլելով:

Յստակ է, որ հարցը պիտի լուծուի գետնին վրայ, ով որ զօրաւոր է ա՛ն է որ պիտի լուծէ այս հարցը:

Սուրիական պետական բանակը վճռական է ու անկեղծ Քեսապը վերադարձնելու իր ճիգին մէջ: Բայց եթէ հարցը երկարի, կրնայ ըլլալ որ անհրաժեշտութիւնը ծագի Քեսապցիին ու հայուն մասնակցութեան, որպէս խորհրդանշական ու օժանդակ ոյժ: Եթէ խորանանք՝ Քեսապը բացի սուրիական հող ըլլալէ, նաև և աւելի՛ հայկական հող է, պատմական Հայաստանի վերջին բեկորը՝ իր բարբառով ու բանահիւսութեամբ, և հարիւրամեակի սեմին մեր ամենամեծ ձախողութիւնը պիտի ըլլայ կորսնցնել զայն: Անհրաժեշտ է որ լաւ ըմբռնենք. եթէ իսկական տէրը բացակայ է, օտարն ու  բարեկամը նոյն կորովով պիտի չպայքարին ատոր համար: Այս մէկը լաւ ըմբռնած են Սուրիոյ քրիստոնեայ այլ փոքրամասնութիւնները:

Ամենէն կարեւորը հողը վերադարձնելն է, որովհետեւ Մեծ Եղեռնի փորձառութենէն ելլելով կրնանք հաստատել որ մարդկային կորուստը ինչքան ալ ցաւալի ըլլայ՝ փոխարինելի է, հայը շինարար ըլլալով լաւ գիտէ արագօրէն ու աւելի գեղեցկօրէն աւերուածը կարուցել, կարեւորը հողը չկորսնցնելն է:

Խօսքը աննպատակ և չարդարացուած թիւերով զոհեր տալու մէջը չէ, խօսքը լիբանանեան քաղաքացիական պատերազմին նման՝ ոչ մեծ թիւով ու մասնագիտացուած հայկական ուժին ներկայութիւնն է` ըլլա՛յ Սփիւռքէն, ըլլա՛յ Արցախեան պատերազմի փորձառութիւնը ունեցող մեր եղբայրներէն որոնք ցանկութիւն արդէն յայտնած են, ոյժ մը՝ որ պէտք է ունենայ յստակ դիրքորոշում ու նպատակ և այդ մէկը, սուրիական քաղաքացիական պատերազմին մէջ կողմ չըլլալն է ու միայն իր ժողովուրդին ու տարածքին պաշտպանութիւնը ապահովելը, որովհետև կան պարագաներ երբ չէզոքութիւն պաշտպանելը ոյժ կը պահանջէ, կան պարագաներ երբ առանց ոյժի չէզոքը ոտնակոխ կրնայ ըլլալ: Այս մէկը պէտք է ընել առանց աղմուկի, ցուցամոլութեան ու պոռոտախօսութեան:

Քեսապը հայու ու թուրքի պայքար է

Քեսապը բարու ու չարին պայքար է

Քեսապը քաղակակրթութեան և բարբարոսներու պայքար է

Ու վերջապէս Քեսապը ճակատագրական պայքար է, որ պէ՛տք է ու պիտի՛ վերջանայ զայն վերադարձնելով:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles