0
0
Հինգշաբթի, Յունուար 31-ին եւ Կիրակի, Փետրուար 3-ին, յաջորդաբար Պոսթընի եւ Նիւ Եորքի մէջ, տեղի ունեցան դասախօսական ձեռնարկներ, կազմակերպութեամբ երկու շրջաններու Համազգայինի մասնաճիւղերուն:
Դասախօսն էր պատմագէտ Արտակ Մովսիսեանը, որ 1997-էն ի վեր տիրացած է իր տոքթորականին, իբրեւ աւարտաճառ ունենալով Վանի թագաւորութեան պատմութիւնը:
Պոսթընի մէջ կազմակերպուած ձեռնարկը տեղի ունեցաւ Ուաթըրթաունի Հայ Կեդրոնի “Լաչինեան“ սրահին մէջ, իսկ Նիւ Եորքի մէջ կատարուած ձեռնարկը, որ հովանաւորուած էր Համազգայինի Նիւ Եորքի եւ Նիւ Ճըրզիի մասնաճիւղերուն կողմէ, տեղի ունեցաւ Սուրբ Գրիգոր Լուսաւորիչ եկեղեցւոյ մէջ: Պոսթընի մէջ կատարուած ձեռնարկին, ներկայ էին վաթսունի շուրջ հայորդիներ, որոնք աւարտին բազմաթիւ հարցումներ ուղղեցին դասախօսին:
Նիւ Եորքի մէջ կատարուած ձեռնարկին, ներկայ էին Ա.Մ.Ն. Արեւելեան Շրջանի Համազգայինի Շրջանային Վարչութեան անդամներ` Յասմիկ Աբրահամեան եւ Յակոբ Մելքոնեան: Աբրահամեան կատարեց ձեռնարկին բացումը եւ բեմ հրաւիրեց Նիւ Եորքի Համազգայինի մասնաճիւղի ատենապետ Արա Գաբրիէլեանը, որ ներկայացնէ օրուան դասախօսը: Ապա բեմ բարձրացաւ դասախօսը, որ փոխանցեց հետաքրքրական փաստագրական տեղեկութիւններ հայութեան ծագումին մասին:
Նշենք թէ, Մովսիսեան պատրաստած է խտացուած հայոց պատմութեան գրքոյկներ, յատուկ սփիւռքահայ շաբաթօրեայ վարժարաններուն համար:
