Ուաշինկթըն եւ Մոսկուա՝ Պրիւքսէլի Հետքերով, Սակայն Տարբեր Ուղղութեամբ

1 0
Read Time:2 Minute, 37 Second

«Հայրենիք» – Պոսթըն

Խմբագրական

Վերջերս, թէ՛ Ուաշինկթըն եւ թէ՛ Մոսկուա աւելի յաճախ կ՛արծարծեն Արցախի հիմնահարցը։
Հայութեան  ներազգային ահաւոր վիճակին ենթապատկերին դիմաց, ուշագրաւ է Ուաշինկթընի Ազգային ապահովութեան հարցերու խորհրդական Ճէք Սալիվընի մէկ դիպուկ յայտարարութիւնը՝ Ատրպէյճանի նախագահի աշխատակազմի արտաքին յարաբերութիւններու վարչութեան ղեկավար Հիքմեթ Հաճիեւի հետ ունեցած հանդիպումին առիթով. ան կ՛ողջունէ Ատրպէյճանի եւ Հայաստանի միջեւ «կարեւոր ու պատմական դիւանագիտական ջանքերը», եւ յատկապէս Եւրոպական խորհուրդի նախագահ Շարլ Միշէլի հիւրընկալած բանակցութիւնները, որոնք կը միտին մնայուն խաղաղութեան հաստատման:
Պաշտօնական հաղորդագրութեան մէջ, յաւելեալ մանրամասնութիւններով շեշտուած է, որ «Ուաշինկթըն պատրաստ է սերտօրէն ներգրաւուելու եւ յառաջընթացին աջակցելու տարբեր միջոցներով, ներառեալ իբրեւ Եւրոպայի անվտանգութեան եւ համագործակցութեան կազմակերպութեան Մինսքի խմբակի համանախագահ»։ Հաւանաբար, այս կեցուածքին յաւելեալ զեկուցումներով տեղեակ պահուեցաւ Հ․Հ․ փոխվարչապետ Մհեր Գրիգորեան, որ Ազգային ժողովի արտակարգ նիստէն խուսափեցաւ եւ Արցախի հարցը արհամարհեց իր պոսին  եւ խմբակիցներուն պէս, երբ յատուկ հանդիպում մը ունեցաւ  Երեւանի մօտ Միացեալ Նահանգներու դեսպան Լին Թրէյսիի հետ։
Ռուսական մօտեցումն ու հակազդեցութիւնը տարբեր եւ կտրուկ էր, յանձին անվտանգութեան խորհուրդի քարտուղարի տեղակալ Ռաշիտ Նուրկալիեւի, որ յիշեցուց, թէ Հայաստանի եւ Ատրպէյճանի միջեւ զինադադարի հաստատման Մոսկուայի յաջող միջնորդութենէն ետք էր որ կարելի եղաւ դադրեցնել պատերազմը։
«Ռուսիան այսօր աշխոյժ եւ հետեւողական ջանքեր կը գործադրէ՝ Հայաստանի եւ Ատրպէյճանի միջեւ խաղաղութեան պայմանագիրի կնքումին յարմար պայմաններ ստեղծելու ուղղութեամբ, մինչդեռ Ուաշինկթըն շահագրգռուած է առժամեայ տագնապներով, որոնք կը վնասեն դրացի պետութիւններու կայուն կեանքին», յայտնեց Ռուսիոյ անվտանգութեան խորհուրդի քարտուղարը, յստակօրէն պատասխանելով ուաշինկթընեան աղբիւրներու վերջին յայտարարութիւններուն։
Պաշտօնական տեսակցութիւններ եւ յայտարարութիւններ դուռ կը բանան զանազան վերլուծումներու եւ եզրակացութիւններու։ Եւ որքա՜ն ուշագրաւ պիտի ըլլայ, եթէ բաղդատական մը կատարուի մէկ կողմէ՝ օտարներու այս ջե՜րմ հետաքրքրութեան եւ միւս կողմէ՝ Երեւանի իշխանաւորներուն կրաւորական, անտարբեր եւ նոյնիսկ «այլամերժ» կեցուածքին միջեւ, ակնթարթ մը մէկդի դրած անբանութիւնն ու իմաստականութիւնը։
Մեծամասնութիւն վայելող «Քաղաքացիական Պայմանագիր» կուսակցութիւնը, Յունիս 3-էն քանի մը օր առաջ, հոգիի ու խղճի ամենայն հանգստութեամբ եւ ճակատաբաց յայտարարած էր, որ կը մերժէ մասնակցիլ Արցախի ճակատագիրը քննարկման դնելով Ազգային ժողովի արտահերթ նիստին, զոր հրաւիրած էր ընդդիմադիր ճակատը: Իշխանութիւնը, խմբովին եւ անհատ նախարարներու եւ երեսփոխաններու բերնով, նաեւ անոնց կեցուածքները թմբկահարող կամակատարներուն ճամբով յստակօրէն մերժեց յայտարարել, թէ Արցախի ապագան չի տեսներ Ատրպէյճանի կազմին մէջ: Իսկ անկէ առաջ, նոյն «հայրենասէր մանտադաւորները» արդէն 180 աստիճանի շրջադարձ կատարած էին «Արցախը Հայաստան է եւ վերջ» կեցուածքէն եւ ընդունած, որ Արցախը ապագայ ունի Ատրպէյճանի կազմին մէջ, իրենց համար ընդունելի է արցախցիները ազերիական հովանիի տակ իբրեւ ազգային միաւոր մը վերարտադրելու (եւ Արցախի վերջնական հայաթափման ճամբան բանալու) ընտրանքը, որ հայութեան կոկորդէն վար կը թխմեն Շարլ Միշէլները եւ անոր թուրք ու ազերի գործակիցները:
Արդ. ենթադրե՞նք, թէ մեր ազգային ապահովութիւնն ու շահերը հետաքրքրող, մինչեւ իսկ Հայաստան-Արցախի «լինել-չլինելու» խիստ այժմէական եւ անյետաձգելի թղթածրարը վստահուած է այլ երկիրներու, այսինքն՝  նոր-ազատական (neo-liberal) տրամաբանութեամբ՝ ճակատագրական պարտականութիւնը վստահելով օտարներու յանձանձումին (արդի աշխարհի առեւտրական բառամթերքին մէջ գործածուող՝ outsourcing իմաստով):
Վերջերս, փողով-թմբուկով ուղեւորուած հայկական արբանեակը հաւանաբար հեռուէն, շատ հեռուէն նկարելով, նկատելով կամ… չնկատելով Ազգային ժողովին մեծամասնութիւն վայելող խմբակին հայրենապաշտպան գործունէութիւնը՝ պիտի հետեւի Կովկասեան բարձրաւանդակի անցուդարձերուն։
Ի վերջոյ, ներկայ համաշխարհայնացած «խենթանոց»-ին մէջ, ամէն բան կարելի է ակնկալել: Սակայն մէկ բան յստակ է: Հայաստանի ներկայ ղեկավարութեան իրողական անէացումէն օգտուելով, մեծ պետութիւնները գործի լծուած են միայն ու միայն իրենց անձնական շահերուն դիտանկիւնէն: Պէտք չէ զարմամանք, եթէ իշխանաւորները վաղը իրենց ա՛յս համբակութեան «պտուղներ»-ն ալ նետեն «հիներուն» ճիտին, նաեւ մեղադրանքներ շռայլեն ռուսին, ամերիկացիին (բայց ո՛չ թուրք-ազերիին) եւ այլոց…:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles