Ուաթըրթաուն․- Սուրբ Ստեփանոս Ազգային Վարժարանի Տնօրէնուհի Հուրի Պոյամեան Հանգստեան Պիտի Կոչուի

0 0
Read Time:1 Minute, 21 Second

ՈՒԱԹԸՐԹԱՈՒՆ (Մասարուսէց) ․- Սուրբ Ստեփանոս ամենօրայ ազգային վարժարանի խնամակալութիւնը, յատուկ հաղորդագրութեամբ մը տեղեկացուց, թէ տնօրէնուհի Հուրի Պոյամեան նամակ մը յղած է տեղեկացնելով, որ կը պատրաստուի հանգստեան կոչուելու։ Երկար տարիներ պաշտօնի վրայ ըլլալով, ան կրցած էր հետեւողականօրէն քայլ պահել այս կրթօճախի բարելաւման եւ մակարդակի բարձրացման։

Ստորեւ, լոյս կ՛ընծայենք, տիկին Պոյամեանի յղած նամակը․-

Սիրելի ուսուցիչներ, ծնողներ եւ բարեկամներ,

Երեսուն չորս հրաշալի տարիներ անխոնջ ծառայելէ ետք իբրեւ Սուրբ Ստեփանոս Ազգային Վարժարանի Տնօրէն, ձեզի կ՛ուզեմ տեղեկացնել, որ կը պատրաստուիմ հանգստեան կոչուելու: Անշուշտ այս որոշումը դիւրին չէր, նկատի առնելով իմ աննկուն նուիրումս այս դպրոցին եւ հայեցի դաստիարակութեան հանդէպ: Սուրբ Ստեփանոս Ազգ. Վարժարանի տնօրէնութիւնը վարելը պաշտօն մը չէր այլ առաքելութիւն մը, որ ժառանգած եմ, Շանթէն, Աղբալեանէն, մտաւորական հօրմէս եւ ուսուցիչներէս: Անցնող տարիները, հակառակ բորոր դժուարութիւններուն, կեանքիս ամէնէն իմաստալից եւ գոհունակութիւն պատճառող տարիներն էին:

Բախտաւոր եղած եմ շրջապատուած ըլլալով աննման պաշտօանկիցներով, որոնց հետ զօրաւոր կապեր հաստատած եմ: Մեծագոյն հաճոյքներէս մէկն եղած է հետեւիլ տարիներու ընթացքին մեր աշակերտներուն յառաջդիմութեանց եւ յաջողութիւններուն, ինչպէս նաեւ անոնց մէջ ազգային ոգիի զարգացման: Առաւել ուրախութիւն էր տեսնել մեր շրջանաւարտներուն գործունեայ դերը հայ կեանքէն ներս, ըլլայ հոս կամ Հայրենիքի մէջ:

Սիրով գործակցած եմ իրերայաջորդ խնամակալութիւններուն, յանձնախումբերուն, նուիրեալ ուսուցիչներուն, վարչական կազմի անդամներուն, եւ դպրոցին նուիրեալ կամաւորներուն հետ ստեղծելու համար դրական միջավայր եւ բարձրորակ երկլեզու ուսում մեր աշակերտներուն համար:

Նպատակս է օգնել Դպրոցի Խնամակալութեան իր փնտռտուքին մէջ, եւ դիւրացնել պաշտօնի փոխանցումը նոր տնօրէնին: Այս առիթով յանձնախումբ մը կազմուելու վրայ է գլխաւորութեամբ, Խնամակալութեան ատենապետ՝ Մայքըլ Կիւզէլեանին: Պաշտօնս պիտի շարունակեմ մինչեւ,զիս փոխարինողը գտնուի:  Սուրբ Ստեփանոս Ազգային Վարժարանը լոյսի եւ յոյսի փարոս մըն է: Իմ փափաքս է, որ մեր համայնքի բոլոր անդամները երկար տարիներ շարունակ գուրգուրան եւ նպաստեն անոր յառաջդիմութեան:

Շնորհակալութիւն՝

Տնօրէնուհի՝

Հուրի Պոյամեան

 

Happy
Happy
100 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles