ՇԻՐԻՆ ԱՊՈՒ ԱՔԼԷ՝ ՃՇՄԱՐԻՏ ԽՕՍՔԻ ՈՒԺԸ ՄԱՐՄՆԱՒՈՐՈՂԸ

0 0
Read Time:3 Minute, 59 Second

ԱՐՇՕ ՊԱԼԵԱՆ

«Հայրենիք»

Մինչ աշխարհը Ռուսիան կը մեղադրէ եւ անոր դէմ պատժամիջոցներ որդեգրելու մասին կը խօսի, ոչինչ կը կատարուի պաղեստինցիներուն զօրակցելու նպատակով։

Պաղեստինցի ակներեւ լրագրող Շիրին Ապու Աքլէի վայրագ սպանութենէն ետք, արաբական աշխարհի եւ ընդհանրապէս աշխարհի տարբեր անկիւններուն, ինչպէս նաեւ Հարաւային Ափրիկէի խմբագրատուներուն եւ պատկերասփիւռի կայաններուն մէջ բռնկեցաւ անբացատրելի ցասում մը՝ գործուած այս անարգ ոճիրին նկատմամբ։

11 Մայիս 2022-ին, Շիրին Ապու Աքլէ, որ ուղղակի սփռումով կ’անդրադառնար իսրայէլեան ուժերուն կողմէ Ժենին ներխուժելու գործողութեան, սառնարիւնութեամբ սպաննուեցաւ՝ աշխատանքի պահուն։

Շիրին Ապու Աքլէի հետ գործող անձնակազմը, որ ականատես էր դէպքին, հաստատեց, որ Շիրին ուղղակի թիրախ դարձած էր։

Անոր գործընկերները հաստատեցին, որ այդ ոճիրը ուղղակի գործուած էր եւ կարելի չէ ըսել, որ անիկա սխալմունք էր, կամ պաղեստինեան եւ իսրայէլեան ուժերուն միջեւ արձանագրուած կրակոցներու իբրեւ հետեւանք պատահած դէպք մը։

51 տարեկան Շիրին Ապու Աքլէ զոհ գացած էր Պենեթի վարչակարգին կողմէ գործուած քստմնելի ոճիրին։

Շիրին Ապու Աքլէի աշխատանքը կ’ենթադրէր բծախնդիր, ճշգրիտ, անթերի եւ անկեղծ հաղորդում, իսկ «Ժազիրա» արբանեակային պատկերասփիւռի կայանի վաստակաւոր լրագրողը կարողացած էր այդ մէկը կատարել շուրջ քառորդ դար, լուսարձակի տակ առնելով իսրայէլեան բռնարարքներն ու բռնագրաւումը։

Ապու Աքլէի կողմէ տեղուոյն վրայ կատարած հաղորդումները, որոնք ցոյց կու տային իսրայէլեան վարչակարգի օրական դրութեամբ գործած ձերբակալութիւնները, պաղեստինցիներուն բնակարաններուն քանդումը, իսրայէլեան ռմբակոծումներն ու պաղեստինցիներուն դէմ գործուած ոճիրները, լրագրողը դարձուցին իսրայէլեան ուժերուն թիրախը։

Երուսաղէմի մէջ հասակ առած պաղեստինցի լրագրողը Շիրին Ապու Աքլէ, քաջածանօթ էր բռնագրաւուած Պաղեստինեան հողերուն, ինչպէս նաեւ 1948-ի Պաղեստինին։ Սահմաններուն մասին անոր պատմական գիտելիքներն ու իւրացուցած յիշողութիւնը՝ Նաքպային մասին, զայն դարձուցած էր «Ժազիրա»-ի ամէնէն փայլուն եւ տիրապետող լրագրողներէն մէկը։

Հարուստ տեղեկութիւններով եւ արհեստավարժ լրագրող Ապու Աքլէի ներկայացուցած կշիռը ինքզինք պարտադրեց, անոր սպաննութեամբ։ Ապու Աքլէի յիշատակին մատուցուած յարգանքը՝ բոլորին կողմէ՝ ամբողջ աշխարհի տարածքին, եւ յատկապէս ընկերային ցանցերուն ընդմէջէն եղաւ առատ հոսք մը, որ անոր արհեստավարժութեան կողքին բարձր գնահատեց նաեւ անոր մարդկային արժանիքները։

Պաղեստինեան միասնականութեան երազով ու Պաղեստինի կերտման տեսլականով գործող Շիրին Ապու Աքլէի սպանութեան մասին աշխարհի տարածքին գործող բոլոր լրատուամիջոցները՝ լսատեսողական, ելեկտրոնային թէ մամուլ, պէտք է քաջաբար ու անվախ կերպով մատնանշեն Իսրայէլի կողմէ անոր դէմ գործուած քստմնելի սպանութիւնը։

Աւելի՛ն. անոնք պէտք է անդրադառնան նաեւ այն իրականութեան ու ճշմարտութեան, թէ ինչպէս իսրայէլեան ուժեր յարձակեցան Շիրին Ապու Աքլէի դագաղը ուսամբարձ առաջնորդող հազարաւոր յուղարկաւորներուն դէմ եւ խոշտանգեցին զանոնք։ Այդ ուժերը նաեւ ներխուժել փորձեցին Ապու Աքլէի բնակարանը, երբ ան տակաւին հողին չէր յանձնուած։

Իսրայէլեան ուժերուն կողմէ գործուած այս արարքը նախատինք էր՝ Շիրին Ապու Աքլէի յիշատակին։

«Press» բառով օժտուած լրագրողի ժիլէն (բաճկոն, խմբ․) կրող Շիրին Ապու Աքլէ ոչ միայն թիրախ դարձաւ իսրայէլացի դիպուկահարի փամփուշտին, այլ՝ անոր խաղաղ յուղարկաւորութեան արժանանալու իրաւունքը եւս ենթակայ դարձաւ իսրայէլեան ուժերուն ոտնձգութեան։

Շիրին Ապու Աքլէի սպանութիւնը յաւելեալ պատասխանատուութիւն կը զետեղէ իրենց գրիչներով եւ քամերաներով զինուած լրագրողներուն ուսերուն՝ չտկարանալու վայրագ եւ բռնի ճնշումներուն դիմաց։

Ապու Աքլէի անժամանակ սպանութիւնը արտօնեց աշխարհին վկայելու իսրայէլեան բռնարարքներու սանձարձակութիւնը, ինչպէս նաեւ մարդկային իրաւունքները ոտնակոխելու արարքները։

Եթէ փոփոխութիւններ չարձանագրուին, ապա իսրայէլեան բռնագրաւումը պիտի ընդարձակուի, իսկ պատերազմական ոճիրները պիտի շարունակուին։

Ի պատասխան իսրայէլեան բռնարարքներուն եւ հետաքննութեան բացման մերժումով Շիրին Ապու Աքլէն երկրորդ անգամ սպաննած ըլլալու իրականութեան, Պաղեստինեան իշխանութիւններուն արտաքին գործոց նախարարութիւնը Ապու Աքլէի սպանութեան թղթածրարը փոխանցեց Լա Հէյի դատարան, հաստատելով, որ Ապու Աքլէ սպաննուեցաւ իսրայէլեան ուժերուն կողմէ։ Իսկ իսրայէլեան ուժերու պաշտօնական բանբեր Ավիշայ Ատրահի շեշտեց, որ Շիրին Ապու Աքլէի սպանութեան մասին Իսրայէլ հետաքննութիւն պիտի չբանայ։

Ապու Աքլէի սպանութիւնը դատապարտեցին մեծ թիւով պատասխանատուներ, ինչպէս Յորդանանի թագաւորը, Քաթարի իշխանը, տարբեր երկիրներու նախագահներ եւ պետական պաշտօնատարներ։

Արաբական տարբեր երկիրներու մէջ, ի յիշատակ Շիրին Ապու Աքլէի, անոր անունով  հաստատուեցան համալսարանական մրցանակներ ու ֆոնտեր՝ լրագրութեան բաժանմունքի ուսանողներուն համար։

Բեթղեհէմի մէջ ծնած քրիստոնեայ լրագրող Շիրին Ապու Աքլէի սպանութիւնը ամէնէն բուռն կերպով դատապարտողներէն եղաւ իրլանտացի երեսփոխան Պոյտ Պերըթ, որ անոր սպանութիւնը նկատեց պատերազմական ոճիր։

Թէեւ Իրլանտա այն երկիրներէն է, որ դատապարտեց լրագրող Ապու Աքլէի սպանութիւնը եւ կոչ ուղղեց անկախ հետաքննութիւն մը կատարելու այդ հարցով, սակայն Պերըթի կարծիքով այդ կեցուածքը անբաւարար է։

Պոյտ Պերըթ Իրլանտայի խորհրդարանը պախարակեց այդ կեցուածքին համար՝ խորհրդարանի իր ելոյթին ընթացքին հաստատելով, թէ Շիրին Ապու Աքլէի սպանութիւնը պատերազմական ոճիր է։

Ան հարց տուաւ պաղեստինեան սահմաններուն մօտ իսրայէլեան ուժերուն կատարած գործողութեան մասին, ու ապա աւելցուց հաստատելով, թէ խորհրդարանը պաղեստինեան սահմաններուն հանդէպ նոյն վարուելակերպը չի ցուցաբերեր, այնպէս ինչպէս կը կատարէ Ուքրայինայի պարագային։

«Իսրայէլի կողմէ Ժենին պաղեստինեան գաղթակայան ներխուժումը արդարացում չունեցող զինուորական բռնարարք է, որուն համար Իսրայէլ պէտք է հաշուետու ըլլայ եւ Միջազգային օրէնքին ենթակայ», շեշտեց Պերըթ։

Մարդիկ Շիրինի եւ աշխարհի տարածքին գործող նման հազարաւոր լրագրողներու կը պարտին անարդարութիւններու, ճնշումներու եւ չարաշահումի մասին իրենց տեղեկութիւնները, որովհետեւ այդ լրագրողներն են, որոնք յանձնառու իրենց առաքելութեան՝ ժողովուրդին կը փոխանցեն անեղծ ճշմարտութիւնը։

1997-էն ի վեր իրենց տուներուն մէջ Ապու Աքլէի առաքելութիւնը վկայած եւ լրատուութեան հետեւած պաղեստինցիները խոր յարգանք ունեցած են Ապու Աքլէի նուիրուած աշխատանքին ու անոր արհեստավարժութեան հանդէպ։

Այսրյորդանանի մէջ Իսրայէլի գործած մարդկային իրաւունքներու ճնշումներուն եւ բռնարարքներուն մասին Շիրին Ապու Աքլէի հաղորդումներն ու լրատուութիւնը նկատի ունենալով, զարմանալի չի թուիր իսրայէլեան ուժերուն կողմէ զայն սպանութեան թիրախ դարձնելը, որովհետեւ Շիրին Ապու Աքլէ ճշմարիտ խօսքի ուժը մարմնաւորողն էր։ Անոնք սակայն պիտի չկարենան սպաննել կամ ջնջել Ապու Աքլէի 25 տարուան աշխատանքը, որ Պաղեստինի արխիւներուն մէկ կարեւոր բաժինը պիտի հանդիսանայ։

 

 

Happy
Happy
0 %
Sad
Sad
100 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles