ՆՈՐ ՀՈՐԻԶՈՆՆԵՐ՝ ՀԱՅԵՒԱՄԵՐԻԿԵԱՆ ՅԱՐԱԲԵՐՈՒԹԻՒՆՆԵՐՈՒՆ ԴԻՄԱՑ

0 0
Read Time:2 Minute, 18 Second

Ա.Ա.
Միացեալ Նահանգներու նախագահ Ճօ Պայտընի կողմէ արտաքին գործոց նախարարի պաշտօնին առաջադրուած՝ Էնթընի Պլինքընի յայտարարութիւնները, ինչ կը վերաբերի Հայաստանեան թղթածրարին, նոր յոյս կը ներշնչեն՝ հայեւամերիկեան յարաբերութիւններու նոր հանգրուանի մը սկսման, ուր հաշուի պիտի առնուին Թուրքիոյ շրջանային եւ հարաւային կովկասեան յարձակողապաշտ քաղաքականութիւնը, Ատրպէյճանի կողմէ Հայաստանի եւ Արցախի դէմ մղուող քաղաքական – քարոզչական պայքարը եւ հետեւանքները։ Կ՛ակնկալուի, որ Հայաստանի եւ Արցախի վերաբերեալ նախկին կրաւորական քաղաքականութիւնը հիմնովին փոփոխութեան ենթարկուի։
էնթընի Պլինքըն, որ հարցապնդուեցաւ Ծերակոյտի արտաքին յարաբերութիւններու յանձնախումբին կողմէ, նաեւ գրաւոր վերահաստատեց հայեւամերիկեան յարաբերութիւններու ամրապնդման համար իր յանձնառութիւնը։
Պլինքըն նշեց, որ բազմաթիւ հարցերու մէջ Թուրքիա իբրեւ ռազմավարական դաշնակից չի գործեր։ Ան Թուրքիան «այսպէս կոչուած դաշնակից» կոչեց, ինչ որ աննախընթաց անուանում մըն է դիւանագիտական ասպարէզին մէջ։ Պլինքըն այս ընդգծումները կատարեց՝ պատասխանելով Ծերակոյտի արտաքին յարաբերութիւններու յանձնախումբի նախագահ Ռապըրթ Մենենտեսի հարցումներուն։ Մենենտէս նաեւ արծարծեց Հայոց Ցեղասպանութեան ճանաչման խնդիրը՝ նշելով, որ Ծերակոյտն ու Քոնկրէսը արդէն իսկ ընդունած են համապատասխան յայտարարութիւններ եւ գործադիր իշխանութեան կարգն է՝ ցեղասպանութիւնը ճանչնալու համար։
Բանաւոր պատասխաններէն ետք, Պլինքըն նաեւ գրաւոր պատասխաններ յղեց Մենենտէսի հարցումներուն։ Ան վերահաստատեց ժողովրդավարական կառավարումը եւ տնտեսական աճը խթանելու նպատակով՝ Հայաստանի ապահովութեան աջակցութիւն եւ օգնութիւն տրամադրելու կարեւորութիւնը, որովհետեւ ժողովրդավարութիւնն ու տնտեսութեան աճը կը նպաստեն երկրին դիմադրականութեան եւ տոկունութեան։
Անդրադառնալով Արցախի պատերազմին, Պլինքըն յայտնեց,որ նոր վարչակազմը վերատեսութեան պիտի ենթարկէ ապահովութեան մարզին մէջ Ատրպէյճանի տրամադրուելիք օժանդակութիւնը եւ անհրաժեշտութեան պարագային ալ պատրաստ պիտի ըլլայ վերականգնելու թիւ 907 բանաձեւը։ 1992-ին Քոնկրէսը վաւերացուց Ազատութեան Մասին Հռչակագիրը, որուն հիմամբ, քաղաքական կայունութեան եւ տնտեսութեան աճի աջակցելու նպատակներով՝ օժանդակութիւն պիտի տրամադրուէր Ռուսիոյ եւ նորանկախ նախկին խորհրդային պետութիւններու։ Նոյն տարուան ընթացքին Ամերիկայի Հայ Դատի յանձնախումբին եւ ամերիկահայ լոպպիիստներու ջանքերով Քոնկրէսը ընդունեց թիւ 907 բանաձեւը, որ կ՛արգիլէր Ատրպէյճանի օժանդակութիւն տրամադրել, որովհետեւ Լեռնային Ղարաբաղի եւ Հայաստանի դէմ զինեալ գործողութիւններ կատարած եւ Հայաստանը շրջափակած էր։2001ին քոնկրէսը ընդունեց այլ որոշում մը, որուն հիմամբ գործող նախագահին կը վերապահուէր թիւ 907 բանաձեւը սառեցնելու կամ գործադրելու իրաւունքը՝ փաստօրէն Ատրպէյճանի վրայ ճնշումի լծակի մը վերածելով որոշումը։
Պլինքըն նաեւ հաստատեց,որ Քոնկրէսին եւ պաշտպանութեան նախարարին հետ գործակցելով՝ նոր վարչակազմը պիտի յստակացնէ Հայաստանի եւ Հարաւային Կովկասի կարիքները՝ ապահովութեան մարզին մէջ, աւելցնելով,որ նոր թափ պիտի տայ Լեռնային Ղարաբաղի տագնապին յարատեւ լուծում մը գտնելու ամերիկեան ջանքերուն։Այս ծիրին մէջ Պլինքընի անուղղակիօրէն կը ձայնակցէր Հայաստանի մէջ Միացեալ Նահանգներու դեսպան Լին Թրէյսի, որ կը յայտարարէր, թէ Արցախի կարգավիճակը պէտք է ճշդուի խաղաղ բանակցութիւններու ճամբով։
Հիմա որ Ծերակոյտը հաստատեց Պլինքընը արտաքին գործոց նախարարի պաշտօնին, Ամերիկայի Հայ Դատի յանձնախումբը եւ ամերիկահայ լոպիինկի միւս մարմիններն ու կազմակերպութիւնները համակարգուած աշխատանքի նոր հորիզոններ ունին իրենց դիմաց, որպէսզի առաջին հերթին կասեցնեն Ատրպէյճանի տրամադրուելիք օժանդակութիւնը՝ ստեղծելով այն պայմանները, որոնք պիտի ապահովեն Թիւ 907 բանաձեւին գործադրութիւնը։
Հարաւային Կովկասեան ընդհանուր իրավիճակին մէջ նոր համակարգ ստեղծուած է։ Բազմաբեւեռ այս դրութեան մէջ Միացեալ Նահանգներ, իբրեւ ԵԱՀԿ Մինսքի խումբի համանախագահ պետութիւն, ունին յստակ առաքելութիւն մը, զոր լաւապէս բանաձեւեց Էնթընի Պլինքըն՝ իր հարցապնդման նիստին ընթացքին։ «Լեռնային Ղարաբաղի տագնապին վերջնական լուծումը պէտք է երաշախաւորէ շրջանին ապահովութիւնը եւ բացառէ նոր պատերազմին բռնկումը»։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԲԱՆԱԿ, ՄԱՐՏՈՒՆԱ՛Կ ԲԱՆԱԿ
Next post Լոյս Տեսաւ Հ․Յ․Դ․ Պաշտօնաթերթ «Դրօշակ»-ի 2021-ի Առաջին Համարը

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles