ՆՇՄԱՐ.- Ո՞Վ ՊԻՏԻ ԸԼԼԱՅ ՅԱՂԹՈՂԸ

0 0
Read Time:3 Minute, 33 Second

Ս. ՄԱՀՍԷՐԷՃԵԱՆ

20 Յունիս 2021 (յետմիջօրէ)

20 Յունիսը հասաւ ի վերջոյ, Հայաստանի քաղաքացիները ընտրեցին Ազգային ժողովի անդամները: Քուէարկութեան կեդրոնները փակուեցան երեկոյեան ժամը 8-ին (այս տողերը արձանագրելէ կարճ ատեն մը առաջ), ընտրական յանձնախումբը սկսաւ հրապարակել տեղամասերու արդիւնքները: Բացայայտ է, որ ընդհանուր արդիւնքներուն պատկերը պիտի յստականայ մինչեւ 24 ժամ, իսկ պաշտօնական արդիւնքներուն համար պէտք է սպասել քանի մը օր եւս:

Քուէարկութեան կեդրոններու փակումէն անմիջապէս ետք, ու ըստ կարելւոյն հետեւելով իշխանութեան եւ ընդդիմադիր աղբիւրներու հաղորդումներուն, կան թելադրական փաստեր: Վերցնենք մէկ քանին (բոլոր մանրամասնութիւնները արձանագրելու համար պէտք պիտի ունենանք քանի մը տասնեակ սիւնակի):

  • Քուէարկութեան մասնակցած է ընտրելու իրաւունք ունեցողներուն նուազ քան 50 առ հարիւրը (49.4), որ մօտաւորապէս մէկ առ հարիւրով աւելի է նախորդ՝ 2018-ը մասնակիցներէն: Կարելի է հազար ու մէկ ձեւով մեկնաբանել այս պատկերը, սակայն գոնէ նշենք, թէ սա կը նշանակէ, որ քուէրակողներուն աւելի քան կէսը փաստօրէն անտարբեր է անձուդարձերուն նկատմամբ: Սա կրնայ կոչուիլ հիասթափութիւն՝ իշխանութիւններէն, ընդդիմադիրներէն, նաեւ անվստահութիւն՝ նորելուկներուն հանդէպ, կամ, տակաւին՝ մնացած ըլլալ 44-օրեայ պատերազմին պատճառած ցնցումներուն ազդեցութեան տակ, գործնապէս ըսել, որ ընտրութիւններուն համար ընտրուած պահը պատեհ չէր, երկիրը տակաւին պատրաստ չէ նման պատասխանատու քուէարկութիւն կատարելու: Պարզ ու անվիճելի իրականութիւն է, որ երկրին ապրած ճակատագրական փուլը կրաւորականի կօշիկներուն մէջ պահած է ժողովուրդին մեծ մասը:
  • Ոստիկանութեան իսկ հաստատումով, արձանագրուած է ապօրինի արարքներու թիւ մը, որ սպասելի չէր, մանաւանդ, որ այս իշխանութիւնը կը հաւաստէր, թէ իր օրով նման պատկեր չի կրնար արձանագրուիլ: Ընդդիմադիրներ աւելի ուժեղ լուսարձակի տակ բերին այս իրականութիւնը: Աւելին, եթէ սա կամ նա օրինախախտումը այլապէս «բնական երեւոյթ» է որեւէ երկրի պարագային, Հայաստանի մէջ արձանագրուած են խախտումներ, որոնք ցոյց կու տան, որ իշխանաւորները իրենց լծակները լաւագոյնս օգտագործած են, որպէսզի արդիւնքները ի նպաստ իրենց ըլլան (կ’արձանագրենք, որպէսզի այս նշումը որեւէ ձեւով չդիտուի իբրեւ վերջնական արդիւնքենրուն լոյսին տակ եղած՝ «ուշացած նշում», ինչ ալ որ ըլլան արդիւնքները): Ի դէպ, սա սպասելի էր. ընդդիմադիրները, որոնք ի սկզբանէ մտնանշած էին իշխանաւորներուն հաւանական ընելիքները, հիմա կրնան խօսիլ փաստացիօրէն:
  • Շեշտելով շեշտենք, թէ որեւէ խախտում, ապօրինի արարք, չի կրնար արդարացում ունենալ: Ինչ որ հաղորդուեցաւ, ցոյց կու տայ, որ իշխանականներու միջամտութիւնները ունեցած են ուղղակի եւ անուղղակի ձեւեր: Ուղղակին կատարուած է քուէարկողներ ուղղորդելով, քուէաթերթիկները անվաւեր նկատելու փորձերով (օրինակ, կ’ըսուի, թէ ընդդիմադիրներու ընտրական թիւերը կրող՝ որոշ թիւով թերթիկներու վրայ սկիզբէն որոշ նշաններ դրուած են, որպէսզի անոնք ապօրինի նկատուին համրանքի պահուն. Այս մասին ահազանգ տրուեցաւ ընտրութեան նախօրեակին), նկատուած են կրկնակի քուարկումի պարագաներ, մինչեւ իսկ… մահացածներու անուններ երեւցած են ցանկերու վրայ (սա իւրայատուկ «գիւտ» չէ Հայաստանի համար, եւ յամենայնդէպս՝ ոչ արդարանալի): Անուղղակի փորձերը կատարուած են հետեւեալ ձեւերով. քուարկութեան կեդրոններու մէջ հսկիչներու անտեղի հարցապնդում եւ որոշ պարագաներու՝ ոստիկանատուն տանիլ, գոբրծնապէս խանգարելով անոնց գործը. ամէնէն աղաղակող դէպքը (ոչ միակը) այն էր, որ Երեւանի բժշկական կեդրոնի մը տնօրէնը անհիմն մեղադրանքով հարցաքննութեան կանչուեցաւ նախօրեակին, յետոյ, «ներողութիւն, սխալած ենք եղեր»ի պէս չքմեղանքով մը ազատ արձակուեցաւ քուարկութեանց մեկնարկէն հազիւ ժամ մը առաջ, այլ շրջաններու մէջ եւս քուարկութեան կեդրոններ անտեղի խուզարկութիւններու ենթարկուեցան եւ աշխատանք տանողներ ոստիկանատուն տարուեցան հարցաքննութեան, մի՛շտ հասնելու անոնց անպարտ արձակման…

 

Նախնական արդիւնքներու համաձայն, երկու գլխաւոր մրցակիցները՝ Նիկոլ Փաշինեան եւ Ռոպէրթ Քոչարեան, շատ մօտ արդիւնքներ ձեռք բերած են. գոնէ այդ էր նաեւ միջազգային մամուլի նախնական գնահատումները: Ինչպէս նշեցինք, պատկերը աւելի պիտի յստականայ քուէատուփերուն փակումէն 24 ժամ ետք:

Քուարկութեանց զուգահեռ, թ՛է հայկական եւ թէ միջազգային լրատու աղբիւրներու գնահատումներուն շարքին, կար հասարակ կէտ մը. հայերը ունին երկու հիմնական ընտրանք. փրկել Հայաստանն ու փորձել վերականգնիլ պատերազմին ահաւոր հետեւանքներու վիհէն, կանխարգիլել յաւելեալ կորուստներ (հողային, քաղաքական եւ այլ), կամ… փրկել իշխանաւոր մը եւ իր գործակիցները, որոնք շատերու կողմէ կը նկատուին աղէտալի վիճակին գլխաւոր պատասխանատուն, իշխանաւոր մը, որ կը փորձէ ժողովուրդը համոզել, թէ ինք երկիրն ու ժողովուրդը փրկած է շատ աւելի մեծ աղէտէ, եւ հիմա, կը մտածէ, թէ կարելի է երկու թշնամիներուն հետ լեզու գտնել եւ կայունութիւն բերել (օտար աղբիւներու հոգը չէ, յայտնապէս, որ ազերիական բանակներ թափանցած են Հայաստանի սահմաններէն ներս):

Հայկական որոշ շրջանակներու համար, արձանագրուած է շատ իւրայատուկ դէպք մը. Սիւնիքի մէջ, սահմանային Շուռնուխ գիւղին մէջ Փաշինեան քուէներ ստացած է. սա այն գիւղն է, որուն մէկ մասը ամիսներ առաջ ազերիներուն կողմէ խլուեցաւ «Ճի.Փի.Էս.»ի միջոցով «սահմանագծումով», քանի մը բնակիչներ իրենց տունը կրակի տուին, որպէսզի ազերիները անոնց չտիրանան: Քաղաքական անձնաւորութիւն մը դառնութեամբ նկատեց, որ ուրեմն Հայաստանի մէջ կան քուարկողներ, որոնք կը հանդուրժեն տունի եւ հայրենի հողի կորուստին, չեն ըմբռներ, թէ 44-օրեայ պատերազմն ու հետեւանքները ինչպիսի՛ աղէտ էին եւ նոր վտանգներու տակ կը պահեն մեր հայրենիքը:

Այս իրականութիւններուն լոյսին տակ է որ 20 Յունիսի երեկոյեան, հայութիւնը կը սպասէ գիտնալու՝ թէ ո՞վ պիտի ըլլայ յաղթողը…

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles