Նիւ Եորք.- Հ.Յ.Դ 125-ամեակի Նշում Եւ Սուրիահայութեան Ի Նպաստ Դրամահաւաք

0 0
Read Time:4 Minute, 15 Second

nyc3

Թղթակից

Դեկտեմբեր 5-ը յատկանշական յաջողութեամբ նշուեցաւ Նիւ եորքի հայութեան մօտ, տեղւոյն էջ Հ.Յ.Դ. «Արմէն Գարօ» Կոմիտէութեան կազմակերպութեամբ, տեղի ունեցած Հ.Յ.Դ. 125-ամեակի ձեռնարկին առիթով։
Սոյն յոբելինական ձեռնարկին ի շարս Դաշնակցական ընտանիքի ընկերուհիներու եւ ընկերներու եւ հոծ բազմութեամբ համակիրներուն երեկոյին ներկայ էին պատկան մարմիններու ներկայացուցիչներ եւ եկեղեցական դասը, որոնց կարգին՝ Առաքելական եկեղեցւոյ Նիւ Եորքի հոգեւոր հովիւներ՝ Տէր Մեսրոպ Քհնյ. Լագիսեան (Սուրբ Լուսաւորիչ Մայր եկեղեցի) եւ Տէր Նարէկ Քհնյ. Թռթրեան (Սուրբ Սարգիս եկեղեցի), Արեւելեան Ա.Մ.Ն.-ի Հ.Յ.Դ. Կեդրոնական Կոմիտէի ներկայացուցիչ՝ ընկեր Հայկ Օշական, Նիւ Եորքի Հ.Յ.Դ. ՚՚Արմէն Գարօ՚՚ կոմիտէութեան ներկայացուցիչ՝ ընկեր Վալօտ Աթախանեան. Սուրիոյ Հ.Յ.Դ. Կեդրոնական Կոմիտէութեան եւ Սուրիահայ Շտապ Օգնութեան Միութեան անդամ՝ ընկեր Ներսէս Սարգիսեան։ Ուղեկից Քոյր միութեանց՝ Հ.Օ.Մ.-ի, Հ.Մ.Ը.Մ.-ի եւ «Համազգային»ի ներկայացուցիչներ, Միացեալ Ազգերու Կազմակերպութեան մօտ Հայաստանի Հանրապետութեան դեսպանի տեղակալ՝ Պրն. Միքայէլ Սարուխանեան եւ Նիւ Եորք-Նիւ Ճրզի շրջանի Ռամկավար Ազատական Կուսակցութեան Շրջանային Վարչութեան ներկայացուցիչներ։
Հայաստանի Հարապետութեան Օրհներգ՝ «Մեր Հայրենիք»ին եւ Հայ Յեղափոխական Դաշնակցութեան քայլերգ՝ «Մշակ Բանուոր»ի կատարումներէն ետք , երեկոն պաշտօնապէս բացուած յայտարարեց «Արմէն Գարօ» Կոմիտէութեան եւ Հ.Յ.Դ. 125-ամեակի յանձնախումբին անունով՝ ընկ. Նազարէթ Մարգարեան: Ան ողջունեց ներկաները սոյն յոբելինական ձեռնարկին իրենց մասնակցութիւնը բերելնուն առիթով եւ ապա մէկ վայրկեան հրաւիրեց ներկաները յոտնկայս յարգելու յիշատակը բոլոր երդուեալ Դաշնակցական նահատակներուն անցնող 125 տարուան ընթացքին։ Ապա յաջորդեց զոյգ քահանայ հայրերուն օրհնութեան աղօթքն ու ընթրիքը։nyc2
Այնուհետեւ Օրուան խորհուրդին մասին յաւուր պատշաճի պաշտօնական խօսքը փոխանցեց Արեւելեան Ամերիկայի Կեդրոնական Կոմիտէի ներկայացուցիչ՝ ընկեր Հայկ Օշական, որ նախանձախնդրութեամբ ընդգծեց Հ.Յ.Դ. գործունէութեան 125-ամեայ վաստակն ու ներդրումը՝ Հայաստանին , Հայ Ժողովուրդին եւ ընդհանրապէս ապակեդրոնացեալ դրութեամբ իր 125 տարուան ներկայութեանը՝ գաղութներէն ներս որպէս գործօն եւ դրական զօրակիցը հայ ժողովուրդի բոլոր կարիքներուն եւ հայրենաշինութեան վեհ ու նուիարական գործին մէջ։ Խօսքի աւարտին, Օշական բարի եւ յաղթական ճանապարհ մաղթեց Հայ Յեղափոխական Դաշնակցութեան յառաջիկայ գործունէութեանց եւ ծրագիրներու իարականացման համար։ Ան յատկապէս խրախուսեց միշտ կառչած մնալ Հ.Յ.Դ.-ի կողքին միահամուռ եւ ամբողջական հայութեամբ հասնելու գերագոյն նպատակին՝ Ազատ Անկախ եւ Միացեալ Հայաստանի կերտման անշուշտ Ամբողջական Հայութեամբ։
Օրուան երկրորդ խօսնակը՝ Հալէպէն հիւրաբար շրջանէն ներս այցելող Սուրիոյ Հ.Յ.Դ. Կեդրոնական Կոմիտէութեան անդամ ընկեր Ներսէս Սարգիսեանն էր։ Ան, առաջին հերթին, շնորհակալութիւն յայտնեց Հ.Յ.Դ. Արեւելեան Ամերիկայի Կեդրոնական Կոմիտէութեան այս գեղեցիկ առիթը ստեղծելուն համար:
Ապա Սարգիսեան ամփոփ եւ շատ սեղմ գիծերու մէջ ներկայացուց Սուրիոյ մէջ տիրող եւ յատկապէս Հալէպի , Քեսապի , Դամասկոսի եւ Տէր Զօրի մէջ եւ այլուր հայութեան այսօրուան դիմագրաւած դժուարութիւններուն մասին։ Ան ընդգծեց թէ Սուրիահայութիւնը որպէս խորհրդանիշը հայութեան, երբեք չթուլացաւ եւ ցայսօր կը շարունակէ իր գաղութային ազգային եւ քաղաքացիական պարտականութիւններն ու կեանքը միութենական , դպրոցական , եկեղեցական եւ այլ ընկերային բնագաւառներէ ներս։
Ան մատնանշելով այսօրուան Սուրիոյ իրականութեան մէջ կեանքի ու մահուան պայքարը , շեշտեց ըսելով ինքնանպատակ չէ Սուրիահայութեանս պայքարը։
«Ներկայ իրավիճակը, միջազգային հանրութեան նաեւ մտահոգութեան առանցքը կը կազմէ։ Անիկա շատ խոր իմաստ ունի ու կը վերաբերի ամբողջական հայութեան եւ ոչ թէ՛ միայն Սուրիահայութեան: Այսօր մեր թշնամին շատ յստակ է , որ կ՝ուզէ Ցեղասպանութենէն վերապրող այդ գաղութը մեր հաւաքական յիշողութեան մէջէն չնչել։ Այլապէս շատ դիւրին կ՛ըլլար գաղութը տեղափոխել ուրիշ երկնակամարի տակ, եթէ ինքնանպատակ ըլլար», ըսաւ ան եւ կարեւորութեամբ անդրադարձաւ Հ.Յ.Դ.-ի կողմէն, առաջին օրէն իսկ ստեղծուած շտապ օգնութեան եւ վերականգնումի մարմնին տարած կամաւոր աշխատանքին մասին: Աւարտին Սարգիսեան ներկաներուն վստահեցուց թէ, այս շտապին թափանցիկ եւ ամէնէն բծախնդիր ձեւով գործելուն մասին: Ան հիմնականին մէջ երեք դժուարութիւններու մասին խօսեցաւ: Առաջին՝ հայու ապահովական խնդիրներուն մասին։ Երկրորդ՝ կենցաղային տագնապի մասին ինչպէս՝ ըմպելի ջուրի, հացի եւ սնունդի մասին։ Երրորդ՝ տնտեստական դժուարութեան մասին։ Եւ այս դժուարութիւնները նշելով, յայտնեց թէ Շտապ Օգնութեան մարմինն է, որ կը հոգայ եւ նեցուկ կը կանգնի ժողովուրդին կողքին, գործակցութեամբ Հ.Օ.Մ.-ի, Հ.Բ.Ը.Մ.-ի Հայոց Առաջնորդարանի եւ հարանուանութեանց, երեք աւանդական Կուսակցութիւններուն եւ բոլոր ուղեկից միութիւններուն հետ:nyc4
«Համայնքի գործունէութիւնը կը շարունակուի խանդավառ եւ յանձնառու։
Սուրիոյ մէջ մնացող հայուն թեւ եւ թիկունք ենք։ Կը քաջալերենք Հայաստան տեղափոխուող հայութեան ծրագիրը։ Վերջ ի վերջոյ նաեւ կապի մէջ ենք գաղութներու ներկայացուցիչներու հետ, որպէսզի տեղական հայ իրականութեան մէջ ներառնեն նոր գաղթած հայերը որպէսզի չհեռանան իրենց ինքնութենէն», ըսաւ ան եւ իր խօսքի աւարտին՝ Սուրիահայութեան եւ Հ.Յ.Դաշնակցութեան մեծ ընտանիքին անունով, շնորհակալութիւն յայտնեց հայ ժողովուրդի բոլոր զաւակներուն որոնք իրենց անսակարկ նուիրումը կը ցուցաբերեն, արդէն աւելի քան չորս տարիէ ի վեր։
Ապա ցուցադրուեցաւ թաղային պաշտպանութեան մասին պատմող տեսաներիզ մը, նախաձեռնութեամբ Սուրիոյ Հ.Յ.Դ.-ին։
Բեմ հրաւիրուեցաւ Ֆիլատելֆիայէն ժամանած «Արցախ» նուագախումբն ու երգիչ՝ Անդրանիկ Վարդանեանը , որպէսզի հայրենասիրական, ազգային, յեղափոխական եւ ազգագրական երգերուն ընդմէջէն, գեղարուեստականօրէն խանդավառեն ներկաները։
Յայտագրի ընթացքին նաեւ Հ.Յ.Դ. 125 ամեակը խորհրդանշող կարկանդակի հատում տեղի ունեցաւ, ձեռամբ Արեւելեան Ամերիկայի Կեդրոնական Կոմիտէի ներկայացուցիչ՝ Հայկ Օշականի եւ Սուրիոյ Կեդրոնական Կոմիտէի անդամ՝ Ներսէս Սարգիսեանի կողմէ։
Տօնակատարութեան ընթացքին, Հ.Յ.Դ. «Արմէն Գարօ» Կոմիտէութեան, Յանձնախումբի անդամներուն եւ կամաւոր ընկերներու համագործակցութեամբ կարելի եղաւ իրականացնել դրամահաւաք մը։ Կարելի եղաւ հաւաքել երեսուն հազար տոլար: Այս առիթով,«Արմէն Գարօ» Կոմիտէութիւնը իր երախտագիտութիւնն ու շնորհակալութիւնը կը յայտնէ բոլոր ներկաներուն, նուիրատուներուն, աշխատողներուն եւ Հ.Յ.Դ.-ի կողքին միշտ իրենց պատրաստակամութիւնը անաջառօրէն տրամադրողներուն՝ ըլլան անոնք Դաշնակցութեան հաւատաւոր համակիրները եւ կամ կուսակցական ընկերներ։nyc1

Օրուան ուրախութիւնն ու ոգեւորութիւնը իր լրումին հասաւ, Հայ Յեղափոխական Դաշնակցութեան Նիւ Եորքի երիտասարդներուն կողմէ տեղւոյն վրայ պատրաստուած տեսագրութեան մը նկարահանումով, որուն ընդմէջէն Արեւելեան Ամերիկայի հայ երիտասարդութեան եւ անձամբ իրենց անունով զօրակցութեան կոչեր բարձրաձայնեցին Սուրիահայ երիտասարդութեան ուղղուած։
Վարձքերնի՛դ կատար։
Շնորհաւոր Հայ Յեղափոխական Դաշնակցութեան 125 ամեակ։ Խաղաղութիւն Սուրիոյ եւ Սուրիահայութեան։ Կեցցէ՜ք բոլորդ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԵՂԱՆԱԿԱՒՈՐ ԽՌՈՎՔ
Next post ԹԵՐԹԱՎԱՃԱՌԻ ԿՐՊԱԿԻՆ ԱՌՋԵՒ՝ ԸՆԹԵՐՑԵԼՈՎ ՎԵՐՏԱՌՈՒԹԻՒՆՆԵՐԸ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles